បន្ទាយមានជ័យ ៖ នៅថ្ងៃទី១ ខែមីនា ឆ្នាំ២០១៩ នៅវេលាម៉ោង១២យប់ កម្លាំងជំនាញប្រឆាំងគ្រឿងញៀនក្រុងប៉ោយប៉ែត សហការជាមួយកម្លាំងប្រឆាំងគ្រឿងញៀនខេត្ត និងប៉ុស្តិ៍រដ្ឋបាលផ្សារកណ្ដាល បានចុះបង្ក្រាប អ្នកលក់ និងអ្នកជក់គ្រឿងញៀនមួយសំបុក នៅកែងក្រោយសាលារៀនសុវណ្ណភូមិ ឋិតនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនជនសង្ស័យបានចំនួន៧នាក់ ក្នុងនោះមានស្រី៣នាក់ និងធ្វើការដកហូតវត្ថុតាងរួមមានម្សៅក្រាមសថ្លា ចំនួន២៤ថង់តូច យកចេញពីក្រោមពូកលើគ្រែកំពុងដេក ដបជក់គ្រឿងញៀន១ ឧបករណ៍ប្រដាប់ចូកថ្នាំញៀនចំនួន៤ និងរបស់មានតម្លៃជាច្រើនទៀត។
កម្លាំងជំនាញប្រឆាំងគ្រឿងញៀនក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ជនសង្ស័យទាំង៧នាក់ ១-ឈ្មោះ សឿង ស្រីនាង ភេទស្រី អាយុ៣២ឆ្នាំ មុខរបរកម្មករ។ ២-ឈ្មោះ អុំ សឿន ភេទស្រី អាយុ៣៤ឆ្នាំ មុខរបរជាងដេរ។ ៣-ឈ្មោះ សាន់ យឿន ភេទស្រី អាយុ៦៣ឆ្នាំ នៅផ្ទះ។ ៤-ឈ្មោះ ម៉េង ប៊ុនណេង ភេទប្រុស អាយុ៣៧ឆ្នាំ មុខរបរលក់ត្រី នៅផ្សារថៃខាងលើ ស្នាក់នៅភូមិមិត្តភាព សង្កាត់ផ្សារប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ៥-ឈ្មោះ នូ សុខ ភេទប្រុសអាយុ២៤ឆ្នាំ មុខរបរកម្មករ ស្នាក់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ៦-ឈ្មោះ ឡាយ សីហា ភេទប្រុស អាយុ៣១ឆ្នាំ មុខរបរកម្មករសំណង់ រស់នៅភូមិប្រជាធម្ម សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។ ៧-ឈ្មោះ ហឹម បូ ភេទប្រុស អាយុ២៤ឆ្នាំ មុខរបរកម្មករសំណង់ រស់នៅភូមិប្រជាធម្ម សង្កាត់/ក្រុងប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ជនសង្ស័យទាំង៧នាក់នេះ ក្រោយពីឃាត់ខ្លួនហើយ បានបញ្ជូនមកស្នងការ ដើម្បីសាកសួរបន្ត។
លោកឧត្ដមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានប្រាប់អ្នកព័ត៌មានឲ្យដឹងថា នៅមុខនគរបាល ជនសង្ស័យបានឆ្លើយសារភាពថា ខ្លួនពិតជាបានលួចជក់ និងលក់គ្រឿងញៀនពិតប្រាកដមែន។ ក្រោយពីបានចម្លើយសារភាពហើយ ជនសង្ស័យ ត្រូវបានកម្លាំងជំនាញកសាងសំណុំរឿងបញ្ជូនទៅតុលាការដើម្បីដាក់ទោសទៅតាមផ្លូវច្បាប់៕
Source: Kampuchea Thmey Daily
0 Comments