ភ្នំពេញ ៖ ជនជាតិចិន២នាក់ប្ដីប្រពន្ធដែលពាក់ព័ន្ធការឆបោកប្រាក់ចំនួន៥លានដុល្លារ ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេច កាលពីល្ងាចថ្ងៃទី០២ ខែមីនា ឆ្នាំ២០១៩ ដាក់ឃុំខ្លួននៅពន្ធនាគារក្រោមការចោទប្រកាន់ ពីបទឆបោក។
ជនជាប់ចោទទាំង២នាក់ម្នាក់ ឈ្មោះ CHEN DAOMIN ភេទប្រុស អាយុ៥៧ឆ្នាំ(ប្តី) និងម្នាក់ ឈ្មោះ LIN XUEFANG អាយុ៥០ឆ្នាំ(ប្រពន្ធ)។
ព្រះរាជអាជ្ញាអមសាលាដំបូងបានសម្រេចធ្វើការចោទប្រកាន់ជនជាតិចិន២នាក់ប្តីប្រពន្ធនោះ ដោយសារ ជនជាប់ចោទមានមុខរបរជានាយកធនាគារមួយនៅស្រុកចិន ហើយត្រូវបានអតិថិជនប្តឹងពាក់ព័ន្ធលើទឹកប្រាក់ជិត៥លានដុល្លារអាមេរិក ដែលប្តីប្រពន្ធ២នាក់នោះបានឆបោកយកមក ហើយបានគេចខ្លួនមករស់នៅស្រុកខ្មែរ។
ប្រភពព័ត៌មានបានឲ្យដឹងថា ជនសង្ស័យត្រូវបានសមត្ថកិច្ចនគរបាលនាយកដ្ឋានព្រហ្មទណ្ឌក្រសួងមហាផ្ទៃចាប់ខ្លួន កាលពីថ្ងៃទី២៨កុម្ភៈ នៅរាជធានីភ្នំពេញ។
បន្ទាប់ពីចាប់ខ្លួន សមត្ថកិច្ចបានបញ្ជូនជនសង្ស័យទៅកាន់សាលាដំបូងរាជធានីភ្នំពេញ ក្រោមបទចោទ ឆបោក។
សមត្ថកិច្ចបានបង្ហើបថា ជនសង្ស័យរងនូវបណ្ដឹងឆបោក លើទឹកប្រាក់ជិត៥លានដុល្លារអាមេរិក លុយនោះថា បានយកទៅដាក់ហ៊ុនទិញខុនដូរមួយកន្លែង នៅក្រុងភ្នំពេញ ដែលមានតម្លៃដល់ទៅ៣០លានដុល្លារអាមេរិកឯណោះ។ ជនសង្ស័យ២នាក់ប្តីប្រពន្ធ បានបដិសេធទាំងនៅសមត្ថកិច្ច ក៏ដូចនៅដំណាក់កាលតំណាងអយ្យកាដែរថា ខ្លួនមិនបានជាប់ពន្ធដូចការចោទប្រកាន់នោះទេ ហើយពួកគេ២នាក់ប្តីប្រពន្ធ បាន និងទទូចសុំឲ្យមានការដោះលែងឲ្យមានសេរីភាពវិញ។ ទោះជាយ៉ាងណាក្តី សំណុំរឿងនេះ បានចាត់បញ្ជូនទៅដល់ដៃ លោក ពេជ្រ វិជ្ជាធរ ចៅក្រមស៊ើបសួរចាត់ការបន្ត ហើយរហូតមកដល់ថ្ងៃទី០២មិនា តុលាការបានសម្រេចចេញដីកាឃុំខ្លួនជនត្រូវចោទដាក់ពន្ធនាគារជាបណ្ដោះអាសន្នសិន ដើម្បីបន្តនីតិវិធីនៅពេលក្រោយទៀត ដោយសារជនជាប់ចោទបដិសេធមិនទទួលខុសត្រូវលើបំណុល៕
Source: Kampuchea Thmey Daily
0 Comments