កោះកុង ៖ បុគ្គលិកក្រុមហ៊ុនជនជាតិចិនម្នាក់ ត្រូវបានគេប្រទះឃើញដេកស្លាប់នៅខាងក្រោយព្រះអង្គគោកធ្លក ក្នុងភូមិចាំយាមឃុំប៉ាក់ មណ្ឌលសីម៉ា ខេត្តកោះកុង ដោយមិនដឹងមូលហេតុនៅឡើយ។
ជនរងគ្រោះត្រូវបានគេស្គាល់ ឈ្មោះ ចឺង ហៃជា ភេទប្រុស អាយុ២៦ឆ្នាំ ជនជាតិចិន មុខរបរជាបុគ្គលិកគណនេយ្យ ក្រុមហ៊ុនលីវដា ស្នាក់នៅក្រុមហ៊ុនអិលវ៉ាយភីគ្រុប ខេត្តកោះកុង។
ស្ថានភាពសាកសពមានស្នាមរបួសនៅលើដងខ្លួនជាច្រើនកន្លែងដោយវត្ថុរឹង និងបែកមុខ របួសត្រង់ក្បាល បង្ហាញថា ជាអំពើឃាតកម្ម បង្កឡើងដោយជនមិនស្គាល់មុខ។
សមត្ថកិច្ចបានធ្វើការសន្និដ្ឋានថា ជាអំពើឃាតកម្ម ដោយជនរងគ្រោះទំនងជា ត្រូវគេសម្លាប់នៅកន្លែងផ្សេង ហើយដឹកសាកសពមកបោះចោលនៅកន្លែងកើតហេតុនេះ ទើបព្រឹកព្រលឹមឡើងប្រជាពលរដ្ឋប្រទះឃើញក៏ផ្អើលឆោឡោរាយការណ៍ទៅសមត្ថកិច្ចមូលដ្ឋានចុះធ្វើការត្រួតពិនិត្យ ធ្វើកោសល្យវិច័យ កសាងឯកសារដើម្បីបើកការស៊ើបអង្កេតបឋមទៅក្នុងក្រុមហ៊ុន លីវដា និងក្រុមហ៊ុនអិលវ៉ាយភីគ្រុប ដែលជនរងគ្រោះធ្វើការ និងស្នាក់នៅទីនោះ។
សមត្ថកិច្ច កំពុងដុតដៃដុតជើង បើកការស៊ើបអង្កេត ដើម្បីវែកមុខឃាតកក្នុងរឿងក្ដីឃាតកម្មលើជនជាតិចិនម្នាក់នេះ៕
Source: Kampuchea Thmey Daily
0 Comments