ប្រពន្ធ កូនស្រែកទ្រហោយំសោកបោកខ្លួន បន្ទាប់ពីសន្តិសុខម្នាក់សម្រេចចិត្តចង.ក បញ្ចប់ជីវិត

ភ្នំពេញ ៖ សន្តិសុខរស់នៅមន្ទីរពេទ្យកាល់ម៉ែតម្នាក់ ត្រូវបានគេប្រទះឃើញចង.ក សម្លាប់ខ្លួននៅក្នុងម៉ូតូកង់បីឥណ្ឌា ដែលចតនៅជាប់របងខាងក្រៅក្បែរអគារបេះដូង ស្ថិតខាងត្បូងស្ថានទូតបារាំង បង្កជាការភ្ញាក់ផ្អើល កាលពីព្រឹកព្រលឹមអុរ ថ្ងៃទី២៨ ខែកុម្ភៈ ឆ្នាំ២០១៩ ក្នុងសង្កាត់ស្រះចក ខណ្ឌដូនពេញ។

សមត្ថកិច្ចមូលដ្ឋានបានឲ្យដឹងថា ជនរងគ្រោះ ដែលស្លាប់ជាប់ចំណង លៀនអណ្ដាតនៅក្នុងម៉ូតូកង់បីឥណ្ឌានោះ ឈ្មោះ ឃឹម សុខា ហៅហ៊ុយ ភេទប្រុស អាយុប្រហែល៤០ឆ្នាំ មានមុខរបរជាសន្តិសុខរបស់មន្ទីរពេទ្យកាល់ម៉ែត មានរហស្សនាម(Z ៦៤) ស្នាក់នៅផ្ទះជួលក្បែរខាងក្រោយអគារប៉ាស្ទ័រ ក្នុងសង្កាត់ស្រះចក ខណ្ឌដូនពេញ។

ប្រភពព័ត៌មានពីកន្លែងកើតហេតុបានឲ្យដឹងថា រយៈពេលប៉ុន្មានថ្ងៃនេះ ជនរងគ្រោះ ដែលជាសន្តិសុខរបស់មន្ទីរពេទ្យកាល់ម៉ែតរូបនោះ ត្រូវបានខាងមន្ទីរពេទ្យបញ្ឈប់ពីការងារ ដោយមានកំហុសផ្ទាល់ខ្លួនពីបញ្ហាអ្វីមួយ ដែលជនរងគ្រោះប្រព្រឹត្តិខុសតិចតួចដោយខ្លួនឯង ហើយត្រូវខាងថ្នាក់លើសម្រេចបញ្ឈប់ពីការងារនៅខាងក្នុងមន្ទីរពេទ្យ ដោយឲ្យមកយាមមើលការខុសត្រូវខាងក្រៅរបងមន្ទីរពេទ្យវិញ។

ប្រភពព័ត៌មានបានបន្តទៀតថា ទន្ទឹមនឹងថ្នាក់លើរបស់មន្ទីរពេទ្យសម្រេចផ្អាកការងាររបស់សន្តិសុខរូបនោះ គាត់ក៏បានត្អូញត្អែរថា ចាប់ពីថ្ងៃនេះទៅ គាត់នឹងបាត់បង់នូវអ្វីៗទាំងអស់ ជាពិសេសចំណូលដែលរកបានបន្តិចបន្តួចប្រចាំថ្ងៃ ដែលដោះបំណុលគេនោះ គឺត្រូវចប់តែម្តង។ ជនរងគ្រោះក៏ត្អូញទៀតថា គាត់ទៅមុខទៀត គាត់មានតែស្លាប់ទេ ព្រោះអ្វីៗត្រូវបានចប់អស់ហើយនោះ។

ប្រភពព័ត៌មានបានបន្តទៀតថា បន្ទាប់ពីត្រូវខាងមន្ទីរពេទ្យផ្អាកការងាររបស់សន្តិសុខរូបនោះហើយគាត់(ជនរងគ្រោះ) បានជួលម៉ូតូកង់បីឥណ្ឌាគេរត់ ដោយឆ្លៀតពីពេលទំនេរ ដែលយាមនៅខាងក្រៅរបងមន្ទីរពេទ្យ ដែលក្នុង១យប់ បានតម្លៃម៉ឺនរៀលប៉ុណ្ណោះ។ ចំណែកម៉ូតូកង់បីដែលជនរងគ្រោះជួលគេយកប្លង់ផ្ទះទៅដាក់នោះ គឺក្នុង១យប់ពីរម៉ឺនរៀល។

ប្រភពព័ត៌មានបានបន្តទៀតថា នៅយប់ថ្ងៃទី២៧កុម្ភៈនេះ ជនរងគ្រោះបានស្លៀកសំលៀកបំពាក់ជាសន្តិសុខរបស់មន្ទីរពេទ្យកាល់ម៉ែតដដែល ស្រាប់តែនៅព្រលឹមស្រាងៗ ខណៈដែលសន្តិសុខផ្សេងទៀតក្រោកពីដេក ដើម្បីរៀបចំបោសសំអាតសំរាម ឃើញម៉ូតូកង់បីនោះ មិនចេញទៅណា ហើយម្យ៉ាងវិញទៀត ម៉ូតូកង់បីឥណ្ឌានោះ មានបិទវាំងននជិតទាំងសងខាងផង ក៏ដើរទៅមើល ស្រាប់តែភ្ញាក់ព្រើត ពេលដែលឃើញជនរងគ្រោះដែលជាសន្តិសុខ ជាមេផង បានស្លាប់បាត់ ដោយមានខ្សែចំណងចងភ្ជាប់ ក ជាមួយនឹងដំបូលម៉ូតូកង់បីឥណ្ឌានោះ ដៃទាំងពីរគងលើពូកកង់បី ហាក់បីដូចជាមិនទំនងគួរឲ្យស្លាប់ទាល់តែសោះ។

ប្រភពព័ត៌មានបានបន្តទៀតថា បន្ទាប់ពីមានហេតុការណ៍ដូច្នេះ គេឃើញប្រពន្ធ និងកូនៗរបស់ជនរងគ្រោះមានមកដល់នាំគ្នាស្រែកទ្រហោយំសោកបោកខ្លួន មិនគួរលោកឪពុក និងប្តី ជាទីស្រឡាញ់របស់ខ្លួន គិតខ្លីបែបនេះឡើយ ហើយប្រពន្ធរបស់ជនរងគ្រោះយំៗ ទាល់តែសន្លប់ ហើយក៏ត្រូវបានគេនាំគ្រៀកបញ្ជូនទៅពេទ្យដើម្បីសង្គ្រោះផងដែរ។

ក្រោយពីមានហេតុការណ៍ដូច្នេះហើយ កម្លាំងមូលដ្ឋាន បានចុះមកគ្រប់គ្រងកន្លែងកើតហេតុ និងរាយការណ៍ទៅផ្នែកជំនាញកោសល្យវិច័យចុះមកពិនិត្យ និងបញ្ជូនទៅតម្កល់នៅសាល នៃមន្ទីរពេទ្យលាងឈាមជាស៊ី ដើម្បីប្រគល់ជូនក្រុមគ្រួសារសម្រេចធ្វើបុណ្យតាមប្រពៃណី៕