ខេត្តរតនគិរី(កម្ពុជា) និងខេត្តអត្តពឺ(ឡាវ) បន្តពង្រឹងភាពទំនាក់ទំនង និងកិច្ចសហប្រតិបត្តិការរវាងខេត្តជាប់ព្រំដែនទាំងពីរ

រតនគិរី ៖ លោក ថង សាវុន អភិបាលខេត្តរតនគិរី បានអញ្ជើញជាអធិបតីភាពក្នុងប្រជុំទ្វេភាគី ជាមួយប្រតិភូខេត្តអត្តពឺ របស់ឡាវ ដឹកនាំដោយ លោក ឡេត សៃញ៉ាផន អភិបាលខេត្តអត្តពឺ ដើម្បីពង្រឹងភាពទំនាក់ទំនង និងកិច្ចសហប្រតិបត្តិការ រវាងខេត្តរតនគិរី និងខេត្តអត្តពឺ ដែលជាខេត្តជាប់ព្រំប្រទល់ជាមួយគ្នា។ កិច្ចប្រជុំបានប្រារព្ធធ្វើឡើងនៅសាលាខេត្តរតនគិរី នាព្រឹកថ្ងៃទី០១ ខែមីនា ឆ្នាំ២០១៩នេះ។

ក្នុងកិច្ចប្រជុំនេះថ្នាក់ដឹកនាំខេត្តទាំងពីរបានលើកឡើង និងវាយតម្លៃខ្ពស់ចំពោះកិច្ចខិតខំប្រឹងប្រែងកិច្ចសហប្រតិបត្តិការ ផ្លាស់ប្ដូរបទពិសោធន៍ និងព័ត៌មានទៅវិញទៅមកក្នុងឋានៈខេត្តជាប់ភូមិផងរបងជាមួយគ្នា សំដៅដោះស្រាយបញ្ហារួមគ្នា និងពង្រឹងទំនាក់ទំនង នៃខេត្តទាំងពីរ កាន់តែប្រសើរឡើង។

ទន្ទឹមគ្នានេះផងដែរ ថ្នាក់ដឹកនាំខេត្តទាំងពីរបានអះអាងឡើងវិញក្នុងការប្តេជ្ញាចិត្តធ្វើការរួមគ្នាឲ្យកាន់តែជិតស្និទ្ធថែមទៀត លើគ្រប់វិស័យ ពិសេសអនុវត្តនូវសេចក្ដីថ្លែងការណ៍រួមកិច្ចប្រជុំកំពូលតំបន់ត្រីកោណអភិវឌ្ឍន៍(CLV) បន្តពង្រឹង និងបង្កលក្ខណៈងាយស្រួលដល់សមត្ថកិច្ច នៃខេត្តទាំងពីរក្នុងការងារការពារបរិស្ថានព្រំដែនឧទ្យានជាតិវីរៈជ័យ ខេត្តរតនគិរី និងដុងអាំផាម ខេត្តអត្តពឺ បន្តសហការទប់ស្កាត់ និងបង្ក្រាបរាល់សកម្មភាពបង្កភេរវកម្ម និងឧក្រិដ្ឋកម្មឆ្លងដែន បញ្ហាពាក់ព័ន្ធគ្រឿងញៀន ការជួញដូរមនុស្ស អាវុធជាតិផ្ទុះ ទំនិញខុសច្បាប់ និងការលួចកាប់ឈើលក់ជាដើម។

ជាមួយគ្នានេះ ថ្នាក់ដឹកនាំខេត្តទាំងពីរ ប្ដេជ្ញាឯកភាពគ្នាគោរពបូរណភាពទឹកដី ចូលរួមសហការជួយដល់គណៈកម្មការចម្រុះក្នុងការបោះបង្គោល ការត្រួតពិនិត្យ ការថែរក្សាបង្គោលខណ្ឌសីមា ធានាបាននូវព្រំដែនមួយមានសន្តិភាព មិត្តភាព និងការអភិវឌ្ឍ ព្រមទាំងបន្តលើកគម្រោងស្នើសុំរដ្ឋាភិបាលប្រទេសទាំងពីរ លើការអនុម័តការសាងសង់ផ្លូវភ្ជាប់ខេត្តទាំងពីរ ស្របតាមស្មារតីដែលបានលើកឡើងក្នុងកិច្ចប្រជុំCLV កាលពីពេលកន្លងទៅក្នុងខេត្តសៀមរាប និងការស្នើសុំបើកច្រកទ្វារខេត្តទាំងពីរដើម្បីសម្រួលដល់ប្រជាពលរដ្ឋក្នុងការទំនាក់ទំនង សួរសុខទុក្ខបងប្អូន វិស័យសុខាភិបាល ពិសេស គឺការដោះដូរផ្នែកសេដ្ឋកិច្ចទៅវិញទៅមក។

ប្រតិភូខេត្តទាំងពីរ ក៏បានជំរុញឲ្យមានការរៀបចំតាំងពិព័ណ៌ពាណិជ្ជកម្មប្ដូរវេនគ្នា ដើម្បីលើកកម្ពស់ផលិតផល ការផ្លាស់ប្ដូរពាណិជ្ជកម្ម និងការផ្លាស់ប្ដូរព័ត៌មានគ្នា ក្នុងរបបគំហើញថ្មីៗលើវិស័យពាណិជ្ជកម្ម ដោយឡែក ពាក់ព័ន្ធវិស័យអប់រំបន្តពង្រឹងសហប្រតិបត្តិការ ដើម្បីបណ្ដុះបណ្ដាលធនធានមនុស្ស ដោយប្រគល់តួនាទីនេះឲ្យមន្ទីរអប់រំ យុវជន និងកីឡា ក្នុងការរៀបចំនិស្សិតចំនួន ០៣រូប ក្នុងមួយឆ្នាំទៅសិក្សាលើមុខវិទ្យាភាសាខ្មែរ-ឡាវ។

ព្រមជាមួយគ្នានេះ អាជ្ញាធរខេត្តរតនគិរី បានប្ដេជ្ញាបន្តសហការផ្តល់ព័ត៌មានគ្នាទៅវិញទៅមកឲ្យបានទាន់ពេលវេលា ពាក់ព័ន្ធទៅនឹងជម្ងឺរាតត្បាតលើមនុស្ស សត្វនៅតាមព្រំដែន បន្តជំរុញអ្នកវិនិយោគលើវិស័យពាណិជ្ជកម្ម ថាមពល រ៉ែ អគ្គិសនី ទេសចរណ៍ និងផ្លាស់ប្ដូរវិស័យវប្បធម៌ សិល្បៈ អប់រំ យុវជន និងកីឡា និងបានឯកភាពបន្តរៀបចំកិច្ចប្រជុំដោយធ្វើម្ចាស់ផ្ទះប្តូរវេនគ្នាក្នុងរយៈពេល ២ឆ្នាំម្តង។

កិច្ចប្រជុំនេះ បានបញ្ចប់ទៅដោយមានការចុះហត្ថលេខាលើកំណត់ហេតុរួមមួយ ប្រកបដោយបរិយាកាសរីករាយ និងស្និទ្ធស្នាលបំផុតរវាងប្រតិភូថ្នាក់ដឹកនាំខេត្តទាំងពីរ៕