កីឡាករ​ខ្មែរ​-​បារាំង ម្នាក់​របស់​ក្លិប​ភ្នំពេញ​ក្រោ​ន រំពឹង​ជាប់​ជម្រើសជាតិ​កម្ពុជា ក្រោយ​ធ្វើដំណើរ​មក​ប្រកប​អាជីព​នៅ​រាជធានី​ភ្នំពេញ

កីឡាករ Thomas Sam Sochenn ខ្សែបម្រើ​ថ្មី​របស់​ក្លិប​បាល់ទាត់​ភ្នំពេញ​ក្រោ​ន​ដែលជា​កូន​ខ្មែរ​-​បារាំង បានសម្រេច​ធ្វើដំណើរ​មកកាន់​រាជធានី​ភ្នំពេញ កាលពីពេល​ថ្មីៗ ហើយ​តាំងចិត្ត​បង្ហាញ​សមត្ថភាព​ឲ្យ​បាន​ល្អ​នៅលើ​ទីលាន ខណៈ​រូបគេ​រំពឹង​ជាប់​កៅអី​ក្នុង​ក្រុម​ជម្រើសជាតិ​កម្ពុជា នៅពេល​ខាង​មុខជា​លើកដំបូង​ក្នុង​អាជីព​របស់ខ្លួន​។

កីឡាករ​វ័យ​២៥​ឆ្នាំ​រូប​នេះ​ ធ្លាប់​មាន​បទពិសោធន៍​មួយចំនួន​នៅ​លី​គ​ទី​បី​នៃ​ប្រទេស​បារាំង មុននឹង​សម្រេចចិត្ត​មក​ភ្នំពេញ​ក្រោ​ន​។ ក្លិប​ភ្នំពេញ​ក្រោ​ន បាន​ស្រង់​សម្តី​នៅលើ​វិ​ប​សាយ​ផ្លូវការ​ថា​ខ្លួន​មាន​ក្តី​ស្រ​ម៉ៃ​មួយ​គឺ​ចង់​ចូលរួម​ជាមួយ​ក្រុម​ជម្រើសជាតិ​កម្ពុជា ដើម្បី​លេង​ក្នុង​ការប្រកួត​អន្តរជាតិ​នានា​។​Thomas Sam Sochenn បាន​ថា​៖ « ខ្ញុំ​ចង់​ចូលរួម​ជាមួយ​ក្រុម​ជម្រើសជាតិ​កម្ពុជា ព្រោះ​វា​គឺជា​ក្តី​ស្រ​ម៉ៃ​មួយ​ក្នុងចំណោម​ក្តី​ស្រ​ម៉ៃ​ដទៃ​ទៀត​របស់ខ្ញុំ ប៉ុន្តែ​អ្វី​ដែល​សំខាន់​សម្រាប់​ខ្ញុំ​នៅពេលនេះ​គឺ​ត្រូវ​បង្ហាញ​ទម្រង់​លេង​ឲ្យ​បានល្អ​ដើម្បី​លោកគ្រូ​បង្វឹក Leonardo សប្បាយចិត្ត​ជាមួយ​ការលេង​របស់ខ្ញុំ​»​។



នេះ​ជា​លើកដំបូង​ហើយ​ដែល​ខ្សែបម្រើ​កណ្តាល​រូប​នេះ ធ្វើដំណើរ​មកកាន់​ប្រទេស​កម្ពុជា ហើយ​រូបគេ​ក៏បាន​សម្រេចចិត្ត​ចូលរួម​ជាមួយ​ភ្នំពេញ​ក្រោ​ន​តែម្តង ក្លិប​ជើងឯក​៦​សម័យកាល​មួយ​នេះ​នៅតែ​សង្ឃឹមថា​កីឡាករ​មកពី​ទ្វីបអឺរ៉ុប​ខាងលើ នឹង​បង្ហាញ​ទម្រង់​លេង​យ៉ាង​ល្អជា​មួយក្រុម ដើម្បី​បន្តទៅ​ចាប់​ក្តី​ស្រ​ម៉ៃ​ក្នុង​កៅអី​ក្រុម​ជម្រើសជាតិ​របស់​ខ្លួន​។ មុន​មក​កម្ពុជា រូបគេ​បាន​ចាប់​ផ្តើម​លេង​បាល់ទាត់​នៅ​ប្រទេស​បារាំង ជាមួយ​ក្រុម Olympique Marseille រយៈពេល​៣​ឆ្នាំ គឺ​ចាប់ពី​ឆ្នាំ​២០១០ ដល់​២០១៤ ហើយ​បាន​បន្ត​លេង​នៅ​ក្លិប Marignane Gignac F.C ដែលជា​សមាជិក លី​គ​ទី​បី​ប្រទេស​បារាំង​រយៈពេល​២​ឆ្នាំ គឺ​ចាប់ពី​ឆ្នាំ​២០១៦ ដល់​២០១៨​។

នេះ​ជា​ការ​បន្ថែម​សមាជិក​ថ្មី​របស់​ក្លិប​ភ្នំពេញ​ក្រោ​ន ដើម្បី​ពង្រឹង​បច្ចេកទេស​ក្រុម​មុន​រដូវ​កាល​ឆ្នាំ​២០១៩​មកដល់ ខណៈ​កាលពី​រដូវ​កាល​ឆ្នាំ​២០១៨ កន្លង​ទៅក្នុង​ពានរង្វាន់​លី​គ​កំពូល​កម្ពុជា ក្រុម​ភ្នំពេញ​ក្រោ​ន រក្សា​ចំណាត់ថ្នាក់​លេខ​៥ ក្នុងចំណោម​សមាជិក​ទាំង​១២ ក្រោយ​ប្រកួត​បាន​២២​លើក ឈ្នះ​បាន​១១​លើក ស្មើគ្នា​៣​លើក​និង​ចាញ់​៨​លើក​មាន​៣៦​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើ​ល រហូតដល់​២០​ពិន្ទុ​។ ភ្នំពេញ​ក្រោ​ន​ទា​ត់ប​ញ្ជូ​ល​ទី​គូប្រកួត​បាន​៤១​គ្រាប់ ហើយ​គេ​ទាត់​ចូល​វិញ​ចំនួន​៣៣​គ្រាប់​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup)​វិញ​ក្រុម​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយ​បាល់​ប៉េ​ណាំង​ទី​កាត់សេចក្តី​៤​ទល់​៣ ក្រោយ​ប្រកួត​ស្មើគ្នា​ទាំង​២​ជើង​៤​ទល់​៤៕

Source: Kampuchea Thmey Daily