អាជ្ញាធរ និងសមត្ថកិច្ចខណ្ឌទួលគោក បន្តសកម្មភាពចុះចាប់រថយន្តធំៗចូលក្រុងពេលថ្ងៃ បាន៣គ្រឿងទៀត

ភ្នំពេញ ៖ អនុវត្តតាមការណែនាំពី លោក ឃួង ស្រេង អភិបាលរាជធានីភ្នំពេញ គណៈបញ្ជាការឯកភាពខណ្ឌទួលគោក ដឹកនាំដោយ លោក ឯក ឃុនដឿន ជាប្រធាន បានបន្តប្រតិបត្តិការចុះចាប់រថយន្តធុនធំចូលក្រុងពេលថ្ងៃ បានចំនួន០៣គ្រឿងបន្តបន្ទាប់គ្នា ដើម្បីធ្វើការផាកពិន័យទៅតាមច្បាប់។

ប្រតិបត្តិការនេះបានធ្វើឡើង នាព្រឹកថ្ងៃព្រឹកថ្ងៃទី០១-០២ ខែមីនា ឆ្នាំ២០១៩ នៅតាមបណ្ដោយផ្លូវមុនីរ៉េតនិងផ្លូវលេខ២៤៥ កែងផ្លូវលេខ១៨២ ក្នុងមូលដ្ឋានខណ្ឌទួលគោក។

មន្ត្រីប៉ូលិសខណ្ឌទួលគោកបានបញ្ជាក់ឲ្យដឹងថា នៅព្រឹកថ្ងៃសៅរ៍ ១១ រោច ខែមាឃ ឆ្នាំច សំរឹទ្ធស័កព-ស ២៥៦ ត្រូវនឹងថ្ងៃទី២ ខែមីនា ឆ្នាំ២០១៩នេះ ដោយមានបញ្ជាពីលោកឯក ឃុន ដឿន អភិបាលខណ្ឌទួលគោក និងលោកវរសេនីយ៍ទោ សុខ ហេង អធិការនគរបាលខណ្ឌទួលគោក កម្លាំងចម្រុះរបស់គណៈបញ្ជាការឯកភាពរដ្ឋបាលខណ្ឌទួលគោក បានដាក់គោលដៅត្រួតពិនិត្យទប់ស្កាត់រថយន្តចេញ និងចូលខុសពេលម៉ោង ត្រង់ចំណុចផ្លូវលេខ២៤៥ កែងផ្លូវលេខ១៨២ ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ដឹកនាំដោយលោកវរសេនីយ៍ទោ តី សុវណ្ណារ៉េត អធិការរងនគរបាលខណ្ឌទួលគោក ដោយប្រើប្រាស់កម្លាំងសរុបរួមចំនួន៩នាក់ ហើយជាលទ្ធផលកិច្ចប្រតិបត្តិការឃាត់បានរថយន្តធំដឹកដីបានចំនួន១គ្រឿង។

ដោយឡែក នៅព្រឹកថ្ងៃទី១ ខែមីនា កម្លាំងសណ្ដាប់ធ្នាប់ខណ្ឌទួលគោកបានឃាត់រថយន្តដឹកទំនិញធំចំនួន២គ្រឿង ចូលក្រុងពេលថ្ងៃដែរ។

លោក ឯក ឃុនដឿន ក្នុងនាមជាប្រធានគណៈបញ្ជាការឯកភាពខណ្ឌទួលគោក តែងបានណែនាំឲ្យកម្លាំងក្រោមឱវាទទាំងអស់ចំណុះឲ្យរដ្ឋបាលខណ្ឌទួលគោក ត្រូវបន្តសកម្មភាព ចុះចាប់រថយន្តធុនធំដឹកទំនិញចូលក្រុងពេលថ្ងៃ ខុសម៉ោង ខុសពេល ឲ្យបានជាប្រចាំ ដើម្បីឲ្យពួកគាត់គោរពច្បាប់ អនុវត្តទៅតាមការណែនាំរបស់អាជ្ញាធររាជធានីភ្នំពេញ សំដៅធ្វើយ៉ាងណាឲ្យរាជធានីភ្នំពេញមានសណ្ដាប់ធ្នាប់របៀបរៀបរយល្អ និងដើម្បីកាត់បន្ថយនូវគ្រោះថ្នាក់ និងការកកស្ទះចរាចរណ៍ដែលធ្លាប់តែកើតមានជារឿយៗ បណ្ដាលមកពីរថយន្ដធំៗយ៉ាងនេះ។

បច្ចុប្បន្ន រថយន្តល្មើសទាំង៣គ្រឿងខាងលើនេះ សមត្ថកិច្ចបញ្ជូនមករក្សាទុកនៅក្នុងទីតាំងមជ្ឈមណ្ឌលម៉ុងឌីយ៉ាល់ ដើម្បីចាត់ការទៅតាមច្បាប់៕