ចេញដំណើរមែនទែនហើយអភិក្រមទាំង៥ ៖ អភិបាលរងខេត្តព្រះសីហនុ២នាក់ ត្រូវបានបញ្ចប់តួនាទី ក្រោយប្រព្រឹត្តកំហុសមិនអាចអនុគ្រោះបាន

ភ្នំពេញ ៖ អភិបាលរងខេត្តព្រះសីហនុចំនួន២រូប គឺលោក លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ត្រូវបានបញ្ចប់តំណែងហើយ តាមរយៈអនុក្រឹត្យចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី០១ ខែមីនា ឆ្នាំ២០១៩។

ការសមរេចបញ្ចប់តំណែងអភិបាលរងខេត្តព្រះសីហនុចំនួន២រូបខាងលើនេះ ត្រូវបានគេមើលឃើញថា ក្រោយពីមន្ត្រីទាំងពីរូបនេះ បានដឹកនាំកម្លាំងចុះអនុវត្តសាលដីកា លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដើម្បីយកដីឲ្យលោកឧកញ៉ា ស៊ីវ គង់ទ្រីវ ហើយពេលនោះ បានយកកម្លាំងយោធាចូលរួម ហើយបង្កជាអំពើហិង្សារវាងកម្លាំងចម្រុះ ជាមួយប្រជាពលរដ្ឋបណ្តាលឲ្យមានរបួសធ្ងន់ និងស្រាល។

ទាក់ទងបញ្ហានេះ នៅក្នុងកិច្ចប្រជុំប្រចាំឆមាសរបស់ឧត្តមក្រុមប្រឹក្សាពិគ្រោះ និងផ្តល់យោបល់ កាលពីថ្ងៃទី២៨ ខែកុម្ភៈ ឆ្នាំ២០១៩ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចេញបញ្ជាឲ្យធ្វើការសិក្សា ដកមេយោធាខេត្តព្រះសីហនុ លោក សាវិន វិបុល និងអភិបាលរងខេត្ត២នាក់ទៀត ហើយសម្តេចតេជោ ក៏បានបញ្ជាយ៉ាងដាច់ណាត់ មិនអនុញ្ញាតឲ្យយកកងទ័ព ដែលមិនមែនជាមន្ត្រីអនុវត្តច្បាប់ ទៅអនុវត្តសាលដីកាឡើយ។

ពាក់ព័ន្ធបញ្ហាជម្លោះដីធ្លីនៅខេត្តព្រះសីហនុនេះដែរ សម្ដេចតេជោនាយករដ្ឋមន្ត្រី បានសម្ដែងការមិនពេញចិត្តចំពោះហេតុការណ៍ ដែលប្រើកងទ័ពទៅបង្ក្រាបការរំលោភដីធ្លី ហើយសម្តេចបានស្នើឲ្យសម្តេចពិជ័យសេនា ទៀ បាញ់ ពិនិត្យទៅលើករណីប្រធានយោធាខេត្តព្រះសីហនុ ប្រសិនជាមានការខុសឆ្គង និងវិន័យនោះ ស្នើឲ្យមានវិធានការទៅតាមផ្លូវច្បាប់។ ជាមួយនេះ សម្តេចក៏បានស្នើឲ្យមានការរឹបអូសយកដីទំនាស់នោះ ត្រឡប់មកវិញ ព្រោះវាជាដីរបស់រដ្ឋ ដើម្បីរក្សាទុកធ្វើជាដីសម្បទានសម្រាប់ផ្តល់ឲ្យប្រជាពលរដ្ឋដែលខ្វះខាតដី។ សម្តេចក៏បានបញ្ជាយ៉ាងម៉ឺងម៉ាត់ មិនឲ្យអាជ្ញាធរលូកដៃចូលក្នុងការបែងចែកដីសម្បទានសង្គមកិច្ច ដោយដាក់ឈ្មោះ ទៅទទួលយកដីសម្បទានទាំងនោះ។

សូមបញ្ជាក់ថា កាលពីថ្ងៃទី២៤ ខែមករា ឆ្នាំ២០១៩ មានមានអំពើហិង្សាមួយបានកើតឡើង ខណៈពេលអាជ្ញាធរ និងព្រះរាជអាជ្ញាបានចុះអនុវត្តសាលដីកា លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដែលការអនុវត្តពេលនោះ ត្រូវបានមន្ត្រីអះអាងថា មានកម្លាំងយោធាចូលរួមយ៉ាងច្រើនផងដែរ ហើយសកម្មភាពបង្ក្រាបដោយហិង្សា របស់កងកម្លាំងចម្រុះខេត្តព្រះសីហនុ នាពេលនោះ គឺបានកើតឡើង បន្ទាប់ពីក្រុមប្រជាពលរដ្ឋ បានប្រមូលផ្តុំគ្នាតវ៉ាដុតកង់ឡាន គប់ដុំថ្ម និងគប់ដបសាំងទៅលើកម្លាំងសមត្ថកិច្ច ដែលឲ្យចុះទៅអនុវត្តសាលដីការបស់តុលាការកំពូល ក្រោមការបញ្ជាផ្ទាល់អភិបាលរងខេត្ត គឺលោក ផៃ ប៊ុនវណ្ណៈ និងក្រោមការសម្របសម្រួលពីលោកព្រះរាជអាជ្ញារងអមសាលដំបូងខេត្ត គឺលោក ហួត វិចត្រ។

ពាក់ព័ន្ធនឹងគ្រាប់កាំភ្លើងបាញ់ត្រូវមនុស្សនេះ លោក យន្ត មីន អភិបាលខេត្តព្រះសីហនុ ធ្លាប់បានឆ្លើយដាក់បន្ទុកទៅភាគីទី៣ ដែលមិនដឹងជានរណា និងនៅទីណាពិតប្រាកដ ចំណែកអភិបាលរងរបស់លោកវិញ គឺលោក ផៃ ប៊ុនវណ្ណៈ បានអះអាងថា គ្រាប់កាំភ្លើងនេះបានធ្លាក់ពីលើមេឃ ហើយមកត្រូវមនុស្ស។ ប្រតិបត្តិការរឹបអូសដីរដ្ឋពីរាស្ត្រ យកទៅឲ្យឧកញ៉ា ស៊ីវ គង់ទ្រីវ នេះ អ្នកតាមដានបានសង្កេតឃើញថា គឺលោក សៀង សុខ ព្រះរាជអាជ្ញាសាលាដំបូងខេត្តព្រះសីហនុ ជាអ្នកចេញមុខដឹកនាំកម្លាំងចម្រុះ។

ករណីតវ៉ាបិទផ្លូវ និងប្រឈមមុខដាក់គ្នារវាងប្រជាពលរដ្ឋ និងក្រុមសមត្ថកិច្ចខេត្តព្រះសីហនុនេះ បានកើតឡើងម្តងរួចមកហើយ កាលពីព្រឹកថ្ងៃទី១៧ ខែមករា ឆ្នាំ២០១៩ ដែលពេលនោះប្រជាពលរដ្ឋប្រមាណ២០០នាក់ បានប្រមូលផ្តុំគ្នាតវ៉ាប្រឆាំងមន្ត្រីសុរិយោដីមកពីក្រសួងរៀបចំដែនដី និងមន្ត្រីពាក់ព័ន្ធនៅក្នុងខេត្ត រួមមានមន្ត្រីកងរាជអាវុធហត្ថ និងនគរបាលខេត្តជាច្រើននាក់ ប្រដាប់ដោយអាវុធគ្រប់ដៃ ដឹកនាំដោយលោក ផៃ ប៊ុនវណ្ណៈ អភិបាលរងខេត្តព្រះសីហនុ បានព្យាយាមវាស់វែងដី ដើម្បីធ្វើប្លង់កម្មសិទ្ធិឲ្យទៅលោកស្រីឧកញ៉ា ហុង សួន និងឧកញ៉ា ស៊ីវ គង់ទ្រីវ ដោយសំអាងថា ដីតំបន់ដែលប្រជាពលរដ្ឋកំពុងរស់នៅនេះ គឺជាដីស្ថិតនៅក្នុងប្លង់កម្មសិទ្ធិឯកជន។ នាពេលនោះ ផ្ទះសម្បែងរាប់រយខ្នង សង់ពីឈើ និងសង់ពីបេតុង រួមទាំងរបងព្រំដីធ្វើពីឈើ និងបេតុង រាប់សិបកន្លែង ត្រូវបានអាជ្ញាធរខេត្តព្រះសីហនុ ប្រើគ្រឿងកាយរុញបំផ្លាញចោលរាបដល់ដី ខណៈប្រជាពលរដ្ឋជាម្ចាស់ផ្ទះស្រែកទ្រហោយំទ្រហឹងអឺងកង រីឯអ្នកខ្លះទៀតរត់ចោលភូមិដ្ឋាន ដោយសារខ្លាចអាជ្ញាធរខេត្តចាប់ដាក់គុក។ ប្រជាពលរដ្ឋរងគ្រោះ នៅតំបន់ពយម៉ាចូវ បានអះអាងប្រាប់អ្នកសារព័ត៌មានកាលពីថ្ងៃទី២៩ ខែមករា ឆ្នាំ២០១៩ ថា ពួកគាត់កំពុងរស់នៅលើដីសាធារណៈរបស់រដ្ឋ គឺមិនមែនរស់នៅលើដីកម្មសិទ្ធិបុគ្គលណាម្នាក់ឡើយ ដូច្នេះប្រសិនបើរដ្ឋបាលខេត្តព្រះសីហនុ បន្តបណ្តេញពួកគាត់ដោយហិង្សាម្តងទៀត ដើម្បីយកដីប្រគល់ទៅឲ្យលោកស្រីឧកញ៉ា ហុង សួន ភរិយារបស់លោកឧកញ៉ា ស៊ីវ គង់ទ្រីវ ពួកគាត់មិនព្រមចេញឡើយ ព្រោះគាត់មិនមែនជាគូវិវាទនៅក្នុងសាលដីការបស់តុលាការកំពូលឡើយ ដោយបន្តបោះតង់ស្នាក់នៅជាបន្តទៀត ស្របពេលដីមានទំហំធំៗនៅក្បែរនេះ សុទ្ធសឹងជាកម្មសិទ្ធិរបស់ឈ្មួញមានលុយ និងដីខ្លះជាកម្មសិទ្ធិរបស់មន្ត្រីមានអំណាច អាចបន្តកាន់កាប់បាន ចំណែកពួកគាត់ គឺជាជនរងគ្រោះ។

ករណីនៅខេត្តព្រះសីហនុនេះ មន្ត្រីកងរាជអាវុធហត្ថខេត្តព្រះសីហនុម្នាក់ ត្រូវបានបញ្ឈប់ពីការងារ និងបណ្តេញចេញពីក្របខណ្ឌ កងរាជអាវុធហត្ថជាតិ ក្រោយពីគណៈកម្មការចំពោះកិច្ចរកឃើញថា បានប្រើអំពើហិង្សាខុសវិន័យធ្ងន់ធ្ងរ ដោយធាក់ទ្រូងបុរសម្នាក់ ជាអ្នកតវ៉ាជំទាស់នឹងការអនុវត្តសាលដីកាតុលាការកំពូល ដែលសម្រេចផ្តល់ដីទំហំជាង៧០ហិកតា ស្ថិតនៅចំណុចពយម៉ាចូវ ភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ ឲ្យលោកឧកញ៉ា ស៊ីវ គង់ទ្រីវ ខណៈប្រជាពលរដ្ឋរាប់រយគ្រួសារកំពុងតែរស់នៅ និងអាស្រ័យផល នេះបើតាមការបញ្ជាក់ពីលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធលើផ្ទៃប្រទេស៕