បន្ទាយមានជ័យ ៖ នៅព្រឹកថ្ងៃទី១ ខែមីនា ឆ្នាំ២០១៩ នៅក្នុងសាលប្រជុំស្នងការនគរបាលខេត្តបន្ទាយមានជ័យ លោកឧត្ដមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានធ្វើការដាស់តឿនដល់មន្ត្រីនគរបាលទាំងអស់ ត្រូវពង្រឹងសមត្ថភាពទប់ស្កាត់ បង្ក្រាប ខណៈបទល្មើសកើនឡើង។
លោក អាត់ ខែម បានលើកឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែកុម្ភៈ និងថ្ងៃទី១ខែមីនា ឆ្នាំ២០១៩ ដែលមានការចូលរួមពីកម្លាំងនគរបាលក្រោមបង្គាប់ប្រមាណជិត៥០០នាក់។
លោកឧត្ដមសេនីយ៍ទោស្នងការ បានដាក់បទបញ្ជាដល់កម្លាំងក្រោមបង្គាប់ត្រូវពង្រឹងវិន័យកងកម្លាំងនគរបាលជាតិឲ្យបានម៉ឺងម៉ាត់ និងអនុវត្តការងារដឹកនាំការពារសន្តិសុខឲ្យមានសុវត្ថិភាពប្រសើរឡើងខ្ពស់ ខណៈដែលខេត្តបន្ទាយមានជ័យរយៈពេលចុងក្រោយកើតមានបទល្មើសកើនឡើង។
យោងតាមរបាយការណ៍ប្រចាំខែកុម្ភៈ ឆ្នាំ២០១៩ របស់ស្នងការដ្ឋាននគរបាលខេត្តបន្ទាយមានជ័យបង្ហាញឲ្យដឹងថា បទល្មើសព្រហ្មទណ្ឌកើតឡើង ៦លើក លើ៤លើក កើនឡើង២លើក ចេញប្រតិបត្តិការបង្ក្រាប៥លើក ឃាត់ខ្លួនជនសង្ស័យ៦នាក់ បទល្មើសគ្រឿងញៀនកើតឡើង៣៤លើកលើ២៧លើក កើន៧លើក បង្ក្រាបឃាត់ខ្លួនជនសង្ស័យគ្រឿងញៀន១២៤នាក់ ក្នុងនោះស្រី៥នាក់ជាដើម។
លោក អាត់ ខែម ក៏បានជំរុញឲ្យកម្លាំងនគរបាលការិយាល័យជំនាញ និងកម្លាំងនគរបាលនៅតាមបណ្តា អធិការដ្ឋានស្រុកក្រុងទាំង៩ បន្តស្រាវជ្រាវស៊ើបអង្កេត ស្វែងរកចាប់ខ្លួនមុខមុខសញ្ញា ជនសង្ស័យនៅសេសសល់ ដែលប្រព្រឹត្តបទល្មើសដែលគេចខ្លួន ត្រូវតាមចាប់យកមកផ្ដន្ទាទោសតាមផ្លូវច្បាប់ឲ្យបាន ដោយមិនត្រូវឲ្យរួចខ្លួនបានឡើយ។
កន្លងមក កម្លាំងនគរបាលខេត្តបន្ទាយមានជ័យ បានបំបែកសំណុំរឿងបទល្មើស នៅពេលបទល្មើសកើតឡើង គឺកម្លាំងនគរបាលបានចេញប្រតិបត្តិការបង្ក្រាបចាប់ជនល្មើសយកមកផ្ដន្ទាទោសតាមផ្លូវ នេះ ជាមោទនភាព និងមានការគាំទ្រពីប្រជាពលរដ្ឋ។
ជាក់ស្ដែង កាលពីកន្លងទៅថ្មីៗនេះ នៅស្រុកថ្មពួក មានអំពើឃាតកម្មព្រៃផ្សៃកើតចេញពីភ្លើងប្រច័ណ្ឌ នៃរឿងស្នេហាត្រីកោណ ដែលឃាតកជាបងប្អូនបង្កើត២នាក់ បានកាប់សម្លាប់ រួច យក កង់គោយន្ត និងកង់ត្រាក់ទ័រដុតបុរសជនរងគ្រោះ ដែលស្រឡាញ់ស្ត្រីជាអតីតប្រពន្ធរបស់ប្អូនប្រុសខ្លួននោះ ត្រូវបាននគរបាលព្រហ្មទណ្ឌខេត្ត ស្រុក ប៉ុស្តិ៍បង្ក្រាបបានទាន់ក្តៅ។ ករណីនេះមហាជន ប្រជាជនចាប់អារម្មណ៍ និងជឿជាក់កម្លាំងនគរបាលខ្លាំងណាស់៕
Source: Kampuchea Thmey Daily
0 Comments