មន្ត្រី​អាមេរិក​ ៖​ អាមេរិក​ និង​កូរ៉េខាងត្បូង​ នឹង​បញ្ឈប់​ការធ្វើ​សមយុទ្ធ​យោធា​ដ៏​សំខាន់

មន្ត្រី​អាមេរិក​ម្នាក់​បាន​ប្រាប់​ AFP កាលពី​ថ្ងៃ​សុក្រ​ថា យោធា​អាមេរិក​ និង​កូរ៉េខាងត្បូង​គ្រោង​នឹង​បញ្ឈប់​ការ​ធ្វើ​សម​យុទ្ធ​យោធា​ទ្រង់ទ្រាយ​ធំ​ប្រចាំ​ឆ្នាំ​ ខណៈ​ដែល​លោក​ប្រធានាធិបតី ដូ​ណា​ល់ ត្រាំ ខិតខំ​ពង្រឹង​ទំនាក់ទំនង​ជាមួយ​ប្រទេស​កូរ៉េខាងជើង។

មតិយោបល់​ពី​មន្ត្រី​ដែល​សុំ​មិន​បញ្ចេញ​ឈ្មោះ​រូបនេះ​បានធ្វើ​ឡើង​ភ្លាមៗ​បន្ទាប់ពី​ការបញ្ចប់​កិច្ចប្រជុំ​កំពូល​លើក​ទី​ពីរ​របស់លោក​ត្រាំ​ជាមួយ​មេដឹកនាំ​កូរ៉េខាងជើង​លោក​គីម​ជុង​អ៊ុន​នៅ​ទីក្រុង​ហាណូយ​ដែល​បានបញ្ចប់​ទៅដោយ​គ្មាន​កិច្ចព្រមព្រៀង​ផ្លូវការ​មួយ​ទេ​ប៉ុន្តែ​ភាគី​ទាំងពីរ​បានលើកឡើង​ថា​ពួកគេ​នឹង​បន្ត​ពិភាក្សាគ្នា។

ប៉ុន្តែ​នៅក្នុង​ប្រទេស​កូរ៉េខាងត្បូង មន្ដ្រី​រដ្ឋាភិបាល​ម្នាក់​បាន​លើកឡើងថា សមយុទ្ធ​នេះ​នឹង​ត្រូវបាន​កាត់បន្ថយ​ជាជាង​ការបោះបង់ចោល​ទាំងស្រុង​។​

មន្ត្រី​រូបនោះ​បាន​ប្រាប់ AFP ថា “​ប្រសិនបើ​យើង​កំណត់​ទំហំ​នៃ​សមយុទ្ធ​នេះ​ដោយ​ត្រឹមតែ​ចំនួន​ទាហាន​ប៉ុណ្ណោះ​នោះ ការធ្វើ​សមយុទ្ធ​នេះ​ទំនង​ជាមាន​ទំហំ​តូច​ជាង​មុន​”​។​

មន្ត្រី​ដដែល​បាន​បន្ថែមថា ភាគី​ទាំងពីរ​នៅតែ​កំពុង​ពិភាក្សាគ្នា​អំពី​អត្ថន័យ​នៃ​សេចក្តីថ្លែងការណ៍​រួមមួយ​ដែល​ត្រូវបាន​គេ​រំពឹងថា​នឹង​បញ្ចេញ​នៅក្នុង​រយៈពេល​ប៉ុន្មាន​ថ្ងៃ​ខាងមុខនេះ​។​

ដោយ​ដកស្រង់​ប្រភពពី​មន្ត្រី​ការពារជាតិ​អាមេរិក​មិន​បញ្ចេញ​ឈ្មោះ​ពីរ​នាក់ ទូរទស្សន៍ NBC News បាន​រាយការណ៍​ពីដំបូង​ថា សមយុទ្ធ Foal Eagle ដែលជា​ធម្មតា​ប្រព្រឹត្តទៅ​នៅ​និ​ទាឃ​រដូវ​គឺ​នឹងត្រូវ​លុបចោល​។​

Foal Eagle គឺជា​សមយុទ្ធ​ធំ​បំផុត​ក្នុងចំណោម​សមយុទ្ធ​រួមគ្នា​ជា​ទៀងទាត់​ដែល​រៀបចំឡើង​ដោយ​សម្ព័ន្ធមិត្ត​ទាំងពីរ​ហើយ​តែងតែ​បង្ក​កំហឹង​ដល់ទី​ក្រុង​ព្យុងយ៉ាង​ដែល​បាន​ថ្កោលទោស​វា​ថា​ជាការ​ត្រៀមលក្ខណៈ​សម្រាប់​ការឈ្លានពាន​។ កាលពី​អតីត សមយុទ្ធ​នេះ​មានការ​ចូលរួម​ពី​កងកម្លាំង​កូរ៉េខាងត្បូង​ចំនួន​២០០,០០០​នាក់​និង​ទាហាន​អាមេរិក​ប្រមាណ​៣០,០០០​នាក់​។​

គួរ​បញ្ជាក់ថា ចាប់តាំងពី​កិច្ចប្រជុំ​កំពូល​លើកដំបូង​របស់លោក​ត្រាំ​ជាមួយ​លោក​គីម​កាលពី​ឆ្នាំមុន​នៅ​ប្រទេស​សិង្ហ​បុរី សហរដ្ឋអាមេរិក​និង​ទីក្រុង​សេ​អ៊ូ​ល​បាន​បន្ធូរបន្ថយ​ឬ​លុបចោល​សមយុទ្ធ​យោធា​រួមគ្នា​មួយចំនួន​ហើយ​យន្តហោះ​ទម្លាក់​គ្រាប់បែក​អាមេរិក​លែង​ហោះហើរ​លើ​ប្រទេស​កូរ៉េខាងត្បូង​ទៀតហើយ​៕ AFP

​

Source: Kampuchea Thmey Daily