មន្ត្រីសុខាភិបាលអេហ្ស៊ីប បាននិយាយកាលពីថ្ងៃព្រហស្បតិ៍ថា ចំនួនអ្នកស្លាប់ ដោយសារគ្រោះថ្នាក់និងអគ្គិភ័យនៅស្ថានីយរថភ្លើងដ៏សំខាន់របស់ទីក្រុងគែរ បានកើនឡើងដល់២២នាក់ ហើយនិងបានបន្ថែមថា មនុស្ស៦នាក់ក្នុងចំណោមអ្នករងរបួសគឺស្ថិតក្នុងស្ថានភាពធ្ងន់ធ្ងរ។
កាលពីថ្ងៃពុធ រថភ្លើងមួយគ្រឿងបានជួបគ្រោះថ្នាក់ ធ្លាក់ផ្លូវនិងឆាបឆេះនៅស្ថានីយរថភ្លើង Ramses។
ក្រោយពេលនោះភ្លាមៗ ក្រសួងសុខាភិបាលបានរាយការណ៍ថា មនុស្សយ៉ាងតិច២០នាក់បានស្លាប់និង៤០នាក់រងរបួស។
ប៉ុន្មានម៉ោងបន្ទាប់ពីគ្រោះមហន្តរាយចុងក្រោយបង្អស់ដែលបានវាយប្រហារផ្លូវដែករបស់ប្រទេសអេហ្ស៊ីបមួយនេះ រដ្ឋមន្ត្រីក្រសួងដឹកជញ្ជូនបានលាលែងពីតំណែង។
រដ្ឋមន្ត្រីក្រសួងសុខាភិបាលលោក Hala Zayed បានប្រាប់ទូរទស្សន៍ជាតិកាលពីថ្ងៃព្រហស្បតិ៍ថា ចំនួនអ្នកស្លាប់បានកើនឡើងដល់២២នាក់ហើយចំនួនអ្នករងរបួសនៅពេលនេះគឺមាន៤១នាក់ខណៈ៦នាក់ស្ថិតក្នុងស្ថានភាពធ្ងន់ធ្ងរដោយទទួលរងការរលាកពី៩០ទៅ១០០ភាគរយដែលអាចបណ្តាលឲ្យស្លាប់បាន។
អាជ្ញាធរបានចាប់ខ្លួនអ្នកបើកបររថភ្លើង។ រដ្ឋអាជ្ញាបាននិយាយថា អ្នកបើកបរបានចាកចេញពីកាប៊ីនរបស់គាត់ដោយមិនបិទម៉ាស៊ីនដែលបណ្ដាលឲ្យរថភ្លើងបន្តដំណើរទៅមុខក្នុងល្បឿនពេញទំហឹងមុនពេលបុកកម្ទេចចំណត។
គួរបញ្ជាក់ថា មានឧបទ្ទវហេតុរថភ្លើងជាច្រើនលើកនៅប្រទេសអេហ្ស៊ីបក្នុងរយៈពេលប៉ុន្មានឆ្នាំថ្មីៗនេះ។ ហេតុការណ៍ដែលសម្លាប់មនុស្សច្រើនបំផុតគឺបានកើតឡើងក្នុងឆ្នាំ២០០២នៅពេល មនុស្សចំនួន៣៧៣នាក់បានស្លាប់នៅក្នុងអគ្គិភ័យមួយដែលបានឆាបឆេះរថភ្លើងមានមនុស្សជិះណែនតាន់តាប់នៅភាគខាងត្បូងរដ្ឋធានី៕ AFP
Source: Kampuchea Thmey Daily
0 Comments