ភ្នំពេញ ៖ សមត្ថកិច្ចខណ្ឌឫស្សីកែវ បានធ្វើការស្រាវជ្រាវករណីលួចរថយន្តលុចស៊ីស៤៧០ និងផ្សំគំនិតក្នុងការលួចរថយន្ត ដោយឃាត់ខ្លួនបានជនសង្ស័យជាបន្តបន្ទាប់ ចំនួន២នាក់ បន្ទាប់ពីពួកគេធ្វើសកម្មភាពលួចរថយន្ត ហើយជិះយកមកផ្លុងចោលនៅក្បែរផ្សារសាំហាន់។
ហេតុការណ៍បាត់រថយន្តនេះ នៅវេលាម៉ោង២៣និង៣០នាទី ថ្ងៃទី២៣ ខែមីនា ឆ្នាំ២០១៩ នៅចំណុចផ្ទះលេខ៨១F ក្នុងបូរីវិមានភ្នំពេញផ្លូវ២០៨ ក្រុមទី៤ សង្កាត់ច្រាំងចំរេះទី១ គឺបាត់រថយន្តលុចស៊ីស៤៧០ មួយគ្រឿង ពាក់ស្លាកលេខភ្នំពេញ 2P4037។
សមត្ថកិច្ចឲ្យដឹងថា ជនរងគ្រោះ ឈ្មោះ ខាត់ រដ្ឋា ភេទស្រី អាយុ៣១ឆ្នាំ មុខរបរកាត់ដេរ ស្នាក់នៅផ្ទះកើតហេតុខាងលើ។
ជនសង្ស័យនោះ ទី១.ឈ្មោះ ម៉ម ភារះ ភេទប្រុស អាយុ១៩ឆ្នាំ មុខរបរលក់ដូរ ស្នាក់នៅឃ្លាំងលេខ៩៣ ផ្លូវ៥៩៨ សង្កាត់ទួលសង្កែទី២ (គ្មានសារធាតុញៀន) អ្នកលួចដៃដល់។ ទី២.ជនសង្ស័យ ឈ្មោះស៊ឹម សុខមាន ភេទប្រុស អាយុ៤៩ឆ្នាំ មុខរបរលក់ដូរ ស្នាក់នៅផ្ទះលេខ2v4v ផ្លូវបេតុង ក្រុម៤ ភូមិ៤សង្កាត់ច្រាំងចំរេះទី១(គ្មានសារធាតុញៀន)ផ្សំគំនិត។
សមត្ថកិច្ចបានឲ្យដឹងថា មុនពេលកើតហេតុ នាវេលាម៉ោង២៣និង៣០នាទី ថ្ងៃទី២៣ ខែមីនា ឆ្នាំ២០១៩ ជនរងគ្រោះ បានទុករថយន្តលុចស៊ីស៤៧០ ពាក់ស្លាកលេខភ្នំពេញ 2P4037 ចំណុចផ្ទះលេខ៨១F ក្នុងបូរីវិមានភ្នំពេញ ផ្លូវ២០៨ ក្រុមទី៤ ភូមិសង្កាត់ច្រាំង ចំរេះទី១ ខណ្ឌឫស្សីកែវ។ លុះដល់ថ្ងៃទី២៤ ខែមីនា ឆ្នាំ២០១៩ ម៉ោង៧និង០០នាទី ទើបជនរងគ្រោះ បានមកដាក់ពាក្យបណ្ដឹង នៅអធិការខណ្ឌឫស្សីកែវ។
បន្ទាប់ពីបានទទួលពាក្យបណ្ដឹង កម្លាំងជំនាញខណ្ឌ និងប៉ុស្តិ៍ បានធ្វើការស្រាវជ្រាវ ឈានទៅឃាត់ជនសង្ស័យចំនួន២នាក់ជាបន្តបន្ទាប់ នៅថ្ងៃទី២៥ ខែមិនា ឆ្នាំ២០១៩ វេលាម៉ោង៣និង០០នាទី នៅចំណុចឃ្លាំងលេខ៩៣ ផ្លូវលេខ៥៩៨ សង្កាត់ទួលសង្កែទី២។
សមត្ថកិច្ចឲ្យដឹងទៀតថា សម្ភារៈដកហូតមាន រថយន្ត១គ្រឿង ម៉ាកលុចស៊ីស៤៧០ ពណ៌ស្ករ ផលិតឆ្នាំ១០៩៨ ពាក់ស្លាកលេខភព2P 4037 មួយគ្រឿង ជារបស់ជនរងគ្រោះ បានប្រគល់ជូនជនរងគ្រោះបណ្ដោះអាសន្ន, អាវុធខ្លី១ដើម ប្រើហ្គាស៍បាញ់គ្រាប់កាំកង់លេខ១៨C។ កូនសោរថយន្តចំនួន២។
ក្រោយឃាត់ខ្លួន ជនសង្ស័យទាំង២នាក់ ត្រូវបាននគរបាល នៃអធិការដ្ឋានខណ្ឌឫស្សីកែវ កសាងសំណុំរឿងបញ្ជូនទៅតុលាការចាត់ការតាមនីតិវិធី៕
Source: Kampuchea Thmey Daily
0 Comments