បាត់ដំបង ៖ នៅព្រឹកថ្ងៃទី១១ ខែមីនា ឆ្នាំ២០១៩នេះ កម្លាំងសមត្ថកិច្ចចរាចរណ៍ផ្លូវគោក នៃស្នងការនគរបាលខេត្តបាត់ដំបង ដែលមាន លោក ឆៃ ច័ន្ទដារាជា នាយការិយាល័យ បានដឹកនាំកម្លាំងចេញប្រតិបត្តិការផ្សព្វផ្សាយជាទ្រង់ទ្រាយធំ ក្នុងគោលបំណងពញ្ញាក់ស្មារតីដល់សាធារណជន ក៏ដូចជាប្រជាពលរដ្ឋក្នុងខេត្តបាត់ដំបងឲ្យគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយ នៃអត្រាគ្រោះថ្នាក់ឲ្យបានល្អប្រសើរ ខណៈបច្ចុប្បន្នការគ្រោះថ្នាក់ចរាចរណ៍កើតឡើងជាបន្តបន្ទាប់។
ពេលកំពុងមមាញឹកក្នុងការផ្សព្វផ្សាយ និងណែនាំដល់អ្នកបើកបរទាំងរថយន្តទាំងម៉ូតូ លោកស្រីវរសេនីយ៍ទោប្រឹម សុជាតិ អនុការិយាល័យចរាចរណ៍ផ្លូវគោក ឆ្លៀតក្នុងឱកាសនោះ បានប្រាប់ដល់កម្ពុជាថ្មីឲ្យដឹងថា ការចុះផ្សព្វផ្សាយ និងពញ្ញាក់ស្មារតីដល់សាធារណជន ក៏ដូចជាពលរដ្ឋទូទៅ ក្នុងខេត្តជាទ្រង់ទ្រាយធំនាពេលនេះ គឺធ្វើឡើងតាមការយកចិត្តទុកដាក់ខ្ពស់ពីលោកស្នងការខេត្ត ដោយមានការដឹកនាំផ្ទាល់ក្នុងកិច្ចប្រតិបត្តិការផ្សព្វផ្សាយនេះ ដោយ លោក ឆៃ ច័ន្ទដារា នាយការិយាល័យផ្លូវគោក នៃស្នងការខេត្តផងដែរ ហើយការផ្សព្វផ្សាយនេះ ត្រឹមរយៈពេលតែ១ថ្ងៃប៉ុណ្ណោះ ដោយមិនបានផាកពិន័យអ្វីទាំងអស់ បើទោះបីប្រជាពលរដ្ឋដែលកំពុងធ្វើដំណើរមិនពាក់មួក ឬដាក់ខ្សែក្រវាត់ក៏ដោយចុះ គឺសមត្ថកិច្ចត្រឹមតែណែនាំដល់ពួកគាត់ប៉ុណ្ណោះ តែបើនៅតែមិនអនុវត្តន៍ចាប់ពីថ្ងៃនេះទៅ សមត្ថកិច្ចនឹងរឹតបន្តឹងផាកពិន័យ ដោយគោរពទៅតាមគោលការណ៍ផ្លូវច្បាប់ជាក់ជាមិនខាន។
លោកស្រីបន្តថា ក្រៅពីធ្វើការណែនាំ សមត្ថកិច្ចក៏មានការចែកចាយឯកសាររបស់គណៈកម្មាធិការជាតិសុវត្ថិភាពចរាចរណ៍ផ្លូវគោកមួយចំនួនផងដែរ ដើម្បីជំនួយដល់ស្មារតីស្ដីពីច្បាប់ចរាចរណ៍ផ្លូវគោកសម្រាប់ផ្សព្វផ្សាយប្រការសំខាន់ៗ ដែលត្រូវចងចាំចំពោះអ្នកប្រើប្រាស់ផ្លូវគោក រួមជាមួយបញ្ញត្តិសំខាន់ៗ នៃច្បាប់ ស្តីពីចរាចរណ៍ផ្លូវគោកផងដែរ ដើម្បីឲ្យប្រជាពលរដ្ឋមើល និងអានក្នុងផលប្រយោជន៍ការពារអាយុជីវិតរបស់ពួកគាត់ ដែលកើតចេញពីការមិនគោរពច្បាប់ចរាចរណ៍នេះ។
នៅក្នុងឱកាសនោះដែរ លោក សៀម ប៊ុនរិទ្ធ អភិបាលរងខេត្តបាត់ដំបងដែលបានចូលរួមបានមានប្រសាសន៍ថា លោកសុំអំពាវនាវយ៉ាងទទូចដល់សាធារណជន ក៏ដូចជាប្រជាពលរដ្ឋទូទៅក្នុងខេត្តទាំងអស់ មេត្តាចូលរួមគោរពច្បាប់ចរាចរណ៍ទាំងអស់គ្នា ដើម្បីការពារអាយុជីវិតរបស់យើង ដែលកំពុងរស់រានមានសេចក្តីសុខក្នុងសង្គមមួយដែលកំពុងតែអភិវឌ្ឍន៍ និងសិទ្ធិសេរីភាពក្នុងការធ្វើដំណើរដល់គ្រប់ទិសទី តាមរយៈការបើកបរ ត្រូវតែប្រកាន់ស្តាំរៀងៗខ្លួន កុំប្រជែងគ្នា ចេះអត់អោននិងយោគយល់គ្នា ពិសេសកុំបើកបរក្នុងស្ថានភាពស្រវឹង និងកំពុងបើកបរហើយនិយាយទូរស័ព្ទជាដើម។
លោកបន្តថា ការមិនគោរពច្បាប់ចរាចរណ៍ ប្រៀបដូចមិនចេះរក្សាជីវិតខ្លួនឯងដូចជា បើកបរម៉ូតូត្រូវពាក់មួក បើករថយន្តត្រូវប្រើខ្សែក្រវាត់ ព្រោះគ្រោះថ្នាក់វាកើតឡើងគ្មានពេលកំណត់បាននោះទេ។
លោកបន្តដោយណែនាំថា គ្រោះថ្នាក់ចរាចរណ៍វាកើតឡើងលើកត្តាពីរ ទី១-ស្លាប់បាត់បង់ជីវិត ចាកចោលក្រុមគ្រួសារ សាច់ញាតិ មិត្តភ័ក្ដិរហូត។ និងទី២-ពិការភាព បាត់បង់កាយសម្បទា ពេលនោះមិនត្រឹមតែខូចខាតសម្ភារៈប៉ុណ្ណោះទេ សូម្បីតែសេដ្ឋកិច្ចគ្រួសារ ក៏ធ្លាក់ក្នុងសភាពទ្រុឌទ្រោមផងដែរដូច្នេះយើងរួមគ្នាប្រឆាំងដាច់ខាតថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍កើតឡើង៕
Source: Kampuchea Thmey Daily
0 Comments