នៅថ្ងៃចន្ទ នាយករដ្ឋមន្ត្រីចក្រភពអង់គ្លេសលោកស្រី Theresa May ត្រូវបានគេរំពឹងថានឹងបង្ហាញនូវអ្វីដែលជាការផ្លាស់ប្តូរបើសិនជាលោកស្រីធានាបាននូវកិច្ចព្រមព្រៀងលែងលះជាមួយសហភាពអឺរ៉ុបមុនការបោះឆ្នោតដ៏មានសារៈសំខាន់មួយនៅក្នុងរដ្ឋសភាក្នុងរយៈពេលតិចជាងបីសប្តាហ៍មុនថ្ងៃ Brexit។
កាលពីពីរខែមុន សភាបានច្រានចោលទាំងស្រុងនូវកិច្ចព្រមព្រៀងដកខ្លួនដែលលោកស្រី May បានឈានដល់ជាមួយសហភាពអ៊ឺរ៉ុបហើយបានបញ្ជូនលោកស្រីឲ្យត្រលប់ទៅទីក្រុងប្រ៊ូសសែលវិញដើម្បីធ្វើការចរចាជាថ្មី។
ប៉ុន្តែខណៈពេលដែលសមាជិកសភាត្រៀមខ្លួនដើម្បីបោះឆ្នោតម្តងទៀតលើកិច្ចព្រមព្រៀងនេះនៅថ្ងៃអង្គារនោះ លោកស្រីនាយករដ្ឋមន្ត្រីមានលទ្ធភាពតិចតួចណាស់ដើម្បីបង្ហាញពីកិច្ចខិតខំប្រឹងប្រែងរបស់ខ្លួនដែលជាហេតុជំរុញឲ្យមានការព្រមានពីបរាជ័យដ៏អាម៉ាស់មួយទៀត។
បរាជ័យនេះមានន័យថា ចក្រភពអង់គ្លេសអាចបញ្ចប់ទំនាក់ទំនងរយៈពេល៤៦ឆ្នាំជាមួយដៃគូពាណិជ្ជកម្មជិតស្និទ្ធិបំផុតរបស់ខ្លួននៅថ្ងៃទី២៩ខែមីនាដោយគ្មានការរៀបចំថ្មីដែលបង្កឲ្យមានការរំខានយ៉ាងខ្លាំងលើភាគីទាំងសងខាង។
ប៉ុន្តែវាក៏អាចបង្កើនលទ្ធភាពនៃការពន្យារពេលដល់កិច្ចព្រមព្រៀង Brexit ផងដែរ។
ខណៈពេលដែលអ្នកពេញចិត្តអឺរ៉ុបនៅក្នុងគណបក្សអភិរក្សនិយមរបស់លោកស្រី May នឹងស្វាគមន៍ការពន្យារពេលមួយដែលអាចធ្វើទៅបានដើម្បីការធ្វើប្រជាមតិលើកទីពីរស្តីពីសមាជិកភាពសហភាពអឺរ៉ុបនោះ អ្នកដែលមិនពេញចិត្តអឺរ៉ុបបានជំទាស់វាយ៉ាងខ្លាំងក្លា។
មន្ត្រីអង់គ្លេសនិងអ៊ឺរ៉ុបបានធ្វើការនៅចុងសប្ដាហ៍ដើម្បីបំបែកភាពជាប់គាំងហើយលោកស្រី May បានត្រៀមខ្លួនរួចជាស្រេចដើម្បីធ្វើដំណើរទស្សនកិច្ចនៅនាទីចុងក្រោយទៅកាន់ទីក្រុងប្រ៊ូសសែលបើសិនជាចាំបាច់ដើម្បីឈានដល់កិច្ចព្រមព្រៀងនេះ។
ប៉ុន្តែសហភាពអឺរ៉ុបបានច្រានចោលរួចទៅហើយនូវការទាមទារភាគច្រើនរបស់លោកស្រីដោយលើកឡើងថា សម្បទានណាមួយដែលលោកស្រីទទួលបានគឺនឹងមិនគ្រប់គ្រាន់ដើម្បីបញ្ចុះបញ្ចូលសមាជិកសភាអង់គ្លេសទេ។
ខណៈពេលប្រឈមមុខនឹងការបះបោរពីគណៈរដ្ឋមន្ត្រី លោកស្រី May បានសន្យាថា ប្រសិនបើសមាជិកសភាបរាជ័យក្នុងផែនការរបស់លោកស្រី ពួកគេនឹងអាចបោះឆ្នោតនៅសប្ដាហ៍នេះទៅលើថាតើត្រូវចាកចេញពីសហភាពអឺរ៉ុបដោយគ្មានកិច្ចព្រមព្រៀងឬស្វែងរកការពន្យារពេល៕ AFP
Source: Kampuchea Thmey Daily
0 Comments