ទីបំផុត អភិបាលរងខេត្តព្រះសីហនុ ២នាក់ ត្រូវបានរាជរដ្ឋាភិបាល បញ្ចប់តំណែង

ព្រះសីហនុ ៖ ខណៈពេល លោក យន្ត មីន រក្សានៅបានតំណែងរបស់ខ្លួនជាអភិបាល នៃគណៈអភិបាលខេត្ត ព្រះសីហនុ បន្ត ដោយឡែកសម្រាប់ លោក ផៃប៊ុន វណ្ណៈ និង លោក ស្រ៊ន ស្រន់ ដែលមានតួនាទីជា អភិបាលរងខេត្តព្រះសីហនុដូចគ្នា ត្រូវបានរាជរដ្ឋាភិបាល សម្រេចចេញ អនុក្រឹត្យ លេខ ២៦១ ចុះថ្ងៃទី០១ ខែមីនា ឆ្នាំ២០១៩ បញ្ចប់មុខតំណែងពីអភិបាលរងខេត្តព្រះសីហនុ ទាំងស្រុងតែម្តង។

ពាក់ព័ន្ធការបញ្ចប់មុខតំណែង អភិបាលរងខេត្ត ព្រះសីហនុ ចំនួន២រូបខាងលើនេះ គឺធ្វើឡើង បន្ទាប់ មាន រឿងអាស្រូវ ពាក់ព័ន្ធការដឹកនាំកម្លាំងប្រដាប់អាវុធ ប្រើប្រាស់ អំពើហិង្សា វាយដំ ទាត់ធាក់ និង ប្រហារ ប្រជាពលរដ្ឋ បណ្តាលឲ្យរបួស ក្នុងពេលចុះអនុវត្តន៍សាលក្រម តុលាការកំពូល កាលពី ថ្ងៃទី២៤ ខែមករា ឆ្នាំ២០១៩ កន្លងមក លើទីតាំងដីទំនាស់ តំបន់ពយម៉ា ចូវ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ លើដីទំហំ៧១ហិកតា ដែលជាដីគម្របព្រៃឈើ បៃតង ឆ្នាំ២០០២។

គួរបញ្ជាក់ផងដែរថា ក្នុងហេតុការណ៍ចុះអនុវត្តន៍សាលក្រមស្ថាពរ តុលាការកំពូល ដឹកនាំដោយលោក សៀង សុខ ព្រះរាជអាជ្ញាអមសាលាដំបូងខេត្តព្រះសីហនុ និង លោក ផៃ ប៊ុន វណ្ណៈ នាព្រឹកថ្ងៃទី២៤ ខែមករា ឆ្នាំ២០១៩ លើទីតាំងដីទំនាស់ ទំហំប្រមាណ៧១ហិកតា ស្ថិតក្នុងភូមិគគីរ ឃុំបិតតាំង ស្រុកព្រៃនប់ ខេត្តព្រះសីហនុ (តំបន់ពយម៉ាចូវ)កន្លងទៅថ្មីនេះ ក្រុមសមត្ថកិច្ចចម្រុះ បានប៉ះទង្គិច ជាមួយក្រុមអ្នកប្រឆាំងតវ៉ា ចំនួនប្រមាណ៤០០នាក់ យ៉ាងខ្លាំងក្លា ដោយគេសង្កេតឃើញ ថាប្រជាពលរដ្ឋបាននាំគ្នាដុតកង់ឡាន និងដេញគប់ដុំថ្ម គប់ដបសាំង និងប្រើប្រាស់ចម្ពាមកៅស៊ូ បាញ់សំដៅ ទៅលើសមត្ថកិច្ច ក្នុងគោលបំណងធ្វើការរារាំង មិនឲ្យសមត្ថកិច្ច ចូលទៅតំបន់ទីតាំងដីទំនាស់ ចំណែកឯក្រុមសមត្ថកិច្ច បានប្រើប្រាស់ រថយន្តពន្លត់អគ្គិភ័យ បាញ់បំបែកហ្វូងអ្នកតវ៉ា និង ពន្លត់ភ្លើង ប៉ុន្តែក្នុងពេលនោះ មិនទទួលបានជោគជ័យទេ តែផ្ទុយទៅវិញ បែរជាត្រូវក្រុមអ្នកប្រឆាំង តវ៉ា គប់ដុំថ្មយ៉ាងខ្លាំងក្លា ដូចគេបាចលាជ តម្រង់មកហ្វូងសមត្ថកិច្ច បណ្ដាលឲ្យបែកកញ្ចក់រថយន្ត ទំនើបចំនួន០២គ្រឿង និង អេស្កាវ៉ាទ័រ មួយគ្រឿង ក៏រងបែកកញ្ចក់ ផងដែរ។

ក្រោយមក សមត្ថកិច្ច បានបង្ខំចិត្ត ប្រើប្រាស់កាំភ្លើងបាញ់អស់ជាច្រើន គឺបាញ់ ក្នុងន័យគំរាម ក្រុមអ្នកតវ៉ាចៃដន្យ ក៏បានបាញ់ត្រូវបុរសម្នាក់ ចំស្មា ធ្លាយ ទៅបៀមគ្រាប់ ជាប់នឹងដើមទ្រូង របួសធ្ងន់សន្លប់ស្តូកក្នុងកន្លែងកើតហេតុតែម្ដង និងមនុស្សចំនួន០៦នាក់ទៀត ត្រូវបានចាប់ខ្លួន ចំណែក ក្រុមអ្នកតវ៉ា ជាច្រើនរយនាក់ផ្សេងទៀត បានរត់គេចខ្លួនបាត់អត់ ជាហេតុ ធ្វើឲ្យស្ថានភាពលើទីតាំងដីទំនាស់ មានសភាពស្ងប់ស្ងាត់ ហើយកម្លាំងសមត្ថកិច្ចបាននាំយកគ្រឿងចក្រ ចំនួន៦គ្រឿង ក្នុង អេស្កាវ៉ាទ័រចំនួន៤គ្រឿង និង អាប៊ុលចំនួន២គ្រឿង រួមនឹងកម្មករស៊ីឈ្នួលរុះរើចំនួនប្រមាណ២០០នាក់ផងដែរ ធ្វើសកម្មភាពលើដីទំនាស់យ៉ាងរលូនតែម្ដង៕