យុទ្ធជនដែលដឹកនាំដោយពួកឃើដ បានប្តេជ្ញាកាលពីថ្ងៃព្រហស្បតិ៍ថា នឹងកម្ទេចសំណល់ចុងក្រោយនៃរដ្ឋ Caliphate របស់ក្រុមរដ្ឋឥស្លាមនៅប្រទេសស៊ីរីក្នុងសប្តាហ៍នេះ បន្ទាប់ពីនិយាយថា ពួកគេបានជម្លៀសមនុស្សរាប់រយនាក់ចេញពីមូលដ្ឋានរបស់ក្រុមជីហាដមួយនេះរួចហើយ។
កងកម្លាំងប្រជាធិបតេយ្យស៊ីរី (SDF) បានត្រៀមខ្លួនសម្រុកចូលទីតាំងដែលកាន់កាប់ដោយពួកជីហាដនិយមនៅចុងភូមិ Baghouz។
មនុស្សប្រុស ស្រីនិងកុមាររាប់ពាន់នាក់បានចាកចេញពីភូមិមាត់ទន្លេមួយនេះក្នុងរយៈពេលប៉ុន្មានថ្ងៃថ្មីៗនេះដែលជាហេតុបង្កឲ្យមានបញ្ហាប្រឈមមនុស្សធម៌ដ៏ធំមួយសម្រាប់យុទ្ធជនឃើដគាំទ្រដោយអាមេរិកដែលកំពុងដឹកនាំប្រតិបត្តិការនេះ។
លោក Mazloum Kobani អគ្គមេបញ្ជាការរបស់ SDF បាននិយាយនៅក្នុងវីដេអូមួយដែលចេញផ្សាយដោយការិយាល័យប្រព័ន្ធផ្សព្វផ្សាយរបស់ក្រុមនេះកាលពីថ្ងៃព្រហស្បតិ៍ថា “ក្នុងរយៈពេលប្រហែលមួយសប្តាហ៍ យើងនឹងប្រកាសពីជ័យជម្នះពេញលេញលើក្រុម IS”។
កាលពីព្រឹកថ្ងៃព្រហស្បតិ៍ អ្នកនាំពាក្យរបស់ SDF លោក Adnan Afrin បាននិយាយថា កងកម្លាំងរបស់លោកកំពុងរង់ចាំដើម្បីបញ្ចប់ការជម្លៀសចេញពីភូមិ Baghouz មុនពេលចាប់ផ្តើមការវាយប្រហារចុងក្រោយដើម្បីកម្ចាត់ពួកជីហាដ។
លោក Afrin បានប្រាប់ AFP ថា “យើងចង់ឲ្យប្រតិបត្តិការជម្លៀសបញ្ចប់ក្នុងពេលឆាប់ៗតាមដែលអាចធ្វើទៅបានដូច្នេះយើងអាចឈានទៅដំណាក់កាលបន្ទាប់ទៀត នោះគឺការវាយប្រហារឬធ្វើឲ្យពួកជីហាដដែលនៅតែស្ថិតនៅខាងក្នុងនោះចុះចាញ់”។
SDF បានប៉ាន់ប្រមាណថា ចំនួនមនុស្សដែលស្ថិតនៅខាងក្នុងមូលដ្ឋានក្រុម IS ចុងក្រោយដែលមានទំហំកន្លះគីឡូម៉ែត្រការ៉េលើច្រាំងទន្លេ Euphrates គឺមានចាប់ពីរាប់រយទៅរាប់ពាន់នាក់។
លោក Afrin បានថ្លែងថា “យើងមិនច្បាស់អំពីចំនួនជនស៊ីវិលនៅខាងក្នុងនោះទេប៉ុន្តែជារៀងរាល់ថ្ងៃយើងមានការភ្ញាក់ផ្អើលចំពោះចំនួនមនុស្សដែលចេញមក”៕ AFP
Source: Kampuchea Thmey Daily
0 Comments