ភ្នំពេញ ៖ និពន្ធនាយករងសារព័ត៌មាន និងគេហទំព័រ ថ្ងៃស្អែក កំពុងរងនូវពាក្យបណ្ដឹង ពីបទញុះញង់ និងប្រើហិង្សាលើអ្នកកាន់កាប់អចលនវត្ថុដែលប្រព្រឹត្តិធ្វើឡើងនៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប។
យោងតាមប្រភពពី លោក ពៅ ស្រីសួគ៌ អត្តលេខ៣២៧ ជាសមាជិកគណៈមេធាវី នៃព្រះរាជាណាចក្រកម្ពុជាការិយាល័យ មេធាវី និរតី បានឲ្យដឹងថា នៅថ្ងៃទី២៨កុម្ភៈនេះ លោកបានដាក់ពាក្យបណ្ដឹងទៅស្នងការដ្ឋាននគរបាលខេត្តកែប ដោយសុំឲ្យស្ថាប័ននគរបាលជួយរកយុត្តិធម៌ដល់កូនក្តីរបស់លោកដែលត្រូវបាន លោក ស៊ន ម៉ៅ មុខងារជានិពន្ធនាយករងសារព័ត៌មាន និងគេហទំព័រ(ថ្ងៃស្អែក) និងស្ត្រីម្នាក់ទៀត ឈ្មោះ សាំង ឌៀប បានប្រើហិង្សាលើអ្នកកាន់កាប់អចលនវត្ថុកូនក្តីរបស់លោក។
លោកមេធាវីបានបញ្ជាក់ពីហេតុការណ៍នេះថា កាលពីវេលាម៉ោង៨ព្រឹក ថ្ងៃទី២៦ ខែកុម្ភៈ ឆ្នាំ២០១៩កន្លងទៅនេះ ឈ្មោះ ស៊ន ម៉ៅ ជានិពន្ធនាយករងសារព័ត៌មាន និងគេហទំព័រថ្ងៃស្អែក រួមនឹងស្ត្រីឈ្មោះ សាំង ឌៀប ដែលមានទីលំនៅក្នុងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប បានដឹកនាំបក្ខពួកមកជីករណ្ដៅ និងដាំបង្គោលធ្វើជារបងចំនួន៥០បង្គោល លើដីកូនក្តីរបស់ លោកទាំងបំពាន បើទោះបីជាអ្នកចាំដីធ្វើការហាមឃាត់ ក៏ពួកគេមិនស្តាប់ដែរ ព្រមទាំងគំរាមកំហែងមកលើអ្នកចាំដីរបស់កូនក្តី លោកទៀតផង។ ខណៈនោះ អ្នកចាំដី មិនហ៊ានតបត ទេ ព្រោះខ្លាចមានអំពើហិង្សាកើតឡើងរហូតដល់ក្រុម លោក ស៊ន ម៉ៅ និង ស្ត្រី សាំង ឌៀប ព្រមទាំងបក្ខពួកបានដាំបង្គោលធ្វើរបងក្នុងដីកម្មសិទ្ធិរបស់កូនក្តីរបស់ លោកបានសម្រេចតែម្តង។
លោកមេធាវី បានបញ្ជាក់នៅក្នុងពាក្យបណ្ដឹងថា ដីកូនក្តីរបស់លោក គឺបានទិញពី លោក ចន្ទ័ សំអាង កាលពីថ្ងៃទី៣០ ខែឧសភា ឆ្នាំ២០១៦ ក្នុងទំហំ ៩,៣៥០ម៉ែត្រការ៉េ(ប្រាំបួនពាន់បីរយហាសិបម៉ែត្រការ៉េ)ដោយមានលិខិតផ្ទេរសិទ្ធិកាន់កាប់ដីធ្លីលេខ :៦៩២/១៨អក ចុះថ្ងៃទី២១ ខែកក្កដា ឆ្នាំ២០១៨ របស់លោកមេឃុំអង្កោល និងមានការទទួលស្គាល់ពីអាជ្ញាធរមានសមត្ថកិច្ចត្រឹមត្រូវទៀតផង។
លោកមេធាវី ពៅ ស្រីសួគ៌ បានបន្តថា នៅថ្ងៃដែល លោក ស៊ន ម៉ៅ និងបក្ខពួកមកជីករណ្ដៅដាំបង្គោលលើដីកូនក្តីរបស់លោកនោះ គឺស្ត្រី ឈ្មោះ សាំង ឌៀប បានកាន់ចបជីកគំរាមរកវាយអ្នកចាំដីឲ្យកូនក្តីរបស់លោក ហើយស្ត្រីរូបនេះអះអាងថា ជាដីរបស់គាត់ និងដោយមានការឃុបឃិតពីឈ្មោះ ស៊ន ម៉ៅ ជានិពន្ធនាយករងសារព័ត៌មាន និងគេហទំព័រថ្ងៃស្អែកជាអ្នកកាង និងញុះញង់បន្ថែមទៀត ដោយបំពានច្បាប់ និងសំអាងថា ខ្លួនជានិពន្ធនាយករងសារព័ត៌មានថ្ងៃស្អែកផងនោះ។
លោកមេធាវីបានបញ្ជាក់ទៀតថា នៅថ្ងៃទី២៨កុម្ភៈនេះ បានដាក់ពាក្យបណ្ដឹងមកស្នងការដ្ឋាននគរបាលខេត្តកែប និងបន្តដាក់ពាក្យបណ្ដឹងមកលោករដ្ឋមន្ត្រីក្រសួងព័ត៌មាន ដើម្បីស្វែងរកយុត្តិធម៌ជូនដល់កូនក្តីរបស់លោក។
ក្នុងពាក្យបណ្ដឹងដែលដាក់ចូលមកស្ថាប័នទាំងពីរខាងលើ គឺជនរងគ្រោះបានសំណូមពរដូចខាងក្រោម ៖
ទី១-សុំឲ្យតុលាការផ្ដន្ទាទោស ឈ្មោះ ស៊ន ម៉ៅ ឈ្មោះ សាំង ឌៀប និងបក្ខពួកតាមផ្លូវច្បាប់។
ទី២-ទាមទារសំណងជំងឺចិត្ត សេវា មេធាវី និងការចំណាយផ្សេងៗចំនួន៨០លានរៀល។
គួរបញ្ជាក់ថា រឿងហេតុខាងលើនេះ គឺបង្កឡើងដោយ ឈ្មោះ ស៊ន ម៉ៅ អាងអំណាចខ្លួនជានិពន្ធនាយករងសារព័ត៌មាន និងគេហទំព័រថ្ងៃស្អែក។ ដូច្នេះហើយ ទើប លោកមេធាវី ពៅ ស្រីសួគ៌ បានសម្រេចដាក់ពាក្យបណ្តឹងមកលោករដ្ឋមន្ត្រីក្រសួងព័ត៌មានដើម្បីឲ្យលោករដ្ឋមន្ត្រីចាត់ការតាមផ្លូវច្បាប់ ស្ដីពីវិជ្ជាជីវៈអ្នកសារព័ត៌មានដែលមានសិទ្ធិសរសេរតែព័ត៌មានពិត ពុំមែនអាងខ្លួនជាអ្នកសារព័ត៌មាន បែរជាទៅប្រើហិង្សាយកបក្ខពួកទៅរំលោភបំពានហ៊ុមព័ទ្ធយកដីកម្មសិទ្ធិស្របច្បាប់របស់ប្រជាពលរដ្ឋតាមការចង់បានរបស់ខ្លួនឡើយ។ ព្រោះប្រទេសមានច្បាប់។
លោកមេធាវី សង្ឃឹមជឿជាក់ទៅលើប្រព័ន្ធច្បាប់ និងស្វែងរកយុត្តិធម៌ជូនដល់កូនក្តីរបស់លោកជាក់ជាមិនខាន៕
Source: Kampuchea Thmey Daily
0 Comments