ភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងនូវការកោតសរសើចំពោះកិច្ចប្រឹងប្រែងបម្រើប្រជាពលរដ្ឋបានល្អប្រសើរលើកិច្ចការពាររក្សាសន្តិសុខទទួលនូវភាពកក់ក្តៅ។ សម្តេចពិជ័យសេនាថ្លែងនូវការសរសើរលើកទឹកចិត្តដល់កម្លាំងអាវុធហត្ថបែបនេះកាលពីម្សិលមិញដើមខែមីនា ឆ្នាំ២០១៩ ខណៈអញ្ជើញជាអធិបតី នៅក្នុងពិធីសំណេះសំណាល សួរសុខទុក្ខនាយទាហាន នាយទាហានរង និង ពលទាហាន នៃកងរាជអាវុធហត្ថរាជធានីភ្នំពេញ ប្រមាណជាង១ពាន់នាក់ ប្រកបដោយភាពអធិកអធមបំផុត។
ក្នុងឱកាសនោះផងដែរ សម្តេចពិជ័យសេនា ទៀ បាញ់ បានអញ្ជើញទស្សនា សមិទ្ធផលរបស់ កងរាជអាវុធហត្ថ រាជធានីភ្នំពេញ និង បានទស្សនា ការសម្តែងយុទ្ធវិធីផ្សេងៗ យ៉ាងជក់ចិត្ត។
លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថ លើផ្ទៃប្រទេស មេបញ្ជាការ កងរាជអាវុធហត្ថ រាជធានីភ្នំពេញ បានរាយការណ៍ជូនគណៈអធិបតី ស្តីពីលទ្ធផលការងាររបស់អាវុធហត្ថរាជធានី ភ្នំពេញ សម្រេចបានកន្លងមកជាច្រើន ដែលមានខ្លឹមសារជារួម គឺផ្តោតសំខាន់លើការតស៊ូប្រឹងប្រែងជំនះឧបសគ្គ អនុវត្ត ភារកិច្ចចម្បងចំនួន០៤ក្នុងពេលតំណាលគ្នា នោះគឺ៖ ១-ការរួមចំណែកការពារសន្តិសុខសណ្តាប់ធ្នាប់សង្គម និងស្ថេរភាពនយោបាយ, ២-ការគ្រប់គ្រង និង កសាងអង្គភាព, ៣-ការបង្ការទប់ស្កាត់និងបង្ក្រាបបទល្មើស និង ៤-ការជួយសង្គ្រោះបម្រើពលរដ្ឋនិងសង្គម។
សម្តេចពិជ័យសេនា ទៀ បាញ់ បានសម្តែងការកោតសរសើរ ចំពោះរាល់ស្នាដៃដែលកងរាជអាវុធហត្ថរាជធានីភ្នំពេញសម្រេចបាន និង មានមតិ សំណេះសំណាលផ្តាំផ្ញើដល់កងរាជអាវុធហត្ថរាជធានី ភ្នំពេញទាំងអស់ ត្រូវអនុវត្តឲ្យបានម៉ឺងម៉ាត់ និងមានប្រសិទ្ធភាពខ្ពស់បំផុត នូវអនុសាសន៍ ១០ចំណុចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានថ្លែងក្នុងពិធី អបអរសាទរខួប ២០ឆ្នាំ នៃថ្ងៃបង្កើតបញ្ជាការដ្ឋាន កងទ័ពជើងគោក ថ្ងៃទី២៤ ខែមករា ឆ្នាំ២០១៩ កន្លងមក។
សម្តេចពិជ័យសេនា ទៀ បាញ់ បានសម្តែងការកោតសរសើរបំផុត ចំពោះអាវុធហត្ថភ្នំពេញ ដែលបានបំពេញយ៉ាងពេញលេញរួចជាស្រេចទៅហើយ ធ្វើឲ្យសម្តេចពិបាកនឹងរៀបរាប់ថា នឹងត្រូវ ផ្តាំផ្ញើឲ្យធ្វើអ្វីបន្តទៅទៀត ហើយអាចនិយាយបានថា ជាគំរូមួយដែរ ដល់បណ្តាកងឯកភាពទាំងឡាយ។ សម្តេចពិជ័យសេនា បានថ្លែងបន្ថែមថា កន្លងមកសម្តេចបានរួមចំណែក ស្វះស្វែងរកគ្រឿងបំពាក់ ធ្វើយ៉ាងណា ជំនួយដល់កម្លាំងទាំងអស់គ្នាពេលចេញប្រតិបត្តិការ ធានាបានសុវត្ថិភាព ហើយបង្ក្រាបបទល្មើសកាន់តែមាន ប្រសិទ្ធភាពផងដែរ តែយ៉ាងណាក៏ដោយ សម្តេចមិនអាច មិនកោតសរសើរបានទេ អ្វីដែលបានមកហើយ ហាក់ដូចជាមិនទាន់សមស្របទាំងស្រុង តែអាវុធហត្ថភ្នំពេញ បាននាំយកមកកែច្នៃបន្ថែម ស្របតាមស្ថានភាព ជាក់ស្តែង ស្របតាមបទពិសោធន៍ ដែលធ្លាប់ប្រតិបត្តិការហើយជួបប្រទះ ព្រមទាំងមានការធានាទាំងជីវភាព ធានាការចេញប្រតិបត្តិការ និង មានការធានាទុកដាក់សម្ភារ អាវុធយុទ្ធភ័ណ្ឌ បានយ៉ាងល្អ។
ជាថ្មីម្តងទៀត សម្តេចពិជ័យសេនា ទៀ បាញ់ បានធ្វើការវាយតម្លៃខ្ពស់ ចំពោះ នាយទាហាន នាយទាហានរង របស់កងរាជអាវុធហត្ថរាជធានីភ្នំពេញ ដែលបានប្រឹងប្រែង ធ្វើពលីកម្ម ប្រកបដោយវីរភាព អង់អាចក្លាហាន ក្នុងការបំពេញភារកិច្ច ថែរក្សាសុខសន្តិភាព សុវត្ថិភាព និង សណ្តាប់ធ្នាប់បានល្អប្រសើរ ជូនប្រជាជន និង សង្គមជាតិយើង និង សូមអរគុណចំពោះ ឯកឧត្តម លោកជំទាវ លោក លោកស្រី ឥស្សរជន ក្រសួងស្ថាប័ន រាជរដ្ឋាភិបាល និង សប្បុរសជនទាំងអស់ ដែលបានរួមគ្នាជួយឧបត្ថម្ភគាំទ្រ លើគ្រប់វិស័យ ដើម្បីភាពរីកចម្រើន កងរាជអាវុធហត្ថ នៃកងយោធពលខេភូមិន្ទ និងសូមថ្លែងអំណរគុណយ៉ាងជ្រាលជ្រៅ ចំពោះក្រសួង ស្ថាប័ន វិស័យឯកជន សប្បុរសជនទាំងអស់ ដែលបានគាំទ្រឧបត្ថម្ភ សព្វបែបយ៉ាង ដល់កងរាជអាវុធហត្ថរាជធានីភ្នំពេញ តាំងពីមុន រហូតមកដល់បច្ចុប្បន្ន ដែលជាការបង្ហាញ ពីការពង្រឹងពង្រីក ចំណងមិត្តភាពនិងកិច្ចសហការ ក្នុងការជំរុញលើកកំពស់សមត្ថភាពនិងប្រសិទ្ធភាព ការងាររបស់កងរាជអាវុធហត្ថក្នុងបុព្វហេតុ ការពារសុខសន្តិភាព សន្តិសុខ ស្ថិរភាព និង វឌ្ឍនភាពសង្គមពិសេសជាអ្នកបំរើរាស្ត្រដោយស្មោះត្រង់៕
Source: Kampuchea Thmey Daily
0 Comments