ខេត្តត្បូងឃ្មុំ បើកយុទ្ធនាការ ចុះអនុវត្តការធ្វើជំរឿនហើយ

ត្បូងឃ្មុំ ៖ យប់ថ្ងៃទី០២ ខែមីនា ឆ្នាំ២០១៩ ឯកឧត្តម ឡុង ធាម អភិបាលរងខេត្តត្បូងឃ្មុំ តំណាងឯកឧត្តមបណ្ឌិត ជាមច័ន្ទសោភ័ណ អភិបាលខេត្តត្បូងឃ្មុំ បានដឹកនាំមន្ត្រីជំរឿនខេត្ត បើកយុទ្ធនាការចុះអនុវត្តការធ្វើជំរឿនគ្រួសារឆ្លងកាត់ និងគ្រួសារគ្មានផ្ទះសម្បែងទូទាំងខេត្តត្បូងឃ្មុំ ក្រោមប្រធានបទ "ជំរឿនទូទៅប្រជាជនឆ្នាំ២០១៩ ជាកាតព្វកិច្ចរបស់យើងទាំងអស់គ្នា ដើម្បីចូលរួមអភិវឌ្ឍន៍កម្ពុជា"។

ឯកឧត្តម ឡុង ធាម អភិបាលរងខេត្តត្បូងឃ្មុំ បានឲ្យដឹងថា ៖ ជំរឿនទូទៅប្រជាជននៅទូទាំងប្រទេស ប្រព្រឹត្តទៅចាប់ពីថ្ងៃទី០៣ ខែមីនា ឆ្នាំ២០១៩ ម៉ោង០:០០ ដល់ថ្ងៃទី១៣ ខែមីនា ឆ្នាំ២០១៩ ម៉ោង២៤:០០។

ឯកឧត្តម អភិបាលរងខេត្ត បានបន្តទៀតថា ៖ ក្រោមសន្តិភាព និងការអភិវឌ្ឍ ដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ក្នុងការធ្វើជំរឿនទូទាំងប្រទេសនេះឡើង។ នេះជាការធ្វើជំរឿនលើកទី៣ នៅក្នុងប្រវត្តិសាស្ត្រកម្ពុជា ដែលជាទូទៅបាននិងកំពុង ធ្វើឡើងរៀងរាល់ ១០ឆ្នាំម្ដង ដើម្បីទទួលបានទិន្នន័យស្ថិតិប្រជាសាស្ត្រ ជាក់លាក់ ប្រាកដប្រជា និងសុក្រឹត្យ សម្រាប់ប្រើប្រាស់ជាធាតុចូលក្នុងការ រៀបចំតាក់តែងគោលនយោបាយជាតិឲ្យបានត្រឹមត្រូវ និងដើម្បីធ្វើជាសូចនាករក្នុងការតាមដានត្រួតពិនិត្យ ផែនការយុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចីរភាព របស់កម្ពុជា ២០១៦-២០៣០ ដោយមិនទុកឱ្យនរណាម្នាក់នៅឯការឡើយ។

ឯកឧត្តម ឡុង ធាម បញ្ជាក់ឲ្យដឹងថា ៖ ជំរឿនគឺជាការរាប់ចំនួនប្រជាជន ប្រុស ស្រី ក្មេង ចាស់ ជនជាតិខ្មែរ និង បរទេស ដែលកំពុងរស់នៅក្នុងប្រទេសកម្ពុជា។ សកម្មភាពនេះ មិនពាក់ព័ន្ធនឹងនយោបាយឡើយ។ រាល់ព័ត៌មានបុគ្គល ដែលទទួលបាន ក្នុងពេលធ្វើជំរឿន នឹងមិនត្រូវបានប្រើប្រាស់ក្នុងបុព្វហេតុផ្សេងឡើយ ក្រៅពីប្រើប្រាស់ជាសូចនាករ ក្នុងការធ្វើផែនការជាតិ និងឈរលើលាក់ការណ៍សម្ងាត់។

ឯកឧត្តម ឡុង ធាម អភិបាលរងខេត្តត្បូងឃ្មុំ បានអំពាវនាវដល់ប្រជាជនទូទាំងខេត្តត្បូងឃ្មុំ សូមគាំទ្រសហការ និងចូលរួមក្នុងកិច្ចការដ៏មានសារៈសំខាន់នេះ ឱ្យបានគ្រប់ៗគ្នា ប្រកបដោយភាពស្មោះស្ម័គ្រ គ្រប់គ្រាន់ត្រឹមត្រូវ សុក្រឹត្យ និងស្មោះត្រង់ ក្នុងការផ្ដល់ព័ត៌មានតាមរយៈកិច្ចសម្ភាសន៍របស់មន្ត្រីជំរឿន ដើម្បីជាមូលដ្ឋាននៃការកសាងផែនការអភិវឌ្ឍប្រទេសជាតិរបស់យើងទាំងអស់គ្នា៕