រតនគិរី ៖ រថយន្តកាមរីស្វិតមួយគ្រឿង បោលបុកបង្គោលភ្លើងយ៉ាងពេញទំហឹង បណ្តាលឲ្យរងការខូចខាតផ្នែកខាងមុខ សំណាងល្អអ្នកបើកបរនិងអ្នករួមដំណើរមិនមានគ្រោះថ្នាក់។
ករណីគ្រោះថ្នាក់ចរាចរណ៍បង្កឡើងដោយខ្លួនឯង បានកើតឡើងនៅវេលាម៉ោង១០និង០០នាទីយប់ ថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី០១ ខែមីនា ឆ្នាំ២០១៩កន្លងទៅ តាមបណ្តោយផ្លូវជាតិលេខ៧៨A ស្ថិតនៅក្នុងភូមិតងប្លេង ឃុំអូរជុំ ស្រុកអូរជុំ។
មន្ត្រីនគរបាលស្រុកអូរជុំ បានឲ្យដឹងថា អ្នកបើកបរឈ្មោះ ប្លង់ អាឡុក ភេទប្រុស អាយុ៤២ឆ្នាំ ជនជាតិគ្រឹង មុខរបរកសិករ មានទីលំនៅភូមិ/ឃុំកើតហេតុខាងលើ រងរបួសស្រាល បើកបររថយន្តមួយគ្រឿងម៉ាក កាមរីស្វិត ពណ៌ស ពាក់ស្លាកលេខ ភ្នំពេញ 2L-6760 ចំណែកអ្នករួមដំណើរប្រពន្ធឈ្មោះ រ៉ាន់ យ៉េងចប់ អាយុ៤២ឆ្នាំ ជនជាតិគ្រឹង មុខរបរកសិករ រងរបួសស្រាល។
លោកបន្តថា មូលហេតុ គឺអ្នកបើកបររថយន្តខាងលើបានស្រវឹងស្រាជោកជាំ បើករេចង្កូតធ្លាក់ផ្លូវជ្រុលទៅបុកនឹងបង្គោលភ្លើងដែលនៅស្ងៀមមួយកន្លែង សំណាងល្អមិនមានគ្រោះថ្នាក់ដល់អ្នកដទៃ។ ក្រោយកើតហេតុ ជនរងគ្រោះត្រូវបានដឹកបញ្ជូនទៅព្យាបាលនៅមន្ទីរពេទ្យបង្អែកខេត្ត។
ដោយឡែករថយន្តត្រូវបានកម្លាំងនគរបាលរដ្ឋបាលប៉ុស្តិ៍អូរជុំបានរឹបអូសយកមករក្សាទុកនៅអធិការដ្ឋាននគរបាលស្រុកអូរជុំ ដើម្បីរង់ចាំធ្វើការដោះស្រាយនៅពេលក្រោយ៕
Source: Kampuchea Thmey Daily
0 Comments