គណៈកម្មការ​ឯកភាព​៩​ចំណុច ដើម្បី​សម្រេច​ឲ្យ​បាន​នូវ​គម្រោង​សាងសង់​អាកាស​យានដ្ឋា​ន​អន្តរជាតិ​ភ្នំពេញ​ថ្មី

ភ្នំពេញ ​៖ ដើម្បី​អនុវត្ត​សេចក្តីសម្រេច​របស់​រាជ​រដ្ឋាភិបាល ស្ដីពី​ការបង្កើត​គណៈកម្មការ​រៀបចំ​ទីតាំង​គម្រោង​សាងសង់​អាកាសយានដ្ឋាន​អន្តរជាតិ​ភ្នំពេញ​ថ្មី កាលពី​ថ្ងៃទី​២៨ ខែកុម្ភៈ ឆ្នាំ​២០១៩ នៅ​ទីស្ដីការក្រសួង​ដែនដី នគរូបនីយកម្ម និង​សំណង់ ក្រោម​អធិបតីភាព​ឯកឧត្តម​ឧបនាយករដ្ឋមន្ត្រី ជា សុផារ៉ា ប្រធាន​គណៈកម្មការ​សាងសង់ បាន​ដឹកនាំ​កិច្ចប្រជុំ​លើក​ទី​១ ដោយមាន​ការចូលរួម​ពី​លោក ម៉ៅ ហាវ​ណ្ណា​ល់ រដ្ឋមន្ត្រី​ទទួលបន្ទុក​រដ្ឋលេខាធិការ​ដ្ឋាន​អាកាសចរ​ស៊ីវិល និង​ជា​អនុប្រធាន​គណៈកម្មការ​សាងសង់ និង​មានការ​ចូលរួម​ពី​តំណាង​ស្ថាប័ន​ពាក់ព័ន្ធ​យ៉ាង​ច្រើន​ផងដែរ​។



ជា​លទ្ធផល​នៅក្នុង​កិច្ចប្រជុំ​នោះ ទី​១, អង្គរជុំ​បានលើកឡើង​ពី​ការសម្រេច​របស់​រាជរដ្ឋាភិបាល​ក្នុង​ការបង្កើត​អាកាសយានដ្ឋាន​អន្តរជាតិ​ថ្មី ដែល​មាន​ខ្នាត 4F លើ​ផ្ទៃដី​២៦០០ ហិកតា ដែល​អាច​ទទួល​យន្តហោះ​ខ្នាត​ធំ​បាន ស្ថិត​នៅ​ក្នុង​ភូមិសាស្ត្រ​ខេត្តកណ្ដាល និង​ខេត្តតាកែវ​។



ទី​២, ប្រគល់​ភារកិច្ច​ជូន​លោក ម៉ៅ ហាវ​ណ្ណា​ល់ ដើម្បី​រៀបចំ​កិច្ចព្រមព្រៀង ដាក់​ពិគ្រោះ​យោបល់​ជាមួយ​ស្ថាប័ន និង​អង្គភាព​ពាក់ព័ន្ធ​ប និង​សុំ​ការសម្រេច​ពី​រាជរដ្ឋាភិបាល ដើម្បី​ចុះហត្ថលេខា​ជាមួយ​ក្រុមហ៊ុន Cambodia Airport Investment និង​សិក្សា​កំណត់​តំបន់​សុវត្ថិភាព​នៃ​ការហោះហើរ​។



ទី​៣, ប្រគល់​ភារកិច្ច​ជូន​ក្រុមការងារ​គាំទ្រ​ដល់​ការរៀបចំ​ទីតាំង​គម្រោង​សាងសង់ ចុះ​កំណត់​និយាម​ការ ទីតាំង​គម្រោង​សាងសង់ បោះបង្គោល​ព្រំ​កំណត់​តំបន់​លំនៅឋាន និង​កំពស់​អាគារ រៀបចំ​ប្លង់​លំអិត នគរូបនីយកម្ម និង​សំណង់ ហេដ្ឋារចនាសម្ព័ន្ធ​។​



ទី​៤, អនុវត្ត​ឲ្យ​មានការ​ឯកភាព​នូ​វប្រ​ព័ន្ធ​និយាម​ការ Datum WGS 84 ក្នុង​ការ​វាស់វែង​គូស​ទីតាំង​ក្បាលដី ក្នុង​ផែនទី​តែមួយ​។

ទី​៥, រដ្ឋបាល​ខេត្តកណ្ដាល និង​រដ្ឋបាល​ខេត្តតាកែវ សហការ​ជាមួយ​ក្រុមការងារ និង​ក្រុមហ៊ុន​ក្នុងការ​អនុវត្ត​តួនាទី និង​ភារកិច្ច គាំទ្រ​ដល់​គម្រោង​សាងសង់ ស្របតាម​ការ​សម្រេច​របស់​រាជរដ្ឋាភិបាល​។



ទី​៦, ប្រគល់​ភារកិច្ច​ជូន​រដ្ឋបាល​ខេត្តកណ្តាល និង​ខេត្តតាកែវ និង​អគ្គនាយកដ្ឋាន​សុរិយោដី និង​ភូមិសាស្ត្រ កំណត់​អត្តសញ្ញាណ​ប្រជាពលរដ្ឋ ដែល​មាន​ដី​នៅក្នុង​តំបន់​ទីតាំង​គម្រោង ឲ្យ​បាន​ច្បាស់លាស់ ដោយ​ផ្អែក​ទៅតាម​ការ​កាន់កាប់​ជាក់ស្ដែង និង​ឯកសារ​ពាក់ព័ន្ធ ដើម្បី​មាន​មូលដ្ឋាន​ក្នុងការ​ដោះស្រាយ​ផល​ប៉ះពាល់​ជូន​ប្រជាពលរដ្ឋ ហើយ​ជំហាន​បន្ទាប់​តាម​ការចាំបាច់​ផ្អាក​ជា​បណ្ដោះអាសន្ន​ការ​ធ្វើ​ចរន្ត​ការ​ដី​ក្នុង​ទីតាំង​ដែល​បង្ក​ការ​លំបាក និង​រាំងស្ទះ​ដល់​ដំណើរការ​អនុវត្ត​គម្រោង​។

ទី​៧, ស្នើ​ឲ្យ​ស្ថាប័ន​ពាក់ព័ន្ធ​គិតគូរ​ជាមុន អំពី​ហេដ្ឋារចនាសម្ព័ន្ធ​គាំទ្រ ដែល​មាន​ដូចជា ការ​បង្កប់​បំពង់​ហ្គាស បណ្ដាញ​ផ្គត់ផ្គង់​ទឹក​ស្អាត ប្រព័ន្ធ​អគ្គិសនី ប្រព័ន្ធ​លូ ខ្សែកាបអុបទិក អាង​ប្រព្រឹត្ត​កម្ម​ទឹក​កខ្វក់ ឲ្យ​បាន​ត្រឹមត្រូវ​ជាមុន បង្ហូរ​ចូល​លូ​សាធារណៈ អង់​តែ​ន​ទូរស័ព្ទ និង​ហេដ្ឋារចនាសម្ព័ន្ធ​ក្រោម​ដី​ផ្សេងៗ ជៀសវាង​រៀបចំ​តាម​ក្រោយ ដែល​បង្ក​ឲ្យ​ខូចខាត​ដល់​ផ្លូវថ្នល់ ជាពិសេស​ប្រព័ន្ធ​ការពារ និង​រំដោះ​ទឹកជំនន់​។

ទី​៨, ស្នើ​ឲ្យ​ក្រុមហ៊ុន​បង្កើត​ទីស្នាក់ការ​បណ្ដោះអាសន្ន​សម្រាប់ធ្វើ​កា​រ​នៅ​លើ​ទីតាំង ហើយ​ជ្រើសរើស​បុគ្គលិក​ចេញពី​មូលដ្ឋាន ដែល​មាន​កាយសម្បទា និង​លក្ខណៈ​សម្បត្តិ​តាម​ចំនួន​សមរម្យ មក​បម្រើ​ការងារ​ចាំបាច់ ក្នុងការ​អនុវត្ត​គម្រោង ហើយ​ជំហាន​បន្ទាប់​អាច​ជ្រើសរើស​បុគ្គលិក​បន្ថែម​តាម​តម្រូវការ​ជាក់ស្តែង​។​



​ទី​៩, លើកទឹកចិត្ត​ប្រើប្រាស់​ធនធានមនុស្ស​ក្នុងស្រុក ទាំង​អ្នកជំនាញ និង​អ្នក​គ្មាន​ជំនាញ ឲ្យ​អស់​លទ្ធភាព​ក្នុងការ​អនុវត្ត​គម្រោង​សាងសង់​អាកាសយានដ្ឋាន​ថ្មី​នេះ​។

សូមបញ្ជាក់ថា រាជរដ្ឋាភិបាល​កម្ពុជា កាលពី​ថ្ងៃទី​១៨ ខែកុម្ភៈ ឆ្នាំ​២០១៩ បានសម្រេច​បង្កើត​គណៈ​កម្ម​ការ​មួយ ដើម្បី​សិក្សា និង​វាយតម្លៃ​ពី​ទីតាំង​សាងសង់​អាកាសយានដ្ឋាន​អន្តរជាតិ​ភ្នំពេញ​ថ្មី ដែលមាន​សមាសភាព​ចម្រុះ​ចំនួន​២៣​រូប ហើយ​គណៈកម្មការ​នេះ ដឹកនាំ​ដោយ​ឯកឧត្តម​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី​នគរូបនីយកម្ម និង​សំណង់ និង​មាន​លោក ម៉ៅ ហាវ​ណ្ណា​ល់ រដ្ឋមន្ត្រី​ទទួលបន្ទុក​រដ្ឋលេខាធិកា​រដ្ឋា​ន​អាកាសចរ​ស៊ីវិល​ជា​អនុប្រធាន​។ ទីតាំង​សាងសង់​អាកាសយានដ្ឋាន​អន្តរជាតិ​ភ្នំពេញ​ថ្មី​នេះ ស្ថិតនៅ​ម្តុំ​ស្រុក​កណ្តាលស្ទឹង ខេត្តកណ្តាល និង​មាន​ជាប់​ព្រំប្រទល់​ស្រុក​បាទី ខេត្តតាកែវ​។



គម្រោង​សាងសង់​ព្រលានយន្តហោះ​អន្តរជាតិ​ភ្នំពេញ​ថ្មី​នេះ ត្រូវបាន​គេ​ដឹងថា គឺ​ស្ថិតនៅក្នុង​គម្រោង​វិនិយោគ​រួមគ្នា​រវាង​ក្រុមហ៊ុន OCIC របស់លោក​ឧកញ៉ា ពុង ឃាវ​សែ និង​ក្រុមហ៊ុន​ចិន​លើ​ផ្ទៃដី​ទំហំ​ប្រមាណ​២.៦០០​ហិកតា ហើយ​គម្រោង​នេះ ត្រូវបាន​ប្រកាសឡើង​នៅក្នុង​ដំណើរ​ទស្សនកិច្ច​របស់​នាយករដ្ឋមន្ត្រី​ចិន លោក លី ខឺ​ឈាង មកកាន់​កម្ពុជា​កាលពី​ខែមករា ឆ្នាំ​២០១៨​។ ដើម្បី​សាងសង់​ព្រលានយន្តហោះ​ភ្នំពេញ​ថ្មី​នេះ រាជរដ្ឋាភិបាល​កម្ពុជា និង​ក្រុមហ៊ុន OCIC របស់លោក​ឧកញ៉ា ពង់ ឃាវ​សែ ត្រូវបង្កើត​ក្រុមហ៊ុន​ថ្មី​មួយ ដែលមាន​ឈ្មោះថា “ Cambodia Airport Investmen” ក្នុង​ទំហំ​ទឹកប្រាក់​១.៥០០​លាន​ដុល្លារ​។



ទាក់ទង​គម្រោង​នេះ លោក ជា អូន រដ្ឋលេខាធិការ​ប្រចាំការ និង​ជា​អ្នកនាំពាក្យ​អាកាសចរ​ស៊ីវិល ធ្លាប់បាន​បញ្ជាក់​ប្រាប់​អ្នកសារព័ត៌មាន​កាលពី​ថ្ងៃ​សុក្រ ទី​០១ ខែមីនា ឆ្នាំ​២០១៩ ថា អាកាសយានដ្ឋាន​អន្តរជាតិ​ភ្នំពេញ​ថ្មី​នេះ មាន​ទំហំ​ប្រហាក់ប្រហែល នឹង​អាកាសយានដ្ឋាន​នៅ​ប្រទេស​ថៃ និង​ប្រទេស​សិង្ហ​បុរី ដែល​អាច​ប្រើប្រាស់ សម្រាប់​ឲ្យ​យន្តហោះ​ធុន​ធំ​ហោះហើរ​ផ្លូវ​ឆ្ងាយ​រយៈពេល​ពី​១២ ដល់​១៦​ម៉ោង ដូចជា​ទៅ​បារាំង ឬ​សហរដ្ឋអាមេរិក ហោះហើរ​ចេញ ឬ​ចុះចត​បាន​។ លោក​បញ្ជាក់​ថា ការហោះហើរ​ចន្លោះ​១៥​ទៅ ១៦​ម៉ោង​ចេញ ពី​អាកាសយានដ្ឋាន​អន្តរជាតិ​ភ្នំពេញ​ថ្មី​នេះ ទោះ​ទៅ​ទិសខាងកើត​ក៏ដោយ ខាងលិច​ក៏ដោយ គឺ​ស្មើ​ពាក់​កណ្តាល​ផែនដី ហើយ​នៅពេល​អាកាស យានដ្ឋាន​នេះ​កើតឡើង វា​នឹង​អាច​ឲ្យ​អ្នកដំណើរ​មកដល់​កម្ពុ​ជា ដោយ​ផ្ទាល់​ដោយ​មិនបាច់​ចុះចត​នៅ​ប្រទេស​ណា មួយ​មុន​មកដល់​កម្ពុជា ដែល​ជា​ការ​ខាត​ពេលវេលា​នោះទេ​។

តាម​លោក ជា អូន ក្រោយ​គម្រោង​នេះ​សាងសង់​រួច កម្ពុជា​នឹង​ទទួល​បាន​ភ្ញៀវទេសចរ​ច្រើន ហើយ​ប្រជាពលរដ្ឋ​កម្ពុជា ក៏​មាន​ការងារ​ធ្វើ​ច្រើន​នៅពេល​យើង​មាន​ជើងហោះហើរ​ត្រង់​ជាមួយ​ប្រទេស​ក្នុង​តំបន់ និង​ពិភពលោក​ដោយ​ផ្តើមចេញពី​ការ​វិនិយោគ​អាកាសយានដ្ឋាន​ថ្មី​នេះ​៕

Source: Kampuchea Thmey Daily