ភ្នំពេញ ៖ បុរសម្នាក់ ជាអ្នករកស៊ីរត់ឈ្នួលរ៉ឺម៉កម៉ូតូកង់បី(តុកតុក) ត្រូវបានសមត្ថកិច្ចចាប់ខ្លួនតាមបណ្ដឹងប្រជាជនម្នាក់ ចោទពីបទ បៀតបៀនលើប្រដាប់ភេទរបស់កុមារីម្នាក់ អាយុទើបតែ៧ឆ្នាំ កាលពីល្ងាចថ្ងៃទី២៥ ខែមីនា ឆ្នាំ២០១៩ នៅសង្កាត់អូរបែកក្អម ខណ្ឌសែនសុខ។
លោក ស្រុង ឡូញ អាយុ៣៩ឆ្នាំ មានមុខរបររកស៊ីរត់ឈ្នួលរ៉ឺម៉កម៉ូតូកង់បី ស្នាក់នៅក្នុងបុរី៩៩៩ ដែលមានទីតាំងនៅក្នុងសង្កាត់អូរបែកក្អម ជាជនជាប់ចោទ ត្រូវបានសមត្ថកិច្ចឃាត់ខ្លួនខាងលើ។
ស្ត្រីឈ្មោះ ស ស្រ ញ៉ អាយុ២៩ឆ្នាំ ធ្វើការជាបុគ្គលិករបស់អង្គការភាពញញឹម នៃកុមារ ស្នាក់នៅផ្ទះជួលនៅភូមិអ័រគីដេ សង្កាត់អូរបែកក្អម បាននិយាយថា ៖ កូនស្រីរបស់គាត់ម្នាក់ ឈ្មោះ ចំរើន សុវណ្ណវត្តី អាយុ៧ឆ្នាំ ត្រូវបានបុរស ឈ្មោះ ស្រុង ឡូញ ល្បួងនាំយកទៅបៀតបៀនលើប្រដាប់ភេទ បង្កឲ្យមានរបួសស្នាម។
ស្ត្រីខាងលើបានរាយការណ៍បញ្ជាក់ប្រាប់សមត្ថកិច្ចថា កន្លងមក គាត់ និង បុរស ឈ្មោះ ស្រុង ឡូញ ធ្លាប់ស្គាល់គ្នា ដោយសារតែគេបានមករត់ឈ្នួលរ៉ឺម៉កម៉ូតូកង់បីឈប់សំចតនៅម្តុំមុខទីតាំងកន្លែងគាត់ធ្វើការ អង្គការភាពញញឹម នៃកុមារ។ នៅថ្ងៃមួយ គឺថ្ងៃទី២១ ខែមីនា ឆ្នាំ២០១៩ កូនស្រីគាត់ឈ្មោះ ចំរើន សុវណ្ណវត្តី និងប្អូនប្រុសរបស់គេ ឈ្មោះ ចំរើន មង្គលឧត្តម អាយុ៤ឆ្នាំ បានចេញពីសាលារៀនរបស់អង្គការភាពញញឹម នៃកុមារ នៅវេលាម៉ោង៥ល្ងាច នៅគ្រានោះ ឈ្មោះ ស្រុង ឡូញ បានមកឈប់រ៉ឺម៉កចាប់ដឹកម៉ូយ ហើយបន្ទាប់មក ក៏បានដឹកម៉ូយភ្ញៀវស្រី២នាក់ចេញទៅ ដោយបានដឹកកូនៗស្រី/ប្រុសរបស់គាត់ទាំង២នាក់នោះទៅដែរ បន្ទាប់មក ក៏ដឹកត្រឡប់វិញយកមកដាក់នៅមុខអង្គការដដែល។
ស្ត្រីជាម្តាយបានបន្តថា លុះនៅវេលាម៉ោង៩យប់ថ្ងៃដដែល កូនស្រីគាត់ចេះតែនិយាយប្រាប់គាត់ឈឺដោយចង្អុលទៅកាន់ប្រដាប់ភេទនាង ប៉ុន្តែគាត់ពុំបានចាប់អារម្មណ៍។ ស្អែកឡើង ថ្ងៃទី២២ កូនគាត់បានរំលឹកប្រាប់ថា ឈឺប្រដាប់ភេទរបស់នាងទៀត ទើបគាត់ហៅមកសួរនាំ និងបញ្ជូនទៅឲ្យអង្គការសួរនាំត្រួតពិនិត្យបន្ថែម ក៏ឃើញមានស្នាមរបួសដាច់រលាត់ក្នុងប្រដាប់ភេទ។ បន្ទាប់មក នៅព្រឹកថ្ងៃ
ទី២៥មីនា ខាងអង្គការ និងម្តាយក្មេងស្រីរងគ្រោះ ក៏បានបញ្ជូននាងរងគ្រោះទៅកាន់មន្ទីរពេទ្យបង្អែកក្រុងភ្នំពេញ ត្រួតពិនិត្យជាផ្លូវការ លទ្ធផលបញ្ជាក់ថា ប្រាប់ភេទរបស់ក្មេងស្រី ឈ្មោះ ចំរើន សុវណ្ណវត្តី ពិតជាមានស្នាមរបួសមែន។
ក្មេងស្រីរងគ្រោះបានប្រាប់ម្តាយនាងថា គឺ ពូរត់រ៉ឺម៉កម៉ូតូកង់បី នោះជាអ្នកចាប់នាងយកទៅស្ទាបអង្អែល យកដៃលូករុលក្នុងប្រដាប់ភេទរបស់នាង ទើបធ្វើឲ្យនាងរបួសឈឺដូច្នេះ ហើយគាត់(ជនសង្ស័យ)បានគំរាមនាងមិនឲ្យប្រាប់គេទេ។
ដោយមានភស្តុតាងគ្រប់គ្រាន់បញ្ជាក់ពីមន្ទីរពេទ្យដូច្នេះ នៅថ្ងៃទី២៥ ខែមីនា ឆ្នាំ២០១៩ ម្តាយកុមារីរងគ្រោះ ក៏បានមកប្តឹងសមត្ថកិច្ចឲ្យចាត់ការតាមច្បាប់តែម្តង។ នៅវេលាម៉ោង៥ល្ងាច ប៉ូលិសក៏បានតាមស្រាវជ្រាវឃាត់ខ្លួនជនសង្ស័យ ខណៈដែលគាត់កំពុងអង្គុយរង់ចាំដឹកម៉ូយនៅចំណុចកើតហេតុដដែល។
ចំណែកជនជាប់ចោទ ឈ្មោះ ស្រុង ឡូញ វិញបានបដិសេធថា ខ្លួនមិនបានប៉ះពាល់លើប្រដាប់ភេទរបស់ក្មេងស្រីនោះដូចការចោទប្រកាន់នោះឡើយ ដោយគ្រាន់ដឹកពួកគេតាមរ៉ឺម៉ក រួចយកត្រឡប់មកដាក់នៅមុខអង្គការនោះវិញ។ ក្រោយមក ដោយសារប៉ូលិស បានប្រើជំនាញសាកសួរទើបជនសង្ស័យសារភាព៕
Source: Kampuchea Thmey Daily
0 Comments