ការដាច់ភ្លើងថ្មីមួយទៀត បានវាយប្រហារលើតំបន់ជាច្រើនក្នុងប្រទេសវេណេហ្ស៊ូអេឡារួមទាំងភាគច្រើននៃទីក្រុង Caracas ផងដែរ កាលពីថ្ងៃចន្ទ ដែលបញ្ហានេះ បានកើតឡើងពីរសប្តាហ៍ បន្ទាប់ពីមានការដាច់ភ្លើងទូទាំងប្រទេសមួយ ដែលធ្វើឲ្យប្រទេសនេះត្រូវជាប់គាំង។
ការដាច់ចរន្តអគ្គិសនីក្នុងរដ្ឋធានីបានកើតឡើងនៅម៉ោង១និង២៨នាទីរសៀលហើយបានកាត់ផ្តាច់អគ្គិសនីនៅកណ្តាលទីក្រុង។
រដ្ឋាភិបាលរបស់លោកប្រធានាធិបតី Nicolas Maduro បានបន្ទោសការដាច់ចរន្តអគ្គិសនីនេះទៅលើការវាយប្រហារមួយដែលសំដៅលើរោងចក្រវារីអគ្គិសនី Guri ធំបំផុតរបស់ប្រទេសនេះដែលបានផ្គត់ផ្គង់ថាមពលដល់ប្រជាជនវេណេហ្ស៊ូអេឡាចំនួន៨០ភាគរយ។
រដ្ឋមន្ត្រីក្រសួងទូរគមនាគមន៍លោក Jorge Rodriguez បានប្រាប់ទូរទស្សន៍ជាតិថា គណបក្សប្រឆាំងគឺជាអ្នកទទួលខុសត្រូវដោយអះអាងថា ពួកគេចង់ធ្វើឲ្យប្រជាជនធ្លាក់ចូលក្នុងភាពខ្វាយខ្វល់យ៉ាងខ្លាំង។
ទោះបីជាយ៉ាងណាក៏ដោយ លោក Juan Guaido ដែលជាមេដឹកនាំគណបក្សប្រឆាំងដែលត្រូវបានទទួលស្គាល់ជាប្រធានាធិបតីបណ្ដោះអាសន្នរបស់ប្រទេសវេណេហ្ស៊ូអេឡាដោយសហរដ្ឋអាមេរិកនិងសម្ព័ន្ធមិត្តរបស់ខ្លួនជាច្រើនគឺបានឆ្លើយតបតាម Twitter ថា រដ្ឋាភិបាលរបស់លោក Maduro បានប្រើពេលវេលាទាំងនេះដើម្បីបរិហារកេរ្តិ៍ និងបង្កើតការថប់បារម្ភ។
លោកបាននិយាយថា រដ្ឋយ៉ាងតិច១៧ក្នុងចំណោមរដ្ឋទាំង២៣របស់ប្រទេសនេះត្រូវបានរងផលប៉ះពាល់ក៏ដូចជាសង្កាត់ជាច្រើននៅក្នុងរដ្ឋធានីផងដែរ។
អ្នកប្រើប្រាស់ Twitter ដែលមានការថប់បារម្ភបាននិយាយថា ទីក្រុងធំៗជាច្រើននៅភាគខាងលិចនៃប្រទេសរួមមាន Barquisimeto, Maracaibo និង Barinas បានរងផលប៉ះពាល់។
មតិយោបល់នៅក្នុងប្រព័ន្ធផ្សព្វផ្សាយសង្គម បានលើកឡើងពីភាពចលាចល និងការព្រួយបារម្ភដែលបានកើតឡើងចាប់តាំងពីការដាច់ភ្លើងចុងក្រោយដែលបានចាប់ផ្តើមកាលពីថ្ងៃទី៧ ខែមីនា និងអូសបន្លាយពេលមួយសប្ដាហ៍។
ក្នុងអំឡុងពេលនៃការដាច់ភ្លើងនោះ អ្នកជំងឺជាច្រើននាក់នៅក្នុងមន្ទីរពេទ្យបានស្លាប់ ការដឹកជញ្ជូនសាធារណៈត្រូវបានផ្អាក ផលិតកម្មបានថយចុះនៅក្នុងវិស័យប្រេងដ៏សំខាន់ហើយការផ្គត់ផ្គង់ទឹកត្រូវបានរំខានដោយបង្ខំឲ្យប្រជាពលរដ្ឋងាកទៅរកប្រភពទឹកលូ និងប្រភពទឹក ដែលរងការបំពុល៕ AFP
Source: Kampuchea Thmey Daily
0 Comments