សៀមរាប ៖ កាលពីព្រឹកថ្ងៃទី០១ ខែមីនា ឆ្នាំ២០១៩ នេះ លោក នួន ពុទ្ធារ៉ា អភិបាល នៃគណៈអភិបាលក្រុងសៀមរាប បានធ្វើការប្រគល់ធុងសំរាមចំនួន២០ធុង ជូនដល់ គណៈគ្រប់គ្រង វិទ្យាល័យសម្ដេចឪ ក្រុងសៀមរាប ដើម្បីឲ្យសិស្សានុសិស្ស ប្រើប្រាស់ក្នុងការទុកដាក់សំរាម នៅក្នុងបរិវេណវិទ្យាល័យ ឲ្យបានត្រឹមត្រូវ និងដើម្បីរួមចំណែកលើកកម្ពស់ ការយល់ដឹងអំពីបញ្ហាសំរាម ដល់សិស្សានុសិស្សផងដែរ។
ធុងសំរាមទាំង២០ធុងនេះ ទទួលបានការឧបត្ថម្ភពីក្រុមហ៊ុន ខ្មែរ ប៊ែរវើរីជីស តាមរយៈ លោក ទៀ សីហា អភិបាល នៃគណៈអភិបាលខេត្តសៀមរាប ដើម្បីប្រើប្រាស់ លើការងាររក្សាបរិស្ថាន នៅតាមគោលដៅ សហគមន៍ រមណីយដ្ឋានទេសចរណ៍ សាលារៀន និង សាលាឃុំ/សង្កាត់ ជាដើម។
សូមរំលឹកថា ជារឿយៗ ក្រុមហ៊ុន ខ្មែរ ប៊ែរវីរីជីស តែងតែសហការជាមួយ សហភាពសហព័ន្ធយុវជនកម្ពុជា និងរដ្ឋបាលខេត្តសៀមរាប លើការងារ ថែរក្សាបរិស្ថាន ការងារមនុស្សធម៌ ការងារអប់រំ និងការងារកីឡា ដូចជាក្នុងព្រឹត្តិការណ៍ "សៀមរាបផ្ទះខ្ញុំ" ដែលបានរៀបចំថ្មីៗកន្លងមកនេះ នៅក្នុងខេត្តសៀមរាប ផងដែរ។
គួរកត់សម្គាល់ផងដែរថា បច្ចុប្បន្ននៅតាមទីសាធារណៈមួយចំនួនក្នុងក្រុងសៀមរាប នៅមិនទាន់មានធុងសំរាមនៅឡើយ ហើយករណីនេះ គេសង្ឃឹមថា អាជ្ញាធរ នឹងប្រឹងប្រែងរកទីកន្លែងសម្រាប់ទុកសំរាមឲ្យមានរបៀបរៀបរយបន្ថែមទៀត៕
Source: Kampuchea Thmey Daily
0 Comments