ភ្នំពេញ ៖ សមាគមសហគ្រិនវ័យក្មេងកម្ពុជាសហការជាមួយសភាយុវពាណិជ្ជករអន្តរជាតិកម្ពុជាសាខាមេគង្គនឹង រៀបចំការប្រកួតប្រជែងកម្មវិធីពានរង្វាន់សហគ្រិនវ័យក្មេងកម្ពុជាឆ្នាំ២០១៩ដើម្បីលើកទឹកចិត្តដល់បណ្តាសហគ្រិនវ័យក្មេងកម្ពុជាឲ្យមានឱកាសចូលរួមបង្ហាញពីសមត្ថភាពនិងចែករំលែកនូវភាពជោគជ័យជាលក្ខណៈថ្នាក់ជាតិ។
ការប្រកួតប្រជែងកម្មវិធីពានរង្វាន់លើកទី៥នេះ បានចាប់ផ្តើមទទួលពាក្យចាប់ពីថ្ងៃទី ២៤ ខែមីនាដល់ថ្ងៃទី១០ ខែឧសភា ឆ្នាំ២០១៩ ហើយការប្រកាសលទ្ធផលវគ្គជម្រុះវគ្គទី១នឹងធ្វើឡើងនៅថ្ងៃទី២៣ ខែឧសភា ឆ្នាំ២០១៩ បន្ទាប់មកនៅថ្ងៃទី៩ ខែមិថុនា ឆ្នាំ២០១៩ ប្រកួតជ្រើសរើសចំរាញ់យកបេក្ខជនចំនួន១៥នាក់និងប្រកាសលទ្ធផលចុងក្រោយនៅថ្ងៃទី១៤ ខែកក្កដា ឆ្នាំ២០១៩។
ការប្រកួតប្រជែងនេះបានចូលរួមយ៉ាងខ្លាំងនៅក្នុងការលើកកម្ពស់ឲ្យសហគ្រិនកម្ពុជាមានភាពក្លាហាន និង ទំនុកចិត្តក្នុងការបង្ហាញពីភាពច្នៃប្រឌិត ការតស៊ូប្រឹងប្រែងរហូតទទួលបានជោគជ័យក្នុងការប្រកបអាជីវកម្មរបស់ខ្លួន។ ក្រៅពីនេះ កម្មវិធីពានរង្វាន់សហគ្រិនវ័យក្មេងកម្ពុជាក៏ដើរតួយ៉ាងសំខាន់ក្នុងការជំរុញអោយ សហគ្រិនវ័យក្មេងកម្ពុជាពាំនាំអាជីវកម្មរបស់ខ្លួន ដើម្បីយកទៅប្រកួតប្រជែង និងដណ្តើមយកពានរង្វាន់ផ្សេងទៀតលើឆាកអន្តរជាតិផងដែរ។
លើសពីនេះទៅទៀត សហគ្រិននឹងទទួលបានឧត្តមភាពនៅក្នុងការស្វែងរកដៃគូអាជីវកម្ម ឬ អ្នកវិនិយោគ ទាំងក្នុង និងក្រៅប្រទេស ដែលជាផ្នែកមួយចូលរួមចំណែកក្នុងការអភិវឌ្ឍសេដ្ឋកិច្ចនៅកម្ពុជា។ ការប្រកួតឆ្នាំនេះនឹងមានការចុះទៅធ្វើការទស្សនាផ្ទាល់នូវទីតាំងអាជីវកម្មនីមួយៗរបស់សហគ្រិននៅវគ្គពាក់កណ្តាលផ្តាច់ព្រាត់ផងដែរ។ បន្ទាប់មកទៀត សហគ្រិននឹងត្រូវជួបជាមួយនឹងគណៈកម្មការនៅក្នុងបន្ទប់នីមួយៗទៅតាមមុខជំនាញ និងផ្នែកផ្សេងៗដែលក្រុមការងារបានរៀបចំ ដើម្បីធ្វើការវាយតម្លៃស៊ីជម្រៅ និងដាក់ពិន្ទុទៅលើអាជីវកម្មរបស់បេក្ខជនដែលជាសហគ្រិនទាំងអស់ឲ្យកាន់តែមានភាសុក្រឹត្យ និងយុត្តិធម៌។
កម្មវិធីពានរង្វាន់សហគ្រិនវ័យក្មេងឆ្នាំ២០១៩នេះ ក៏នឹងធ្វើការផ្សព្វផ្សាយទៅដល់សហគ្រិនវ័យក្មេងនៅក្នុងខេត្តចំនួន៥បន្ថែមទៀត រួមមានខេត្តសៀមរាប បាត់ដំបង បន្ទាយមានជ័យ កំពង់ចាម និងកំពត។ ការផ្សព្វផ្សាយនេះក៏នឹងចូលរួមចំណែកក្នុងការលើកទឹកចិត្តឲ្យសហគ្រិនវ័យក្មេងនៅតាមខេត្តមានឱកាសចូលរួមនៅក្នុងកម្មវិធីនេះផងដែរ។
ចំពោះលក្ខខណ្ឌ នៃការប្រកួតប្រជែង គឺបេក្ខជន ត្រូវមានអាយុចាប់ពី ១៨ ដល់ ៤៥ឆ្នាំ អាជីវកម្មត្រូវបានបង្កើតដំបូងនៅប្រទេសកម្ពុជា និង មានភាគហ៊ុនយ៉ាងតិច៥១ភាគរយ គ្រប់គ្រងដោយជនជាតិខ្មែរ។ អាជីវកម្មត្រូវចុះបញ្ជីការត្រឹមត្រូវតាមផ្លូវច្បាប់ និង មានដំណើរការយ៉ាងតិច២ឆ្នាំ។ អាជីវកម្មត្រូវមានបុគ្គលិកអចិន្ត្រៃយ៍យ៉ាងតិច៥នាក់។ សហគ្រិន/អាជីវកម្មមិនត្រូវបានពាក់ព័ន្ធជាមួយគណៈកម្មការជ្រើសរើស និង ក្រុមអ្នករៀបចំកម្មវិធី និងមិនត្រូវជាប់ពាក់ព័ន្ធនឹងបទល្មើសផ្សេងៗ៕
Source: Kampuchea Thmey Daily
0 Comments