ភ្នំពេញ ៖ លោក ស៊ីម សុវណ្ណនី ហៅ ស៊ីម វ៉ាន់នី ដែលជាអតីតសមាជិកគណៈកម្មាធិការនាយក របស់អតីតគណបក្សសង្គ្រោះជាតិ (CNRP) ដែលត្រូវបានជាប់បម្រាមមិនឲ្យធ្វើសកម្មភាពនយោបាយរយៈពេល៥ឆ្នាំនោះ ត្រូវបានព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យ ផ្តល់នីតិសម្បទាឱ្យធ្វើនយោបាយឡើងវិញហើយ នេះបើតាមព្រះរាជ្យក្រឹត្យចុះថ្ងៃទី០២ ខែមីនា ឆ្នាំ២០១៩។
ព្រះរាជក្រឹត្យរបស់មហាក្សត្រ ចុះថ្ងៃទី០២ ខែមីនា ឆ្នាំ២០១៩ បានចែងថា “ត្រូវបានផ្ដល់នីតិសម្បទាឡើងវិញដល់ ស៊ីម សុវណ្ណនី ហៅ ស៊ីម វ៉ាន់នី កើតថ្ងៃទី១៣ ខែមករា ឆ្នាំ១៩៧៦ ដែលត្រូវបានហាមឃាត់មិនឲ្យធ្វើសកម្មភាពនយោបាយរយៈពេល ៥ ឆ្នាំ តាមអំណាចសាលដីកាលេខ ៣៤០ (ឆ) ចុះថ្ងៃទី ១៦ ខែ វិច្ឆិកា ឆ្នាំ ២០១៧ របស់តុលាការកំពូល”។
លោក ស៊ីម សុវណ្ណនី ហៅ ស៊ីម វ៉ាន់នី ស្ថិតក្នុងលំដាប់លេខរឿងទី៤៤ នៅក្នុងបញ្ជីអ្នកនយោបាយ ដែលត្រូវបានហាមឃាត់ធ្វើសកម្មភាពនយោបាយរយៈពេល៥ឆ្នាំ របស់តុលាការកំពូល នៃអតីតគណបក្សសង្គ្រោះជាតិ (CNRP) ហើយជាមនុស្សទី៣ ដែលទទួលបានការផ្តល់នីតិសម្បទា ឱ្យធ្វើនយោបាយឡើងវិញ បន្ទាប់ពីលោក គង់ គាំ និងលោក គង់ បូរ៉ា ក្នុងចំណោមមនុស្សចំនួន១១៨នាក់ ដែលត្រូវបានហាមឃាត់ធ្វើសកម្មភាពនយោបាយរយៈពេល៥ឆ្នាំ ហើយការទទួលបានការលើកបម្រាមនយោបាយនេះ ក្រោយពេលមានការធ្វើវិសោធនកម្មមាត្រា៤៥ (ស្ទួនមួយ) នៃច្បាប់ស្តីពីគណបក្សនយោបាយកាលពីដើមខែមករា។ វិសោធនកម្មមាត្រានេះ បើកផ្លូវឲ្យមន្ត្រីជាប់បម្រាមនយោបាយស្នើសុំសិទ្ធិធ្វើនយោបាយឡើងវិញ ដោយមិនចាំបាច់រង់ចាំរយៈពេល៥ ឆ្នាំ តាមការកំណត់របស់សាលក្រមតុលាការកំពូល។
លោក ស៊ីម សុវណ្ណនី បានប្រាប់អ្នកសារព័ត៌មានកាលពីថ្ងៃទី០៣ ខែមីនា ថា អ្វីដែលលោកស្នើសុំដកបម្រាមនយោបាយនេះ ដោយសារតែលោកចង់បង្ហាញឲ្យមេដឹកនាំទាំងពីរ (បក្សកាន់អំណាច និងបក្សប្រឆាំង) ថា មានតែការនិយាយគ្នា ឬចរចាគ្នាទេ ដែលអាចទៅមុខបាន ហើយទោះបីជាលោកទទួលបានការដកបម្រាមក៏ដោយ លោកមិនទាន់សម្រេចធ្វើអ្វីនៅឡើយទេ។
ជាមួយគ្នានោះ លោកអះអាងថា លោកមានហេតុផលមួយទៀតដែលសម្រេចចិត្តស្នើសុំការលើកបម្រាមនោះ គឺមិនយូរទេ អ្នកជាប់បម្រាមទាំង១១៨ នឹងត្រូវបានព្រះមហាក្សត្រឡាយព្រះហស្តលេខាលើកលែងបម្រាមហើយ និងបានចូលធ្វើនយោបាយឡើងវិញ ដូច្នេះលោកមិនចាំបាច់រង់ចាំរហូតដល់ពេលនោះទេ។
ទាក់ទងបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងថា សម្រាប់មន្ត្រីរបស់អតីតបក្សប្រឆាំង ដែលជាប់បម្រាមធ្វើនយោបាយទាំង១១៥រូប ដែលនៅសល់ ត្រូវសម្រេចចិត្តដោយខ្លួនឯង តើគួរជ្រើសរើសយកការប្រើសិទ្ធិសុំធ្វើនយោបាយឡើងវិញ ស្របតាមច្បាប់វិសោធនកម្មច្បាប់ស្តីពីគណបក្សនយោបាយ ដែលបានបើកផ្លូវឲ្យសាមីជនមានសិទ្ធិសុំនីតិសម្បទាធ្វើនយោបាយឡើងវិញ ឬក៏ត្រូវប្រកាន់យកសីលធម៌នយោបាយ?
លោកបញ្ជាក់ថា “បើគិតពីសីលធម៌នយោបាយ ច្បាស់ជាអត់មានសិទ្ធិធ្វើនយោបាយទេ មានន័យថា អត់ទាំងពីរ។ តែបើជ្រើសរើសយកសិទ្ធិធ្វើនយោបាយ នោះនឹងមានសីលធម៌នយោបាយតាមក្រោយ”។
លោក សុខ ឥសាន លើកឡើងដែរថា ”បញ្ហាដែលគួរកត់សម្គាល់ តាំងពីដើមមក អតីតបក្សប្រឆាំងមិនដែលគិតពីសីលធម៌នយោបាយទេ។ បើចេះគិតពីសីលធម៌នយោបាយ ម្ល៉េះមិនមានកើតឡើងនូវហានិភ័យដល់បក្សប្រឆាំងនេះឡើយ។ ឥឡូវដល់ដំណាក់កាលនេះទៅហើយ ចង់យកមួយណាក៏បាន ស្រេចលើសិទ្ធិរបស់ម្នាក់ៗទេ។ តែបើជ្រើសរើសខុសកុំមកបន្ទោសអ្នកដទៃឲ្យសោះ គឺជារឿងរបស់ឯងហើយកុំចោទថា គេបិទសិទ្ធិនយោបាយខ្លួន ។ បើនៅអែអង់ប្រយ័ត្នកប៉ាល់ចេញចោល”៕
Source: Kampuchea Thmey Daily
0 Comments