សៀមរាប ៖ លោកឧត្ដមសេនីយ៍ត្រី ហួត សុធី ស្នងការរងទទួលផែនការងារសន្តិសុខ នៃស្នងការដ្ឋាននគរបាលខេត្តសៀមរាបបានឲ្យដឹង នៅព្រឹកថ្ងៃទី២៦ ខែមីនា ឆ្នាំ២០១៩នេះថា ជនសង្ស័យ ម្ចាស់ Account Facebook ឈ្មោះ «Ong sonAn» ដែលយករូបទង់ជាតិកម្ពុជា សរសេរ ពាក្យប្រមាថ ថា (ឆ្កែ) ហើយបង្ហោះ នៅលើបណ្តាញសង្គមហ្វេសប៊ុក ត្រូវបានកម្លាំងនគរបាលឃាត់ខ្លួនបញ្ជូនទៅដល់ សាលាដំបូងខេត្តសៀមរាប ហើយ។
លោកបន្តថា ជនសង្ស័យរូបនេះត្រូវបានហៅមកសួរនាំ កាលថ្ងៃទី២៤ ខែមីនា ឆ្នាំ២០១៩កន្លងទៅ បន្ទាប់ពី បុគ្គលរូបនេះ បានសរសេរពាក្យប្រមាថនៅលើទង់ជាតិ នៃព្រះរាជាណាចក្រកម្ពុជា ហើយយកទៅបង្ហោះជាសាធារណៈនៅលើបណ្តាញសង្គមហ្វេសប៊ុក នាំឲ្យមានប្រតិកម្ម និងរិះគន់យ៉ាងកក្រើកពីសំណាក់មហាជន និងប្រជាពលរដ្ឋ ទូទាំងប្រទេស។
បន្ទាប់ពីមានប្រតិកម្ម ជនសង្ស័យរូបនេះ បានអះអាងថា Account Facebook របស់ខ្លួន ឈ្មោះ «Ong sonAn» ត្រូវបានគេ Hack តែអ្វីដែលសមត្ថកិច្ចយើងរកឃើញ គឺ មិនដូចការលើកឡើងរបស់ជនសង្ស័យរូបនេះឡើយ។
យោងតាមការស្រាវជ្រាវ និង ពាក្យបណ្ដឹង របស់តំណាងដើមបណ្តឹង ជនសង្ស័យ និងសំណុំរឿង ត្រូវបាន នគរបាលផែនសន្តិសុខ នៃស្នងការដ្ឋាននគរបាលខេត្តសៀមរាប បញ្ជូនទៅតុលាការ ដើម្បីចាត់ការ តាមនីតិវិធីច្បាប់ នៅព្រឹកថ្ងៃទី២៦មីនា នេះ។
លោកឧត្ដមសេនីយ៍ត្រី ហួត សុធី ស្នងការរងទទួលផែនការងារសន្តិសុខ នៃស្នងការដ្ឋាននគរបាលខេត្តសៀមរាបបានបញ្ជាក់ថា រាល់ការលេងហ្វេសប៊ុករបស់បងប្អូនទាំងអស់ ត្រូវលេងឲ្យត្រូវនឹងច្បាប់ និងមានក្រមសីលធម៌ផង បើមិនដូច្នោះទេ នឹងត្រូវប្រឈមនឹងផ្លូវច្បាប់ជាក់ជាមិនខាន៕
Source: Kampuchea Thmey Daily
0 Comments