ក្រសួងការបរទេសកម្ពុជា កំពុងដំណើរការសន្និបាតបូកសរុបការងារប្រចាំឆ្នាំរបស់ខ្លួន រយៈពេល៣ថ្ងៃ

Cambodia News March 05, 2019

ភ្នំពេញ ៖ នៅវេលាម៉ោង៨ព្រឹក ថ្ងៃទី០៥ ខែមីនា ឆ្នាំ២០១៩នេះ ក្រសួងការបរទេស និងសហប្រតិបត្តិការអន្តរជាតិកម្ពុជា បាននិងកំពុងរៀបចំសន្និបាតបូកសរុបការងារប្រចាំឆ្នាំ និងលើកទិសដៅសម្រាប់ថ្ងៃខាងមុខ រយៈពេល៣ថ្ងៃ ក្រោមអធិបតីភាពឯកឧត្ដមឧបនាយករដ្ឋមន្ត្រី ប្រាក់ សុខុន ហើយបើតាមកម្មវិធីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីនៅក្នុងពិធីបិទសន្និបាត។

សន្និបាតប្រចាំឆ្នាំនេះ មានការចូលរួមរបស់ថ្នាក់ដឹកនាំ និងមន្ត្រីរបស់ក្រសួង ក៏ដូចជាឯកអគ្គរាជទូត តំណាងអចិន្ត្រៃយ៍ និងអគ្គកុងស៊ុលរបស់កម្ពុជាយ៉ាងច្រើន។ ក្នុងក្របខ័ណ្ឌនៃសន្និបាតប្រចាំឆ្នាំនេះ ក្រសួងការបរទេស និងសហប្រតិបត្តិការអន្តរជាតិ នឹងពិនិត្យឡើងវិញពីសមិទ្ធផល និងការប្រឈមនានា នៅក្នុងឆ្នាំ២០១៨ ព្រមទាំងកំណត់ទិសដៅសម្រាប់ឆ្នាំ២០១៩។

តាមការបញ្ជាក់ពីក្រសួងការបរទេស សន្និបាតប្រចាំឆ្នាំនេះ គឺជាកាលានុវត្តភាពសម្រាប់អ្នកការទូតកម្ពុជា ដើម្បីពង្រីកចំណេះដឹងឲ្យ កាន់តែទូលំទូលាយ ឧទ្ទេសនាមដោយវាគ្មិនសំខាន់ៗ លើបញ្ហាជាសារវន្តពាក់ព័ន្ធនឹង “យុទ្ធសាស្ត្រចតុកោណដំណាក់កាលទី៤ នៃរាជរដ្ឋាភិបាលកម្ពុជា” “ការជំរុញការទូតសេដ្ឋកិច្ច ទេសចរណ៍ និងវប្បធម៌” និង “ជំហររបស់កម្ពុជា លើបញ្ហាការប្រែប្រួលអាកាសធាតុ” ដែលនឹងលើកកម្ពស់បន្ថែមទៀតដល់ចំណេះដឹងជាក់ស្ដែង ធ្វើឲ្យស៊ីជម្រៅកម្រិតវិភាគ និងការយល់ដឹងទូលំទូលាយដល់អ្នកការទូតកម្ពុជា ក្នុងការបំពេញភារកិច្ចប្រកបដោយប្រសិទ្ធភាព៕