បាត់ដំបង ៖ បុរសម្នាក់ បានរងរបួសពេញផ្ទៃមុខ និងក្បាល និងបានស្លាប់ភ្លាមៗនៅនឹងកន្លែងកើតហេតុ យ៉ាងរន្ធត់ជាទីបំផុត ខណៈដែលជនរងគ្រោះរូបនេះ បានបើកបរម៉ូតូក្នុងល្បឿនលឿន ព្រមទាំងបានបុកទៅលើគូទត្រាក់ទ័រដែលចតលើចិញ្ចើមផ្លូវ និងគ្មានដាក់សញ្ញាអ្វីជាសម្គាល់។
នៅវេលាម៉ោង៦ និង ៤០នាទី ព្រលប់ថ្ងៃទី៥ ខែមីនា ឆ្នាំ២០១៩ នៅលើកំណាត់ផ្លូវជាតិលេខ៥៩ ត្រង់ចំណុច ក្រុមទី០៤ ភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង មានករណីគ្រោះថ្នាក់ ចរាចរណ៍មួយ បានកើតឡើងរវាងត្រាក់ទ័រ និង ម៉ូតូ ដែលបង្កអោយមានមនុស្សម្នាក់ស្លាប់។
ប្រភពនៅទីនោះបាននិយាយថា នៅមុនពេលកើតហេតុគឺមានត្រាក់ទ័រ ១ គ្រឿង ម៉ាកហ្វត ពណ៌ខៀវ ដែលជាកម្មសិទ្ធិរបស់ឈ្មោះ វ៉ាត សារីម ភេទប្រុស អាយុ ២៥ ឆ្នាំ រស់នៅភូមិអូរសាលើ ឃុំបឹងរាំង ស្រុកកំរៀង បានបើកបរមកឈប់សំចតត្រង់ចំណុចខាងលើ ដោយមិនបានដាក់សញ្ញាអ្វីសម្គាល់នោះឡើយ។
សាក្សីបានបន្តថា ភ្លាមៗនោះដែរស្រាប់តែមានម៉ូតូ ១ គ្រឿង ដែលបើកបរដោយ ឈ្មោះ នី សារិ ភេទប្រុស អាយុ ៣៣ឆ្នាំ មុខរបរកសិករ រស់នៅ ភូមិស្វាយជ្រុំ ឃុំ អូរដា ស្រុកកំរៀង បានធ្វើដំណើរយ៉ាងលឿន ក្នុងទិសដៅពីកើតទៅលិច(ស្របគ្នា ) បានបុកចំពីក្រោយបណ្តាលអោយបែកក្បាល និងមុខ មាត់ ស្លាប់ ភ្លាមមួយរំពេចនៅនឹងកន្លែង ទើបធ្វើអោយ មានការភ្ញាក់ផ្អើលតែម្តង។
នៅមុនពេលសមត្ថកិច្ចជំនាញចុះទៅដល់ អ្នកបើកបរត្រាក់ទ័របានរត់គេចខ្លួនបាត់ស្រមោលទៅហើយ ដោយឡែកសព ក៏ត្រូវបានប្រគល់ទៅអោយក្រុមគ្រួសារ ដើម្បីរៀបចំធ្វើបុណ្យតាមប្រពៃណីដែរ រីឯមធ្យោបាយទាំង ២ ក៏បាននាំយកទៅរក្សាទុកនៅអធិការដ្ឋានជាបណ្ដោះអាសន្នដែរ៕
Source: Kampuchea Thmey Daily
0 Comments