ស្ថាប័នអប់រំ IDP កម្ពុជា រៀបចំកម្មវិធីពិព័រណ៍ការសិក្សា និងអាហារូបករណ៍ នៅអូស្ត្រាលី

ភ្នំពេញ ៖ ស្ថាប័នអប់រំ IDP កម្ពុជា បានរៀបចំកម្មវិធីពិព័រណ៍ការសិក្សា និងអាហារូបករណ៍ នៅអូស្ត្រាលី កាលពីថ្ងៃទី០៧ ខែមីនា ឆ្នាំ២០១៩ នៅសណ្ឋាគារដឹ ហ្ក្រេត ឌ្យូក ភ្នំពេញដើម្បីផ្តល់ការប្រឹក្សាផ្ទាល់ និងបង្ហាញនូវជម្រើសសិក្សានានា នៅប្រទេសអូស្ត្រាលីទៅកាន់ សិស្សានុសិស្ស និងមាតាបិតា។

កម្មវិធីពិព័រណ៍ពីការសិក្សា និងអាហារូបករណ៍នៅអូស្ត្រាលី គឺជាវេទិកាការសិក្សាដ៏ធំមួយប្រចាំឆ្នាំនៅប្រទេសកម្ពុជា ដែលមានការចូលរួមពីស្ថាប័នអប់រំអូស្ត្រាលីចំនួន៣៩ និងមានសិស្ស និស្សិត និងអាណាព្យាបាលច្រើនជាង៨០០នាក់ បានមកជួបពិភាក្សាផ្ទាល់ជាមួយស្ថាប័នអប់រំអូស្ត្រាលី ដើម្បីស្វែងយល់ព័ត៌មានអំពីជម្រើសសិក្សាគ្រប់កម្រិតចាប់ពីថ្នាក់វិទ្យាល័យ ថ្នាក់អប់រំវិជ្ជាជីវៈវគ្គខ្លី និងកម្មវិធីសិក្សាថ្នាក់សាកលវិទ្យាល័យ ក៏ដូចជាព័ត៌មានអំពីអាហារូបករណ៍ដែលពាក់ព័ន្ធ និងតម្រូវការទិដ្ឋាការផ្សេងៗ។ ការផ្តល់ប្រឹក្សាទៅសិក្សានៅបរទេសរបស់ស្ថាប័ន IDP គឺមិនតម្រូវឲ្យបង់ប្រាក់ទេ។
IDP Education គឺជាស្ថាប័នធំជាងគេបង្អស់លើពិភពលោកដែលបានដើរតួនាទីក្នុងការបញ្ជូនសិស្ស និស្សិត ទៅសិក្សានៅប្រទេសអូស្ត្រាលី អង់គ្លេស នូវែលហ្សេឡង់ កាណាដា អាមេរិក និងអៀរឡង់ជាមួយនឹងការិយាល័យជាង១០០ នៅច្រើនជាង៣២ប្រទេស ជុំវិញពិភពលោក។

លោក ម៉ៅ ស្រេង នាយកស្ថាប័នអប់រំIDP ប្រចាំប្រទេសកម្ពុជាបានមានប្រសាសន៍ថា «ជាច្រើនទសវត្សមកហើយ ដែលប្រទេសអូស្ត្រាលី ជាទិសដៅសិក្សាមួយដែលមានប្រជាប្រិយភាពសម្រាប់សិស្ស និស្សិត និងអាណាព្យាបាលកម្ពុជា សម្រាប់ឲ្យពួកគេជ្រើសរើសទៅបំពេញក្តីស្រមៃការសិក្សា និង ត្រួសត្រាយផ្លូវឆ្ពោះទៅរក អាជីពដែលពួកគេប្រាថ្នា នៅពេលពួកគេត្រឡប់មកប្រទេសកម្ពុជាវិញ។ ប្រទេសអូស្ត្រាលីផ្តល់ឲ្យសិស្ស និស្សិតនៅការអប់រំប្រកបដោយស្តង់ដារពិភពលោកគ្រប់កម្រិត និងត្រូវបានគេទទួលស្គាល់ជាអន្តរជាតិ។»

លោក Luke Arnold ឯកអគ្គរដ្ឋទូតរងអូស្ត្រាលីប្រចាំនៅកម្ពុជា នៅក្នុងកម្មវិធីបើកដំណើរការ នៃកម្មវិធីពិព័រណ៍ពីការសិក្សា និងអាហារូបករណ៍ នៅអូស្ត្រាលីបានមានប្រសាសន៍ថា «ខ្ញុំបាទមានកិត្តិយសសូមធ្វើការថ្លែងអំណរគុណដល់ស្ថាប័ន IDP ក្នុងការរៀបចំកម្មវិធីបែបនេះឡើង។

កម្មវិធីបែបនេះ នៅតែបន្តជាឱកាសល្អប្រសើរសម្រាប់សិស្ស និស្សិតកម្ពុជា និងអាណាព្យាបាល ក្នុងការជួបជាមួយនឹងតំណាងស្ថាប័នជាច្រើន។ ខ្ញុំក៏សូមអរគុណដល់អ្នកតំណាងស្ថាប័នអប់រំដែលមានវត្តមាននៅទីនេះ ពីព្រោះកម្មវិធីនេះនឹងមិនអាចប្រព្រឹត្តទៅបាន ប្រសិនបើគ្មានការបន្តគាំទ្រ និងចូលរួមរបស់អ្នកតំណាងស្ថាប័នអប់រំ។»

ដោយឡែក មជ្ឈមណ្ឌលអូស្ត្រាលីសម្រាប់ការបណ្ដុះបណ្ដាល (ACE) ក៏មានវត្តមានក្នុងកម្មវិធីនេះដែរ និងបានផ្តល់នូវព័ត៌មានទាក់ទងនឹងការសិក្សាភាសាអង់គ្លេស ដើម្បីត្រៀមខ្លួនបំពេញលក្ខខណ្ឌ របស់ស្ថាប័នអប់រំអូស្ត្រាលី។ មន្ត្រីមណ្ឌលប្រលង IELTS ប្រចាំប្រទេសកម្ពុជា ក៏បានចូលរួម ផ្តល់ប្រឹក្សាពីការចុះឈ្មោះប្រលង និងប្រព័ន្ធតេស្ត IELTS CDI ថ្មី។

ជាមួយនឹងប្រព័ន្ធថ្មីនេះ សាធារណជនអាចធ្វើការជ្រើសរើសធ្វើតេស្ត IELTS តាមប្រព័ន្ធកុំព្យូទ័រ។ប្រព័ន្ធតេស្ត IELTS CDI នេះ ត្រូវបានគេរំពឹងទុកថានឹងក្លាយជាជម្រើសតេស្តងាយស្រួលដែល ធ្វើឲ្យតម្រូវការតេស្តIELTS កើនឡើងជុំវិញពិភពលោក ក៏ដូចជាធ្វើឲ្យបេក្ខជនប្រលង មានសមត្ថភាពប្រើប្រាស់បច្ចេកវិទ្យាដែលកំពុងរីកចម្រើន៕