នាយឧត្ដមសេនីយ៍ កែ គឹមយ៉ាន ជំរុញដល់សមត្ថកិច្ចពាក់ព័ន្ធ ត្រូវតែចូលរួមអនុវត្ត នូវគោលនយោបាយភូមិ-ឃុំមានសុវត្ថិភាព ឲ្យបានម៉ឺងម៉ាត់បន្ថែមទៀត

ប៉ៃលិន ៖ ថ្លែងក្នុងពិធីបិទសន្និបាតបូកសរុបលទ្ធផលការងារ ប្រចាំឆ្នាំ២០១៨ និងលើកទិសដៅការងារឆ្នាំ២០១៩ របស់រដ្ឋបាលខេត្តប៉ៃលិន នាព្រឹកថ្ងៃទី០៧ ខែមីនា ឆ្នាំ២០១៩ ឯកឧត្ដម នាយឧត្ដមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានជំរុញដល់សមត្ថកិច្ចពាក់ព័ន្ធគ្រប់ជាន់ថ្នាក់ ត្រូវតែចូលរួមអនុវត្ត នូវគោលនយោបាយភូមិ-ឃុំមានសុវត្ថិភាព ឲ្យបានម៉ឺងម៉ាត់ លើកិច្ចការងាររក្សាសន្តិសុខ ជូនប្រជាពលរដ្ឋក្នុងមូលដ្ឋាន។

ពិធីនេះដែរ មានការអញ្ជើញចូលរួមពី ឯកឧត្ដម ឡី ចាន់ឆាយ ប្រធានក្រុមប្រឹក្សាខេត្ត ឯកឧត្តម ផាន់ ចាន់ធុល អភិបាលខេត្ត ,គណៈប្រតិភូអមគណៈអធិបតី ,ព្រះរាជអាជ្ញា សមត្ថកិច្ចទាំងបីស្ថាប័ន, ប្រធាន អនុប្រធានមន្ទីរជុំវិញខេត្ត ,ចៅសង្កាត់ មេឃុំ ចូលរួមជាង២០០នាក់។

ឯកឧត្តម ផាន់ ចាន់ធុល អភិបាលខេត្ត បានរាយការណ៍ពីសមិទ្ធផល ដែលសម្រេចបាននាឆ្នាំ២០១៨កន្លងទៅ ដោយក្នុងនោះមានដូចជាផ្លូវថ្នល់ សាលារៀន ស្រះអណ្តូងទឹក ត្រូវបានផ្តល់ជូនប្រជាពលរដ្ឋស្ទើរគ្រប់ទីកន្លែង រួមនឹងការផ្តល់សេវាសាធារណៈផ្សេងៗ។

ឯកឧត្ដមបន្តថា ជាមួយនឹងសមិទ្ធផល ដែលយើងទទួលបាន តែយើងក៏នូវជួបបញ្ហាប្រឈមខ្វះខាតទឹកប្រើប្រាស់ ដែលតំបន់មួយចំនួននៅក្នុងខេត្តកំពុងតែមានការខ្វះខាត់ទឹកជាបណ្តើៗផងដែរ។

ថ្លែងក្នុងឱកាសនោះដែរ តាំងនាម រាជរដ្ឋាភិបាល នាយឧត្ដមសេនីយ៍ កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានពាំនាំការសួរសុខទុក្ខ និងការកោតសរសើរ ជូនពរសមត្ថកិច្ចគ្រប់លំដាប់ថ្នាក់ ព្រមទាំងប្រជាពលរដ្ឋទូទាំងខេត្តប៉ៃលិន ដែលបានចូលរួមជាមួយរាជរដ្ឋាភិបាល ក្នុងការកសាង និងថែរក្សាសន្តិភាព ព្រមទាំងការអភិវឌ្ឍប្រទេសជាតិ ដែលបានធ្វើឲ្យខេត្តប៉ៃលិន ប្រែក្លាយពីតំបន់ប្រយុទ្ធ ទៅជាតំបន់ ដែលមានការអភិវឌ្ឍលើគ្រប់វិស័យ។

ឯកឧត្តម នាយឧត្ដមសេនីយ៍ គណៈអធិបតី ក៏បានដាក់ចេញនូវអនុសាសន៍ របស់ សម្តេចតេជោ នាយករដ្ឋមន្ត្រី ដែលបានប្រកាសនៅក្នុងគណៈរដ្ឋមន្ត្រីលើកទី១ សម្រាប់នីតិកាលទី៦ នៃរដ្ឋសភា ដោយមានយុទ្ធសាស្ត្រចំនួន៤ រួមមាន ៖
ទី១-ធានាឲ្យបាននូវសេដ្ឋកិច្ចជាតិ អត្រាមធ្យមប្រចាំឆ្នាំក្នុងរង្វង់៧%។
ទី២-ការបង្កើនការងារឲ្យបានច្រើនទាំងបរិមាណ និងគុណភាពសម្រាប់ប្រជាពលរដ្ឋ ពិសេស បងប្អូនប្រជាពលរដ្ឋយើង យុវជនយើងមានមុខរបរ មានការងារធ្វើ មានចំណូលក្នុងការផ្គត់ផ្គងជីវភាពគ្រួសារ។
ទី៣-សម្រេចឲ្យបាននូវគោលដៅ នៃការកាត់បន្ថយភាពក្រីក្រឲ្យស្ថិតនៅអត្រាទាបជាង១០% និងមិនឲ្យភាពក្រីក្រត្រលប់មកវិញ។
ទី៤-ពង្រឹងសមត្ថភាព និងអភិបាលកិច្ច នៃស្ថាប័នរដ្ឋទាំងថ្នាក់ជាតិ និងថ្នាក់ក្រោមជាតិ ដើម្បីបម្រើប្រជាពលរដ្ឋ ដឹងសុខដឹងទុករបស់ប្រជាពលរដ្ឋ។

ជាមួយគ្នានេះដែរ ឯកឧត្ដម នាយឧត្ដមសេនីយ៍ ក៏បានជំរុញដល់សមត្ថកិច្ចពាក់ព័ន្ធគ្រប់ជាន់ថ្នាក់ ត្រូវតែចូលរួមអនុវត្ត នូវគោលនយោបាយភូមិ-ឃុំមានសុវត្ថិភាពឲ្យបានម៉ឺងម៉ាត់ លើកិច្ចការងាររក្សាសន្តិសុខជូនប្រជាពលរដ្ឋក្នុងមូលដ្ឋានឲ្យបានល្អ ត្រូវលុបបំបាត់ភាពអសកម្មនៅក្នុងមូលដ្ឋានកុំឲ្យកើតមានឡើង ដូចជា ៖ ល្បែងស៊ីសង ក្មេងទំនើង ចរាចរណ៍ និងប្រើប្រាស់គ្រឿងញៀនជាដើម ដែលបញ្ហាទាំងនេះ សមត្ថកិច្ច អាជ្ញាធរមូលដ្ឋាន ត្រូវមានការសហការគ្នា ពិសេសចុះមូលដ្ឋានឲ្យបានជាប្រចាំ ហើយស្ថាប័នពាក់ព័ន្ធ ត្រូវស្ថាប័នពាក់ព័ន្ធ ត្រូវត្រៀមឲ្យបានជាស្រេច ដើម្បីជួយសង្គ្រោះ និងដោះស្រាយទឹក ជូនប្រជាពលរដ្ឋឲ្យបានទាន់ពេលវេលា នូវបញ្ហាគ្រោះធម្មជាតិ ដែលកើតមានឡើងនៅឆ្នាំ២០១៩នេះផងដែរ៕