ភ្នំពេញ ៖ ក្នុងនាមលោកអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ បានទទួលជួបពិភាក្សាការងារជាមួយក្រុមបេសកកម្មការងារនៃមូលនិធិរូបិយវត្ថុអន្តរជាតិ ដែលដឹកនាំដោយលោក Jarkko Turunen ដែលជាប្រធានក្រុមបេសកកម្ម ព្រមទាំងចូលរួមដោយ លោកស្រី Eteri Kvintrade សេដ្ឋវិទូជាន់ខ្ពស់នៃនាយកដ្ឋានអាស៊ីប៉ាស៊ីហ្វិក, លោក David Corvino សេដ្ឋវិទូនៃនាយកដ្ឋានអាស៊ីប៉ាស៊ីហ្វិក, លោកស្រី Lisa Uemae សេដ្ឋវិទូពីការិយាល័យតំបន់អាស៊ីប៉ាស៊ីហ្វិក និងលោកស្រី Matanee Satraphai សេដ្ឋវិទូពីការិយាល័យអភិវឌ្ឍន៍សមត្ថភាពនៃប្រទេសថៃ (CDOT) កាលពីរសៀលថ្ងៃទី ២៧ ខែ មីនា ឆ្នាំ២០១៩ នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
ក្នុងនាមក្រុមការងារ លោក Jarkko Turunen បានជម្រាបជូនលោករដ្ឋលេខាធិការប្រចាំការ វង្សី វិស្សុត ពីគោលបំណងនៃបេសកកម្មការងារនៅកម្ពុជាពីថ្ងៃ២៧ មីនា - ០២ មេសា ២០១៩ ដែលមានលក្ខណៈស្រដៀងគ្នាទៅនឹងឆ្នាំកន្លងៗទៅ ដោយផ្តោតលើការវាយតម្លៃសេដ្ឋកិច្ច និងការអនុវត្តគោលនយោបាយហិរញ្ញវត្ថុសាធារណៈ ព្រមទាំងទស្សនវិស័យរយៈពេល មធ្យមខាងមុខ, កិច្ចប្រឹងប្រែងលើការងារប្រមូលចំណូល, ភាពប្រុងប្រយ័ត្ននៃការអនុវត្តវិធានការសារពើពន្ធផ្សេងៗ, វឌ្ឍនភាពនៃការអនុវត្តការងារកែទម្រង់របស់រាជរដ្ឋាភិបាល, គោលនយោបាយអាទិភាពសំខាន់ៗ ព្រមទាំងការពង្រឹងសមត្ថភាពមន្ត្រីរបស់ក្រសួងសេដ្ឋកិច្ច និងហិរញ្ញវត្ថុ។ ទន្ទឹមនេះ ក្រុមការងារក៏បានជម្រាបជូន បន្ថែមពីបច្ចុប្បន្នភាព នៃនិន្នាការសេដ្ឋកិច្ចសកល, ការកើនឡើងនូវភាពមិនច្បាស់លាស់ ដែលកើតចេញពីភាពតានតឹងនៃសង្គ្រាមពាណិជ្ជកម្មរវាងសហរដ្ឋអាមេរិក និងចិន, ការចាកចេញរបស់អង់គ្លេសពីសហភាពអឺរ៉ុប និងការថមថយលឿនជាងការរំពឹងទុកនៃសេដ្ឋកិច្ចចិន... ជាដើម។
លោករដ្ឋលេខាធិការប្រចាំការ វង្សី វិស្សុត បានសម្តែងនូវការកោតសរសើរ និងវាយតម្លៃខ្ពស់ចំពោះសមិទ្ធផលការងារកន្លងមករបស់ក្រុមការងារមូលនិធិរូបិយវត្ថុអន្តរជាតិ លើការវាយតម្លៃពីស្ថានភាពម៉ាក្រូសេដ្ឋកិច្ច និងការអនុវត្តគោលនយោបាយហិរញ្ញវត្ថុសាធារណៈ ដោយមានការដាក់ចេញនូវអានុសាសន៍គោលនយោបាយល្អៗ និងចាំបាច់ ដើម្បីជួយតម្រង់ទិសក្នុងការអភិវឌ្ឍសេដ្ឋកិច្ចកម្ពុជាឱ្យកាន់តែប្រសើរឡើង។ លោករដ្ឋលេខាធិការប្រចាំការ ក៏បានជម្រាបជូន ដល់ក្រុមបេសកកម្មនៃមូលនិធិរូបិយវត្ថុអន្តរជាតិផងដែរ ពាក់ព័ន្ធនឹងការងារគ្រប់គ្រងម៉ាក្រូសេដ្ឋកិច្ច និងថវិកា របស់រាជរដ្ឋាភិបាលកម្ពុជា ជាពិសេសការងារកែមទ្រង់ប្រព័ន្ធថវិកា ក៏ដូចជាការរៀបចំនូវឯកសារយុទ្ធសាស្ត្រសំខាន់ៗ មានដូចជា យុទ្ធសាស្ត្រកៀរគរចំណូលរយៈពេលមធ្យម, យុទ្ធសាស្ត្រកែទម្រង់ប្រព័ន្ធថវិកាថ្នាក់ក្រោមជាតិ និងយុទ្ធសាស្ត្រកែទម្រង់ប្រព័ន្ធលទ្ធកម្មសាធារណៈ ។ល។
ទន្ទឹមនឹងនេះដែរ លោកក៏បានជម្រាបជូនក្រុមការងារពីការកើនឡើងនូវតម្រូវការកសាង និងពង្រឹងសមត្ថភាពការងាររបស់មន្ត្រីក្រសួងសេដ្ឋកិច្ច និងហិរញ្ញវត្ថុ និងស្នើសុំការបន្តកិច្ចសហប្រតិបត្តិការល្អរវាងក្រសួងសេដ្ឋកិច្ច និងហិរញ្ញវត្ថុ និងមូលនិធិរូបិយវត្ថុអន្តរជាតិ តាមរយៈការបន្តផ្តល់ការបណ្តុះបណ្តាលបន្ថែមទៀតទាំងក្នុងស្រុក និងក្រៅប្រទេស៕
Source: Kampuchea Thmey Daily
0 Comments