ស្ត្រីជនជាតិឥណ្ឌូនេស៊ីម្នាក់ ដែលត្រូវបានចោទប្រកាន់ពីបទឃាតកម្មលើបងប្រុសម្តាយទីទៃរបស់មេដឹកនាំកូរ៉េខាងជើងគឺត្រូវបានដោះលែងនៅថ្ងៃចន្ទ បន្ទាប់ពីព្រះរាជអាជ្ញាម៉ាឡេស៊ីបានទម្លាក់ការចោទប្រកាន់ករណីឃាតកម្មប្រឆាំងនឹងនាង។ នេះជាការសម្រេចចិត្តដ៏គួរភ្ញាក់ផ្អើលមួយក្នុងរយៈពេលមួយឆ្នាំកន្លះបន្ទាប់ពីនាងត្រូវបានគេជំនុំជម្រះក្តី។
នាង Siti Aisyah បានញញឹមនៅពេលនាងដើរកាត់អ្នកកាសែតជាច្រើននាក់ហើយចូលទៅក្នុងរថយន្តមួយគ្រឿងនៅខាងក្រៅតុលាការដែលជាកន្លែងនាងត្រូវបានគេជំនុំជម្រះក្តីរួមជាមួយស្ត្រីវៀតណាមម្នាក់ពីបទសម្លាប់លោក Kim Jong Nam នៅព្រលានយន្តហោះក្រុងគូឡាឡាំពួរកាលពីខែកុម្ភៈឆ្នាំ២០១៧។
នាង Aisyah បាននិយាយថា “ខ្ញុំមានអារម្មណ៍សប្បាយចិត្ត។ ខ្ញុំមិនដឹងថារឿងនេះនឹងកើតឡើងនោះទេ។ ខ្ញុំមិនរំពឹងថា វានឹងកើតឡើងនោះទេ”។
វាគឺជាការភ្ញាក់ផ្អើលមួយនៅពេលតុលាការជាន់ខ្ពស់ Shah Alam ដែលស្ថិតនៅខាងក្រៅទីក្រុងគួឡាឡាំពួរស្តាប់តែសក្ខីកម្មរបស់នាង Huong ប៉ុណ្ណោះនៅថ្ងៃចន្ទ។ មេធាវីរបស់នាងបាននិយាយថា ពួកគេកំពុងស្វែងរកការពន្យារពេល។
ស្ត្រីក្នុងវ័យ២០ឆ្នាំទាំងពីរនាក់តែងតែបដិសេធការធ្វើឃាតដោយនិយាយថា ពួកគេជឿថា ពួកគេបានចូលរួមក្នុងកម្មវិធីពញ្ញាក់អារម្មណ៍មួយហើយត្រូវបានបោកបញ្ឆោតដោយភ្នាក់ងារកូរ៉េខាងជើងឲ្យអនុវត្តការវាយប្រហារយកស្ទីលសង្គ្រាមត្រជាក់ដោយប្រើប្រាស់សារធាតុគីមី VX ។
មេធាវីរបស់ពួកគេបានបង្ហាញពួកគេថាជាអ្នករងកំហុសពីគេដោយនិយាយថា អាជ្ញាធរមិនអាចចាប់ឃាតករពិតប្រាកដបានទេ។
ការកាត់ទោសដែលបានចាប់ផ្តើមនៅក្នុងខែតុលាឆ្នាំ២០១៧ត្រូវបន្តឡើងវិញនៅថ្ងៃចន្ទជាមួយនឹងដំណាក់កាលការពារនៃកិច្ចដំណើរការនីតិវិធីបន្ទាប់ពីការសម្រាកអស់រយៈពេលច្រើនខែ។
ប៉ុន្តែនៅពេលចាប់ផ្តើមសវនាការ ព្រះរាជអាជ្ញា Muhammad Iskandar Ahmad បានស្នើឲ្យការចោទប្រកាន់ករណីឃាតកម្មប្រឆាំងនឹងនាង Aisyah ត្រូវដកចេញហើយថា នាងត្រូវបានដោះលែងដោយមិនមានទោស។
ទោះបីជាយ៉ាងណាក៏ដោយ គាត់មិនបានប្រាប់មូលហេតុអ្វីឡើយ។
ចៅក្រម Azmin Ariffin បានប្រាប់តុលាការនៅពេលដែលគាត់យល់ព្រមសំណើថា “នាង Siti Aisyah ត្រូវបានដោះលែង។ ពេលនេះនាងអាចចាកចេញបាន”៕ AFP
Source: Kampuchea Thmey Daily
0 Comments