អគ្គរដ្ឋអាជ្ញារបស់ប្រទេសអ៊ីស្រាអែល បានប្រកាសកាលពីថ្ងៃព្រហស្បតិ៍ថា លោកមានបំណងប្តឹងចោទប្រកាន់លោកនាយករដ្ឋមន្ត្រី Benjamin Netanyahu ពីបទទទួលសំណូក ការលួចបន្លំនិងការរំលោភសេចក្តីទុកចិត្តក្នុងការសម្រេចចិត្តមួយ ដែលធ្វើឡើងត្រឹមតែប៉ុន្មានសប្តាហ៍ប៉ុណ្ណោះមុនការបោះឆ្នោតខែមេសា។
ការប្រកាសដែលគេរង់ចាំជាយូរមកហើយមួយនេះនឹងកាន់តែធ្វើឲ្យមានការរង្គោះរង្គើដល់យុទ្ធនាការនយោបាយនិងគំរាមកំហែងដល់ការក្តោបក្តាប់អំណាចដ៏យូររបស់លោក Netanyahu នៅទីកំពូលនៃនយោបាយរបស់ប្រទេសអ៊ីស្រាអែល។
អគ្គរដ្ឋអាជ្ញា Avichai Mandelblit បាននិយាយនៅក្នុងសេចក្តីថ្លែងការណ៍មួយថា លោកមានបំណងចោទប្រកាន់នាយករដ្ឋមន្ត្រីក្នុងសវនាការមួយដែលជាកន្លែងលោក Netanyahu នឹងត្រូវបានផ្តល់ឱកាសដើម្បីការពារខ្លួនមុនពេលដែលការចោទប្រកាន់ត្រូវបានដាក់។
ការប្រកាសនេះបានកើតឡើងមុនការបោះឆ្នោតថ្ងៃទី៩ខែមេសាដែលក្នុងនោះ លោក Netanyahu ត្រូវប្រឈមមុខនឹងការប្រកួតប្រជែងដ៏ស្វិតស្វាញពីសម្ព័ន្ធភាពនយោបាយនិយមកណ្ដាលដែលដឹកនាំដោយអតីតនាយអគ្គសេនាធិការយោធាលោក Benny Gantz ។
ទោះបីជាយ៉ាងណាក៏ដោយ នៅក្នុងសុន្ទរកថាតាមទូរទស្សន៍ពីលំនៅដ្ឋានជាផ្លូវការរបស់គាត់ប៉ុន្មានម៉ោងបន្ទាប់ពីសេចក្តីប្រកាសនេះ លោកនាយករដ្ឋមន្ត្រីបានច្រានចោលការចោទប្រកាន់នេះថាជា “ការព្យាយាមថ្កោលទោស” ក្នុងន័យចង់ផ្តួលរំលំគាត់។
ខណៈក្រុមអ្នកប្រឆាំងគាត់អំពាវនាវឲ្យគាត់លាលែងពីតំណែងនោះ គាត់បាននិយាយថា គាត់គ្រោងនឹងធ្វើជានាយករដ្ឋមន្ត្រីក្នុងរយៈពេលដ៏យូរខាងមុខថ្វីបើមានការចោទប្រកាន់ក៏ដោយ។
លោកបាននិយាយថា “ក្រុមឆ្វេងនិយមដឹងថា ពួកគេមិនអាចយកឈ្នះយើងក្នុងការបោះឆ្នោតបានទេដូច្នេះអស់រយៈពេល៣ឆ្នាំមកហើយដែលពួកគេបានធ្វើការថ្កោលទោសដែលមិនធ្លាប់មានពីមុនមកក្នុងគោលបំណងមួយគឺដើម្បីផ្តួលរំលំរដ្ឋាភិបាលស្តាំនិយមដែលខ្ញុំដឹកនាំ”។
គួរបញ្ជាក់ថា លោក Netanyahu បានកាន់តំណែងជានាយករដ្ឋមន្ត្រីអស់រយៈពេលប្រហែល១៣ឆ្នាំមកហើយ ហើយលោកកំពុងស្ថិតនៅលើផ្លូវដើម្បីយកឈ្នះបិតាស្ថាបនិកលោក David Ben-Gurion ជានាយករដ្ឋមន្ត្រីកាន់តំណែងយូរបំផុតរបស់ប្រទេសអ៊ីស្រាអែលប្រសិនបើគាត់ឈ្នះឆ្នោតនៅក្នុងខែមេសា៕ AFP
Source: Kampuchea Thmey Daily
0 Comments