រដ្ឋមន្ត្រីក្រសួង​ធនធានទឹក ជួបពិភាក្សា​ការងារ​ជាមួយ លោក Oh Yeun Kun អនុប្រធាន​សារ​ជីវ​កម្ម​វិស្វកម្ម Yooshin នៃ​សាធារណរដ្ឋ​កូរ៉េ

ភ្នំពេញ ​៖ លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម នៅ​ទីស្តីការក្រសួង កាលពី ព្រឹក​ថ្ងៃ​ពុធ ១៥​កើត ខែផល្គុន ឆ្នាំច សំរឹទ្ធិស័ក ព​.​ស ២៥៦២ ត្រូវ​នឹង​ថ្ងៃទី​២០ ខែមីនា ឆ្នាំ​២០១៩ បាន ទទួល​ជួបពិភាក្សា​ការងារ​ជាមួយ លោក Oh Yeun Kun អនុប្រធាន​សាជីវកម្ម​វិស្វកម្ម Yooshin នៃ​សាធារណរដ្ឋ​កូរ៉េ។

លោក រដ្ឋមន្ត្រី បាន​ជម្រាប​អំពី​ការ​ខិតខំ​ប្រឹងប្រែង​រប​ស់​ក្រសួង និង​កិច្ចការ​ចំពោះមុខ​ដែល​ត្រូវ​អនុវត្ត និង​អំពី​ការជួយ​គាំទ្រ​លើ​វិស័យ​ធនធានទឹក​ពី​សាធារណរដ្ឋ​កូរ៉េ ដើម្បី​រួមចំណែក​ជំរុញ​កំណើន​នៃ​ការអភិវឌ្ឍ​សេដ្ឋកិច្ច​កម្ពុជា​ជា​បន្តទៀត។



ក្រសួង​បាន​ឲ្យ​ដឹង​ថា នៅក្នុង​កិច្ចពិភាក្សា លោក Oh Yeun Kun បាន​បង្ហាញ​នូវ​សេចក្តី​រីករាយ​ដោយ​ឃើញ​អំពី​ភាព​រីកចម្រើន​នៃ​ប្រទេស​កម្ពុជា​នា​ពេល​បច្ចុប្បន្ន និង​បាន​វាយតម្លៃ​ខ្ពស់​អំពី​ការ​រួមចំណែក​នៃ​វិស័យ​ធនធានទឹក​ក្រោម​ការដឹកនាំ​ផ្ទាល់​របស់​លោក រដ្ឋមន្ត្រី ក្នុង​ដំណើរការ​អភិវឌ្ឍ​សេដ្ឋកិច្ចជាតិ ដែល​សម្រេច​បាន​រហូត​មកដល់ពេលនេះ​។ លោក​អនុប្រធាន​ជម្រាប​ថា សាជីវកម្ម​វិស្វកម្ម​របស់​លោក ពិត​ជាមាន​កិត្តិយស​ដោយ​ត្រូវ​បាន​ជ្រើសរើស​សម្រាប់​ជួយ​លើ​ផ្នែក​បច្ចេកទេស​ក្នុង​អនុវត្ត​គម្រោង​ក្រោម​ហិរញ្ញប្បទាន​នៃ​សាធារណរដ្ឋ​កូរ៉េ រួមមាន​គម្រោង​៖ ១)​សំណង់​ទំនប់ទឹក​សាលា​តា​អន នៅ​ស្រុក​ឯក​ភ្នំ ខេត្តបាត់ដំបង និង ២)​ការអភិវឌ្ឍន៍​ធារាសាស្ត្រ និង​កាត់បន្ថយ​ទឹកជំនន់​នៅ​ខេត្តបន្ទាយមានជ័យ ដោយ​លោក​ប្តេជ្ញា​ថា នឹង​ខិតខំ​បំពេញការងារ​ឲ្យ​សម្រេចបាន​តាម​ផែនការ​គ្រោងទុក​។

​លោក​រដ្ឋមន្ត្រី បាន​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង​រប​ស់​ក្រុមការងារ​បច្ចេកទេស​បម្រើ​ការងារ​ក្នុង​គម្រោង និង​សមិទ្ធផល​ការងារ​នៃ​គម្រោង​ដែល​សម្រេច​បាន​មកដល់​ពេលនេះ និង​បាន​ស្នើ​ឲ្យ​សាជីវកម្ម​វិស្វកម្ម​របស់លោក ត្រូវ​បំពេញ​តាម​គោលការណ៍​និង​បទដ្ឋាន​បច្ចេកទេស ដែល​បាន​កំណត់ និង​ត្រូវ​បន្ត​កិច្ចសហការ និង​ជួយ​ធ្វើ​ឲ្យ​គម្រោង​អនុវត្ត​ទទួលបាន​ជោគជ័យ និង​មាន​ប្រសិទ្ធភាព​ខ្ពស់ ដើម្បី​គាំទ្រ​ដល់​គោលបំណង​នៃ​គម្រោង​ដែល​បានកំណត់​។



សូម​ជម្រាប​ថា គម្រោង​សំណង់​ទំនប់ទឹក​សាលា​តា​អន មាន​គោលបំណង​សំខាន់ គឺ ១) ការ​បង្កើន​សមត្ថភាព​ស្រោចស្រព​លើ​ផ្ទៃដី​រាប់​ម៉ឺន​ហិកតា​នៅ​ប៉ែក​ខាងក្រោម ២) ដើម្បី​រក្សា​ស្ថេរភាព​ទឹក​ដើម្បី​បម្រើ​ដល់​ការប្រើប្រាស់​ទឹក​ស្អាត​សម្រាប់​ខេត្តបាត់ដំបង និង​៣) សម្រាប់​លើកកម្ពស់​សោភណ្ឌ​ភាព និង​ទាក់ទាញ​ទេសចរណ៍​បែប​ធម្មជាតិ​។ គម្រោង​នេះ ត្រូវ​អនុវត្ត​ក្នុង​រយៈពេល ០២​ឆ្នាំ (២០១៨-២០២០) ដែល​រហូតមក​ដល់​ពេល​នេះ វឌ្ឍនភាព​ការងារ គឺ​សម្រេចបាន​ប្រមាណ ២០​ភាគរយ។

ដោយឡែក​សម្រាប់​គម្រោង​អភិវឌ្ឍន៍​ធារាសាស្ត្រ និង​កាត់បន្ថយ​ទឹកជំនន់​នៅ​ខេត្តបន្ទាយមានជ័យ ក្នុង​គោលបំណង​ដើម្បី​កាត់បន្ថយ​ការខូចខាត​ដោយ​ទឹកជំនន់ និង​រាំងស្ងួត ព្រមទាំង​សាងសង់​ទំនប់​ពហុ​បំណង និង​ប្រឡាយ​ដើម្បី​បម្រើ​ឲ្យ​ការស្រោចស្រព និង​ការ​ផ្គត់ផ្គង់​ទឹក​ស្អាត​។ ចំពោះ​ដំណើរការ​នៃ​គម្រោង រហូតមកដល់​ពេលនេះ​គឺ​បាន​ចុះ​កិច្ចសន្យា​កាលពី​ខែកញ្ញា ឆ្នាំ​២០១៨ ហើយ​បច្ចុប្បន្នកំពុង​សិក្សា​គ្រោង​ប្លង់ និង​ចាប់ផ្តើម​ការងារ​សាងសង់​នាពេលខាងមុខ៕

Source: Kampuchea Thmey Daily