បន្ទាយមានជ័យ ៖ ប្រជាពលរដ្ឋប្រមាណជាង២.០០០នាក់ បានទទួលការយកចិត្តទុកដាក់ពិនិត្យ និងព្យាបាលជំងឺដោយឥតគិតថ្លៃពីសំណាក់សមាគមគ្រូពេទ្យស្ម័គ្រចិត្តយុវជន សម្តេចតេជោ(TYDA) ដែលសកម្មភាពមនុស្សធម៌ ដឹកនាំដោយលោកស្រី ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគម រួមនឹងក្រុមការងារកម្លាំងស្ម័គ្រចិត្តមនុស្សធម៌ អាជ្ញាធរ យុវជន យោធិនពិការ និងគ្រួសារ ព្រមទាំងប្រជាពលរដ្ឋជាង២.០០០នាក់។
លោកស្រី ពេជ ចន្ទមុន្នី ហ៊ុនម៉ាណែត បានមានប្រសាសន៍ថា សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានយកចិត្តទុកដាក់ចំពោះយោធិនពិការ យោធិនចូលនិវត្តន៍ និងគ្រួសារ ព្រមទាំងប្រជាពលរដ្ឋ ក្នុងមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ តាមរយៈគោលនយោបាយរបស់រាជរដ្ឋាភិបាល ក្នុងការឧបត្ថម្ភ សម្ភារៈ ថវិកា ការយកទុកដាក់លើកកម្ពស់សុខុមាលភាព និងគោលរបបផ្សេងៗ ចំពោះពួកគាត់ដែលបានលះបង់អ្វីគ្រប់យ៉ាងក្នុងបុព្វហេតុការពារបូរណភាពទឹកដី និងស្វែងរកសុខសន្តិភាពជូនជាតិមាតុភូមិមកដល់សព្វថ្ងៃនេះ។
លោកស្រីបន្តថា កងទ័ពសម័យនេះ សំណាងជាងកងទ័ពជំនាន់មុន ព្រោះបានរស់នៅក្នុងសុខសន្តិភាព ដែលកងទ័ពជាងមុនបានខិតខំលះបង់ស្វែងរកសុខសន្តិភាពបន្សល់ទុកដល់សព្វថ្ងៃ។
ចំណែក លោក លី សារី អភិបាលរង នៃគណៈអភិបាលខេត្តបន្ទាយមានជ័យ បានថ្លែងអំណរគុណចំពោះ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានយកចិត្តទុកដាក់ចំពោះយោធិន យោធិនពិការ អតីតយុទ្ធជន និងគ្រួសារយោធិន ព្រមទាំងប្រជាពលរដ្ឋ ក្នុងមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ ការឧបត្ថម្ភ សម្ភារៈ ថវិកា ការសាងសង់ផ្ទះ អណ្តូងទឹក ការយកទុកដាក់លើកកម្ពស់សុខុមាលភាព និងគោលរបបផ្សេងៗជាច្រើនទៀត។
លោកអភិបាលរងខេត្ត ក៏បានថ្លែងអំណរគុណចំពោះសមាគមគ្រូពេទ្យស្ម័គ្រចិត្តយុវជន សម្តេចតេជោ (TYDA) និងផ្នែកដែលពាក់ព័ន្ធទាំងអស់ ដែលបានចូលរួមចំណែកក្នុងសកម្មភាពមនុស្សធម៌ក្នុងមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ។
សូមបញ្ជាក់ថា នៅថ្ងៃទី១០ ខែមីនា ឆ្នាំ២០១៩ នេះសមាគមគ្រូពេទ្យស្ម័គ្រចិត្តយុវជន សម្ដេចតេជោ (TYDA) បានចុះពិនិត្យព្យាបាលយោធិន យោធិនពិការ អតីតយុទ្ធជន និងគ្រួសារយោធិន ព្រមទាំងប្រជាពលរដ្ឋ ក្នុងមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ បានចំនួន២២៨៦នាក់ នឹងបញ្ជូនមកព្យាបាលបន្តចំនួន៣៥នាក់ ក្រោមការឧបត្ថម្ភដ៏ថ្លៃថ្លារបស់ សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន៕
Source: Kampuchea Thmey Daily
0 Comments