សហព័ន្ធកីឡាបាល់ទាត់អាស៊ាន (AFF) បានចាប់ពូលជ្រើសរើសគូប្រកួតរួចរាល់កាលពីពេលថ្មីៗ សម្រាប់កម្មវិធីប្រកួតក្នុងឆ្នាំ២០១៩ នេះខណៈក្រុមរបស់កម្ពុជា ស្ថិតនៅក្នុងពូលសុទ្ធជាមួយក្រុមខ្លាំង ស្របពេលពានរង្វាន់កម្រិតយុវជនក្រោមអាយុ១៦ឆ្នាំ AFF U16 Championship 2019 នឹងរៀបចំឡើងនៅប្រទេសវៀតណាម ហើយពានរង្វាន់យុវជនក្រោមអាយុ១៩ឆ្នាំ AFF U19 Championship 2019 ធ្វើឡើងនៅប្រទេសថៃ។
តាមគម្រោងពានរង្វាន់កម្រិតអាយុ១៦ឆ្នាំ AFF U16 Championship 2019 នឹងធ្វើឡើងចាប់ពីថ្ងៃទី២៧ ខែកក្កដាដល់ថ្ងៃទី០៩ ខែសីហា ឆ្នាំ២០១៩ លើទឹកដីរបស់ប្រទេសវៀតណាម ដោយមានប្រទេសចំនួន១២ចូលរួមដែលបែងចែកចេញជា ២ពូល ក្នុងនោះពូល A មានឥណ្ឌូណេស៊ី, មីយ៉ាន់ម៉ា,វៀតណាម,ទីម័រខាងកើត,សឹង្ហបុរីនិងហ្វីលីពីន ហើយពូល B ជាមួយ ថៃ,ម៉ាឡេស៊ី,កម្ពុជា,ឡាវ,ព្រុយណេ និងអូស្ត្រាលី។
ចំណែកពានរង្វាន់កម្រិត១៩ឆ្នាំ AFF U19 Championship 2019 វិញត្រៀមឡើងពីថ្ងៃទី០៥ ដល់១៨ ខែសីហា ឆ្នាំ២០១៩ នៅលើទឹកដីរបស់ប្រទេសថៃ ដោយមានប្រទេសចំនួន១២ចូលរួមដូចគ្នាដែរ។ ក្រុមទាំងអស់ត្រូវ បែងចែកចេញជា ២ពូលគឺពូល A មានមីយ៉ាន់ម៉ា,ឥណ្ឌូណេស៊ី,ឡាវ,ទីម័រខាងកើត,ហ្វីលីពីននិងប្រ៊ុយណេ ចំពោះពូល B វិញមានថៃ,ម៉ាឡេស៊ី,វៀតណាម,កម្ពុជា,សិង្ហបុរី និងអូស្ត្រាលី។
សូមរំលឹកថា ពានរង្វាន់ជើងឯកកម្រិតយុវជនប្រចាំតំបន់អាស៊ានទាំងអស់នេះ ត្រូវបានសហព័ន្ធកីឡាបាល់ទាត់អាស៊ាន រៀបចំឡើងជារៀងរាល់ឆ្នាំ ស្របពេលកាលពីឆ្នាំ២០១៨ កន្លងទៅ ពានយុវជនក្រោមអាយុ១៦ឆ្នាំជើងជើងឯកបានទៅក្រុមម្ចាស់ផ្ទះឥណ្ឌូណេស៊ី ក្រោយយកឈ្នះលើក្រុមថៃ នៅវគ្គផ្តាច់ព្រ័ត្រ ហើយពានរង្វាន់យុវជនក្រោមអាយុ១៩ឆ្នាំវិញជើងឯកបានទៅក្រុមម៉ាឡេស៊ី ក្រោយយកឈ្នះលើក្រុមមីយ៉ាន់ម៉ា នៅវគ្គផ្តាច់ព្រ័ត្រ៕
Source: Kampuchea Thmey Daily
0 Comments