ភ្នំពេញ ៖ យោងតាមរបាយការណ៍របស់គណៈបញ្ជាការឯកភាពខណ្ឌច្បារអំពៅបានឲ្យដឹងថា ការដាក់កម្លាំងត្រួតពិនិត្យអាវុធជាតិផ្ទុះ នៅតាមដងផ្លូវសំខាន់ៗក្នុងមូលដ្ឋានខណ្ឌ គឺរកឃើញអ្នកបើកបរយានយន្តមានជាតិស្រវឹង និង មិនពាក់មួកការពារសុវត្ថិភាព ហើយភាគច្រើនជាប្រភេទក្មេងស្ទាវ។
ជាក់ស្តែងនៅយប់ថ្ងៃទី៤ខែមីនានេះ កម្លាំងគណៈបញ្ជាការឯកភាពខណ្ឌច្បារអំពៅដឹកនាំដោយលោករស់ សុភ័គ្គ អភិបាលរងខណ្ឌបានដឹកនាំកម្លាំងចុះត្រួតពិនិត្យអាវុធជាតិផ្ទុះនៅតាមបណ្តោយផ្លូវជាតិលេខ១មុខទីស្នាក់ការសង្កាត់ច្បារអំពៅទី២បានរកឃើញអ្នកបើកបរម៉ូតូគ្មានពាក់ស្លាកលេខ ពុំមានពាក់មួកការពារសុវត្ថិភាពនិងដាក់កញ្ចក់មើលក្រោយពិសេសមានជាតិស្រវឹង។
តាមរបាយការណ៍បានបញ្ជាក់ថា នៅពេលរកឃើញអ្នកបើកបរមិនគោរពច្បាប់ចរាចរណ៍ដូចមានរៀបរាប់ខាងលើនេះ គណៈបញ្ជាការឯកភាពបានធ្វើការអប់រំហើយអ្នកដែលស្រវឹងស្រាគឺមិនអនុញ្ញាតឲ្យបន្តដំណើរទៅមុខទេ ព្រោះខ្លាចជួបគ្រោះថ្នាក់ដល់អាយុជីវិតដល់អ្នកដទៃនិងខ្លួនឯង។
គួរបញ្ជាក់ថា ជារៀងរាល់យប់គឺកម្លាំងគណៈបញ្ជាការឯកភាពខណ្ឌច្បារអំពៅដែលមានលោកចេង មុនីរ៉ា ជាប្រធាននិងជាអភិបាលនៃគណៈអភិបាលខណ្ឌបានដាក់ផែនការចុះត្រួតពិនិត្យអាវុធជាតិផ្ទុះក្នុងមូលដ្ឋានខណ្ឌច្បារអំពៅជារៀងរាល់យប់ដើម្បីទប់ស្កាត់រាល់បទល្មើសផ្សេងៗដែលបង្កឡើងដោយក្រុមជនសង្គមងងឹតដែលប៉ុនប៉ងធ្វើសកម្មភាពក្នុងមូលដ្ឋាន។ ហើយក្នុងនោះគណៈអភិបាលខណ្ឌជាប្រធានដឹកនាំគណៈបញ្ជាការឯកភាពខណ្ឌផ្ទាល់តែម្តង៕
Source: Kampuchea Thmey Daily
0 Comments