ក្រុមបាល់ទាត់ជម្រើសជាតិប៉ាគីស្ថាន បានចាប់ឆ្នោតប៉ះក្រុមបាល់ទាត់ជម្រើសជាតិកម្ពុជា ក្នុងវគ្គជម្រុះបឋមនៃពានរង្វាន់បាល់ទាត់ជើងឯកពិភពលោកឆ្នាំ២០២២ ដែលប្រទេសកាតាទទួលធ្វើជាម្ចាស់ផ្ទះ (2022 Qatar FIFA World Cup) ប្រចាំទ្វីបអាស៊ី បានបញ្ជេញបញ្ចីឈ្មោះកីឡាករក្នុងជម្រើសជាតិរបស់ខ្លួនត្រៀមប្រមូលផ្ដុំហ្វឹកហាត់ចំនួន ៣២នាក់ចុងក្រោយនៅល្ងាចថ្ងៃសុក្រ សប្ដាហ៍នេះ។
សហព័ន្ធកីឡាបាល់ទាត់ប៉ាគីស្ថាន បានចេញលិខិតនៅថ្ងៃសុក្រ ទី២៦ ខែមេសាឆ្នាំ២០១៩ បានបង្ហាញបញ្ជីឈ្មោះកីឡាករ ៣២រូបដើម្បីចូលជំរំហ្វឹកហាត់ ពីថ្ងៃទី០៥ ខែឧសភា រហូតដល់ថ្ងៃទី០៣ ខែមិថុនា ដែលមានរយៈពេល៣០ថ្ងៃមុនប្រកួតផ្លូវការមកដល់ ៣ថ្ងៃដែលត្រូវប៉ះក្រុមជម្រើសជាតិកម្ពុជា។
បញ្ជីឈ្មោះកីឡាករទាំង៣២រូបដែលភាគច្រើនរើសចេញពីកីឡាករក្នុងស្រុកនោះមានដូចជាអ្នកចាំទី មានSaqib Hanif (SSGC), Ahsanullah (SSGC), Tanvir Mumtaz (KRL), Mohammad Fahim (Muslim FC), Sumair (PCAA)។ ចំណែកខ្សែការពារមានUmar Hayat (WAPDA), Arslan Ali (KRL), Naved Ahmed (Navy), Mehdi Hassan (PAF), Ali Khan Niazi (K-Electric), Mohammad Shahid (KRL), Waseem Asghar (PCAA), Mohammad Bilal (WAPDA)។ សម្រាប់ខ្សែបម្រើមានកីឡាករ Umair Ali (KRL), Mehmood Khan (SSGC), Saddam Hussain (SSGC), Zain-ul-Abdeen (K-Electric), Rajab Ali (KRL), Zaid Umar (KRL), Ali Uzair (WAPDA), Habib-ur-Rehman (SSGC), Mohammad Riaz (K-Electric), Izharullah (KRL)។ ចុងក្រោយខ្សែប្រយុទ្ធមាន Raziq (SSGC), Mansoor Khan (PAF), Yousuf Ahmed (KRL), Ahmed Fahim (WAPDA), Mohammad Naeem (PCAA), Shehzad (PCAA), Iftikhar (KRL), Sohail (PCAA), Sadullah (SSGC), Kaleemullah (Najaf FCនៅអ៊ីរ៉ាក់)។
តាមគម្រោងក្រុមជម្រើសជាតិប៉ាគីស្ថាន នឹងជួបក្រុមជម្រើសជាតិកម្ពុជា នៅជើងទី១ នៅថ្ងៃទី០៦ ខែមិថុនា លើទឹកដីកម្ពុជា ខណៈជើងទី២ ត្រលប់មកទឹកដីប៉ាគីស្ថាន វិញនៅថ្ងៃទី១១ ខែមិថុនា ដូចគ្នាដើម្បីសម្រេចសេចក្ដីរកក្រុមឈ្នះ ដែលឡើងទៅជុំទី២ នៃពានរង្វាន់បាល់ទាត់ពិភពលោក ឆ្នាំ២០២២ នៅប្រទេសកាតា (2022 FIFA Qatar World Cup) ប្រចាំទ្វីបអាស៊ី។
ក្នុងទ្វីបអាស៊ី តម្រូវឲ្យសមាជិកចំនួន៤៦ប្រទេសប្រកួតជម្រុះ៤វគ្គផ្សេងៗគ្នា ដើម្បីស្វែងរកក្រុមខ្លាំងជាងគេចំនួន៤កៅអីកន្លះ តំណាងឲ្យអាស៊ី ឡើងទៅប្រកួតវគ្គ៣២ក្រុមចុងក្រោយនៅចុងឆ្នាំ២០២២ ខាងមុខ។ ចំពោះក្រុមកម្ពុជា ស្ថិតក្នុងបញ្ជីក្រុមត្រូវប្រកួតជម្រុះដំបូងជាមួយក្រុមចំនួន១២ផ្សេងទៀត។ ចំណែក៥គូផ្សេងទៀតគឺក្រុមម៉ុងហ្គោលី ប៉ះប្រ៊ុយណេ ហើយម៉ាកាវ ជួបស្រីលង្កា ហើយឡាវប៉ះបង់ក្លាដេស ម៉ាឡេស៊ី ជួបទីម័រខាងកើត និងប៊ូតង់ ប៉ះកោះហ្គាម។ ក្រុមទាំង៦គូនេះត្រូវប៉ះគ្នា២លើកដោយប្តូរទាំងដីគ្នា ខណៈប្រកួតទី១ធ្វើឡើងនៅថ្ងៃទី៦ខែមិថុនា និងជើងទី២ធ្វើឡើងនៅថ្ងៃទី១ខែមិថុនា ឆ្នាំ២០១៩ដូចគ្នា។
ក្រុមឈ្នះនៅវគ្គជម្រុះបឋមចំនួន២ជើងដែលមាន៦ក្រុមនេះមានឈ្មោះឡើងទៅលេងក្នុងវគ្គចែកពូលដែលជាជុំទី២ជាមួយក្រុមខ្លាំង៣៤ផ្សេងទៀត ហើយក្រុមខ្លាំងតាមពូលនីមួយៗ នឹងមានឈ្មោះប្រកួតបន្តនៅវគ្គទី៣និងវគ្គទី៤រហូតដល់រកឃើញក្រុមតំណាងឱ្យទ្វីបតែម្តង។ កម្មវិធីប្រកួតទាំង៤វគ្គនេះចាប់ផ្តើមពីថ្ងៃទី៦ ខែមិថុនា ឆ្នាំ២០១៩ រហូតដល់ថ្ងៃទី១៦ ខែវិច្ឆិកា ឆ្នាំ២០២១៕
Source: Kampuchea Thmey Daily
0 Comments