សៀមរាប ៖ បុរសម្នាក់ដើរឆ្លុះសត្វក្នុងព្រៃមិនប្រយ័ត្នរាលកៃនិង(កាំភ្លើងឆ្នុក) កែច្នៃ បណ្តាលឲ្យស្លាប់ខ្លួនឯងនៅនឹងកន្លែង។ ហេតុការណ៍នេះកើតឡើងនៅវេលាម៉ោង២២ និង០០ នាទី យប់ថ្ងៃទី២៦ ខែមេសា ឆ្នាំ២០១៩ នៅចំណុចព្រៃល្ហៀក ស្ថិតក្នុងភូមិ សែនជ័យ ឃុំកន្ទួត ស្រុកស្វាយលើ ខេត្តសៀមរាប។
លោកវរសេនីយ៍ឯក ស៊ុន អេង អធិការនគរបាលស្រុកស្វាយលើ បានឲ្យដឹងនៅរសៀលថ្ងៃទី២៧នេះថា មានករណីរាលអាវុធកែច្នៃដោយខ្លួនឯងបណ្ដាលឲ្យស្លាប់ (កាំភ្លើងឆ្នុក) លើជនរងគ្រោះឈ្មោះម៉ៅ សាត ហៅមី ភេទប្រុស អាយុ២០ឆ្នាំ មានទីលំនៅភូមិ កើតហេតុខាងលើ។ លោកបន្តថា តាមការបំភ្លឺរបស់ឪពុកជនរងគ្រោះឈ្មោះ ព្រំ ម៉ៅ អាយុ ៤៩ឆ្នាំ និងម្ដាយឈ្មោះ វ៉ាន់ លាត អាយុ ៤៧ឆ្នាំ បានឲ្យដឹងថា នៅថ្ងៃទី ២៦ ខែមេសា ឆ្នាំ២០១៩ ជនរងគ្រោះបានយកកាំភ្លើងឆ្នុក ចេញទៅឆ្លុះសត្វក្រោយផ្ទះប្រហែល១០០ម៉ែត្រ ស្រាប់តែឮសូរផ្ទុះចំនួន១គ្រាប់ ពេលនោះ ឪពុកម្តាយក៏រត់ទៅមើល ជនរងគ្រោះឃើញដួលផ្កាប់មុខនិងដី កាំភ្លើងឆ្នុកនៅអែបខ្លួនខាងស្តាំ ហើយនៅលើខ្លួនជនរងគ្រោះមានរន្ធមុតបោះដៃផុតខាងស្តាំ បណ្តាលឲ្យស្លាប់ភ្លាមៗនៅនឹងកន្លែង។ បន្ទាប់ពីសមត្ថកិច្ច ត្រួតពិនិត្យសពរួចក៏បានប្រគល់ជូនគ្រួសារ ជនរងគ្រោះ យកទៅធ្វើបុណ្យនៅភូមិអូររំចេក ឃុំស្រែណូយ ស្រុកវ៉ារិន ខេត្តសៀមរាប តាមប្រពៃណី៕
Source: Kampuchea Thmey Daily
0 Comments