ភ្នំពេញ ៖ ចាប់ពីខែមករា ដល់ខែមីនា ចំណូលពីថ្លៃសួយសារផល អនុផលព្រៃឈើ សរុបមានចំនួន ៩៣០៤៧៦៩២៩០ រៀល ( ស្មើប្រមាណ ២៣២៦១៩២ ដុល្លារ ) និង ៦៩ ២៨១ ដុល្លារ ដែលសរុបទៅ ចំណូលពីព្រៃឈើ រយៈពេល ៣ខែ ដើមឆ្នាំ២០១៩នេះ ស្មើប្រមាណ ២៣៩៥៤៧៣ ដុល្លារ។នេះបើយោងតាម របាយការណ៍ថ្មីបំផុតមួយរបស់ក្រសួងកសិកម្ម រុក្ខាប្រមាញ់ និងនេសាទ បានបង្ហាញ សម្រាប់ត្រីមាសទី១ ឆ្នាំ២០១៩។
របាយការណ៍ដដែលបានបង្ហាញទៀតថា ក្រៅពីចំណូលពីព្រៃឈើ នៅត្រីមាសទី១ ឆ្នាំ២០១៩ របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ក៏បានបង្ហាញពីការងារដាំដើមឈើលើផ្ទៃដីទំហំ ១៥២ ហ.ត និងបណ្តុះកូនឈើ បានចំនួន ១០១៥០០ដើម ក្នុងស្ថានីយផ្សព្វផ្សាយ និងស្តារព្រៃឈើអន្លង់ថ្ម ខេត្តកំពង់ធំ ព្រមទាំងស្ថានីយផ្សព្វផ្សាយ និងស្តារព្រៃឈើអូរថ្ម ខេត្តព្រះសីហនុ។ ក្រៅពីនោះ ក្រសួងក៏បានបណ្តុះកូនឈើគ្រប់ប្រភេទ ចំនួន ១១៧៨៣៧ ដើម ប្រគេនកូនឈើជូនព្រះសង្ឃ និងចែកប្រជាពលរដ្ឋ សរុបចំនួន ២៣៤៤១ ដើម។
នៅក្នុងត្រីមាសទី១ ឆ្នាំ២០១៩ នេះ ក្រសួងកសិកម្ម រុក្ខាប្រមាញ់ និងនេសាទ ក៏បានប្រកាសថា មានសំណុំរឿងបទល្មើសព្រៃឈើ សត្វព្រៃ និងការកាប់រានដីព្រៃ សរុបចំនួន ១៩៥ ករណី ដោយពិន័យអន្តរកាល ចំនួន ១១៧ ករណី និងបញ្ជូនទៅតុលាការ ចំនួន ៧៨ ករណី។ ចំពោះវត្ថុតាង នៃបទល្មើសព្រៃឈើ បានចាប់ឃាត់ និងដកហូត ក្នុងត្រីមាសទី១ ឆ្នាំ២០១៩នេះ ត្រូវបានក្រសួងកសិកម្ម រុក្ខាប្រមាញ់ និងនេសាទ ប្រកាសថា មានឈើមូល-ជ្រុង សរុបចំនួន ៩៦ ម៉ែត្រគូប ឈើអារ ចំនួន ៣៤២ ម៉ែត្រគូប គ្រាក់ក្រញូង ចំនួន ២ម៉ែត្រគូប សត្វព្រៃចម្រុះប្រភេទ ចំនួន ១៤៦៧ ក្បាល និងទម្ងន់ ៨០ គ.ក្រ និងសំណុំរឿងកាន់រានដីព្រៃ ចំនួន ៦ករណី មានដីព្រៃចំនួន ២២៦ ហ.ត ត្រូវបានបញ្ជូនទៅតុលាការ។
ក្រសួងកសិកម្ម រុក្ខាប្រមាញ់ និងនេសាទ ក៏បានប្រកាសថា ក្នុងត្រីមាសទី១ ឆ្នាំ២០១៩ នេះ មានក្រុមហ៊ុន ចំនួន៥ បានធ្វើការនាំចេញផលិតផលគ្រឿងសង្ហារិម និងរានទេវតាពីឈើនាំចូល និងឈើអារកែច្នៃ ទៅក្រៅប្រទេស មានចំនួន ២៩៨ ម៉ែត្រគូប និងផលិតផលជ័រទឹក ចំនួន ៥៦តោន។ ក្រៅពីនេះ ក្រសួង បានផ្តល់ទិដ្ឋាការអាជ្ញាប័ណ្ណនាំចេញ ចំនួន ៣ក្រុមហ៊ុន មានផលិតផលឈើកែច្នៃ ចំនួន ៧០ម៉ែត្រគូប និងផលិតផលជ័រទឹក ចំនួន ៩០តោន ព្រមតាំងផ្តល់ទិដ្ឋាការអាជ្ញាប័ណ្ណនាំចូលផល អនុផលព្រៃឈើ ចំនួន ២ក្រុមហ៊ុន ដែលមានឈើកែច្នៃ ចំនួន៤១២ម៉ែត្រគូប៕
Source: Kampuchea Thmey Daily
0 Comments