រដ្ឋលេខាធិការក្រសួងមហាផ្ទៃ ៖ ការដាក់ឲ្យដំណើរការAPPតាក់ស៊ី និងតុកតុកTAP ON នឹងចូលរួមចំណែកអភិវឌ្ឍសេដ្ឋកិច្ច និងសង្គមកម្ពុជា

ភ្នំពេញ ៖ លោក អង មង្គល រដ្ឋលេខាធិការក្រសួងមហាផ្ទៃបានថ្លែងបញ្ជាក់ថា ការដាក់ឲ្យដំណើរការAPP តាក់ស៊ី និងតុកតុកTAP ON នឹងចូលរួមចំណែកដល់ការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងជួយលើកកម្ពស់ជីវភាពរបស់បងប្អូនដែលប្រកបមុខរបរមួយនេះឲ្យមានភាពប្រសើរឡើងថែមទៀតផង។

ការថ្លែងបញ្ជាក់របស់ លោក អង មង្គល រដ្ឋលេខាធិការក្រសួងមហាផ្ទៃខាងលើនេះ បានធ្វើឡើងនៅក្នុងពិធីសម្ពោធដាក់ឲ្យប្រើប្រាស់ដំណើរការនូវApp តាក់ស៊ី និងតុកតុក TAP ON នៅសណ្ឋាគារសូហ្វីតែលភ្នំពេញកាលពីរសៀលថ្ងៃទី០៩ ខែមេសា ឆ្នាំ២០១៩កន្លងមកនេះ។

លោកបានមានប្រសាសន៍ទៀតថា ខ្ញុំសូមលើកទឹកចិត្តចំពោះតំណាងនានាចូលរួមបង្កើនប្រសិទ្ធភាព នៃការផ្តល់សេវា និងគុណភាព នៃផលិតផល ឬទំនិញរបស់ខ្លួនដើម្បីឲ្យអតិថិជនកាន់តែមានភាពពេញចិត្ត និងប្រើប្រាស់សេវារបស់ខ្លួនកាន់តែច្រើន។

លោក អង មង្គល បានបន្តទៀតថា ក្រុមហ៊ុនបានរៀបចំកម្មវិធីនេះឡើងក្នុងគោលបំណងដាក់ឲ្យដំណើរការសេវាកម្ម App តាក់ស៊ី និងតុកតុក TAP ON ដែលមានតម្លៃសមរម្យជាងក្រុមហ៊ុននានាដើម្បីជួយសម្រួល និងបម្រើដល់អតិថិជនដែលប្រកបអាជីវកម្មរត់តាក់ស៊ី និងតុកតុកអាចភ្ជាប់ទំនាក់ទំនងបានយ៉ាងឆាប់រហ័សជាមួយអតិថិជនដែលមានតម្រូវការប្រើប្រាស់លើមធ្យោបាយមួយនេះ។

រដ្ឋលេខាធិការក្រសួងមហាផ្ទៃ លោក អង មង្គល បានគួរបញ្ជាក់ទៀតថា បច្ចុប្បន្នមានក្រុមជាច្រើនដែលកំពុងដំណើរការអាជីវកម្ម និងមានទីតាំងរបស់ខ្លួននៅកម្ពុជាដែលបានចរាចរដាក់លក់ផលិតផល ឬទំនិញរបស់ខ្លួននៅលើទីផ្សារ ឬខ្លះទៀតបម្រើផ្នែកសេវាកម្មនានាជាដើម។ ដោយការវិវត្តន៍ នៃបច្ចេកវិទ្យាព័ត៌មានវិទ្យាទីផ្សារអនឡាញ បាននិងកំពុងរីករាលដាល និងទទួលបានការចាប់អារម្មណ៍ ជាច្រើនពីអតិថិជន។

លោកបានបន្ថែមថា ទន្ទឹមនឹងនោះ ការរីករាលដាល នៃសេវាដឹកអ្នកដំណើរតាមតាក់ស៊ី និងតុកតុកដោយប្រើប្រាស់ App ក៏ពេញនិយមសម្រាប់មនុស្សនាសម័យទំនើបមួយនេះ ដោយអតិថិជនគ្រាន់តែបញ្ចូលកម្មវិធីមួយនេះ ទៅក្នុងទូរស័ព្ទវៃឆ្លាត (Smart Phone) របស់ពួកគាត់នឹងទទួលបានសេវាកម្ម ដឹកអ្នកដំណើររហ័សទាន់ចិត្ត នៅពេលដែលចុចបញ្ជាហៅការប្រើប្រាស់ភ្លាម។ តួយ៉ាងដូចជា App តាក់ស៊ី និងតុកតុក របស់ក្រុមហ៊ុន TAP ON មួយនេះ ដែលនឹងដាក់ឲ្យដំណើរការភ្លាម បន្ទាប់ពីកម្មវិធីសម្ពោធដាក់ឲ្យប្រើប្រាស់រួចរាល់៕