ភ្នំពេញ ៖ ស្ត្រីម្នាក់ បានរងរបួសយ៉ាងធ្ងន់ធ្ងរ ហើយត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមភ្លាមដែរ ក្រោយពេលដែល ស្ត្រីម្នាក់នេះជិះម៉ូតូឌុបតាមផ្លូវ ហើយត្រូវបានជនសង្ស័យធ្វើសកម្មភាពឆក់យកកាបូបលុយរបស់គាត់បានសម្រេច បណ្តាលឲ្យដួលបោកក្បាលទៅលើថ្នល់រងរបួសយ៉ាងធ្ងន់ធ្ងរនោះ។
អំពើឆក់ខាងលើនេះ បានកើតឡើងកាលពីវេលាម៉ោង០៦និង១៥នាទី ព្រឹកព្រលឹមថ្ងៃទី១០ ខែមេសាឆ្នាំ២០១៩ តាមបណ្ដោយផ្លូវមុនីរ៉េត ជិតគល់ស្ពានអាកាសស្ទឹងមានជ័យ ស្ថិតក្នុងសង្កាត់បឹងសាឡាង ខណ្ឌទួលគោក។
សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញស្ត្រីរងគ្រោះជិះម៉ូតូឌុប ដោយស្ពាយកាបូបពណ៌ស្វាយមួយនៅជាប់ខ្លួន ហើយខណៈជិះមកដល់ចំណុចកើតហេតុ តាមបណ្ដោយផ្លូវមុនីរ៉េត ស្រាប់តែមានជនសង្ស័យម្នាក់ជិះម៉ូតូសេ១២៥ មកអែកក្បែរ និងបានធ្វើសកម្មភាពឆក់យកកាបូបស្ពាយរបស់ជនរងគ្រោះបានសម្រេចបណ្ដាលឲ្យស្ត្រីរងគ្រោះដួលបោកក្បាលទៅលើថ្នល់សន្លប់ស្ដូកស្ដឹង ហើយជនល្មើសបានជិះម៉ូតូគេចខ្លួនបាត់ដោយសុវត្ថិភាព។
ចំណែកស្ត្រីរងគ្រោះ ខណៈសន្លប់ស្ដូកស្ដឹងនៅកន្លែងកើតហេតុ ក៏ត្រូវបានគេជួយសង្គ្រោះ ដោយហៅរថយន្តសាមុយដឹកបញ្ជូនទៅកាន់មន្ទីរពេទ្យភ្លាមដែរ។
លើករណីនេះ សមត្ថកិច្ចប៉ូលិស កំពុងតែធ្វើការស្រាវជ្រាវដើម្បីស្វែងរកចាប់ខ្លួនជនសង្ស័យមកដាក់ទោសទៅតាមផ្លូវច្បាប់៕
Source: Kampuchea Thmey Daily
0 Comments