ចិន ៖ ប្រធាន ក្រុមមហ៊ុន Beijing Fushide Investment Management Ltd and East Consulting Management Ltd ចិនចូលសម្តែងការគួរសម និងពិភាក្សាការងារ ជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៧ មេសា ដើម្បីស្វែងយល់ពីឱកាសវិនិយោគលើវិស័យកសិកម្មនៅកម្ពុជា។
ក្រសួងបានឲ្យដឹងថា នៅក្នុងជំនួបនោះ លោករដ្ឋមន្ត្រី បានស្វាគមន៍នូវគម្រោងចង់វិនិយោគលើវិស័យកសិកម្ម ព្រមទាំងបានបញ្ជាក់ថា នៅកម្ពុជាមានសក្តានុពលយ៉ាងខ្លាំងសម្រាប់ការវិនិយោគ ជាពិសេសការវិនិយោគលើការដាំឈើឡើងវិញ ការកែច្នៃផិតផលកសិកម្ម ការដាំដុះនៅមុខដំណាំផ្សេងៗ និងការចិញ្ចឹមសត្វ ឬចិញ្ចឹមត្រីជាដើម ដែលទាំងអស់នេះ គឺមានសក្តានុពលក្នុងការវិនិយោគដែលអាចធ្វើការនាំចេញមកប្រទេសចិន ឬ ទីផ្សារក្នុងប្រទេសអាស៊ាន ក៏ដូចជាទីផ្សារអឺរ៉ុប និងអាមេរិក ផងដែរ។ ជាមួយគ្នានេះ រដ្ឋមន្ត្រីក៏បានអញ្ជើញក្រុមហ៊ុន ឲ្យមកប្រទេសកម្ពុជាដើម្បីសិក្សាឲ្យបានល្អដើម្បីអោយដំណើរការបានល្អ។
ឆ្លើយតបទៅនិងការលើកឡើងរបស់ លោករដ្ឋមន្ត្រី លោកប្រធានក្រុមហ៊ុនចិនបានសម្តែងនូវការសប្បាយចិត្តយ៉ាងខ្លាំងចំពោះការស្វាគមន៍លើការវិនិយោគ លោកបានបញ្ជាក់ថា ក្រុមហ៊ុនលោកមានមុខជំនួញជាច្រើន ហើយចំពោះមុខនេះលោកមានបំណងចង់វិនិយោគលើវិស័យដាំឈើដើម្បីនាំមកប្រទេសចិន។ លោក រដ្ឋមន្ត្រី បានលើកឡើងថា ករណីក្រុមហ៊ុនចង់វិនិយោគលើការដាំឈើនេះ គឺក្រុមហ៊ុនត្រូវសហការជាមួយក្រុមហ៊ុនចិនដែលមានដីស្រាប់ដើម្បីសហការដាំដុះនូវប្រភេទឈើថ្មីនេះដើម្បីនាំចេញ ដោយសារពេលនេះយើងមិនមានការផ្តល់ដីសម្បទានសេដ្ឋកិច្ចទៀតទេ។ ក្រុមក៏អាចសហការជាមួយក្រុមហ៊ុនក្នុងស្រុកដើម្បីសហការក្នុងការដាំ និងប្រមូលទិញនូវដើមអាកាស្យាផងដែរសម្រាប់ធ្វើការកែច្នៃ។
លោកប្រធានក្រុមហ៊ុនក៏មានការចាប់អារម្មណ៍លើការដាំកៅស៊ូផងដែរ ដោយចង់ធ្វើការកែច្នៃជាសំបករថយន្តសម្រាប់នាំចេញ។ លោករដ្ឋមន្ត្រីបានបញ្ជាក់ថា ផ្ទៃដីកៅស៊ូមានប្រមាណ ៤៥មើន ហត តែតម្លៃកៅស៊ូបច្ចុប្បន្នមានតម្លៃទាប និងមានបញ្ហាច្រើន ដូច្នេះសូមឲ្យក្រុមហ៊ុនទៅទស្សនកិច្ចនៅកម្ពុជាដើម្បីពិនិត្យពីលទ្ធភាពវិនិយោគ៕
Source: Kampuchea Thmey Daily
0 Comments