ក្របខណ្ឌបាល់ទាត់លីគកំពូលកម្ពុជា (Metfone Cambodian League) ត្រូវបានសហព័ន្ធកីឡាបាល់ទាត់អាស៊ី (AFC) បញ្ជាក់ថា ស្ថិតនៅចំណាត់ថ្នាក់លេខ២៧ក្នុងតារាង AFC Club Competition នាពេលថ្មីៗនេះ ជាមួយនឹងប្រទេសជាសមាជិកសរុបមានចំនួន៤៥ ខណៈនៅប្រទេស១៨ផ្សេងទៀត។
ជារួមបើរាប់លីគកំពូលប្រទេសទាំង១០ ដែលមានកម្រិតខ្ពស់ជាងគេប្រចាំទ្វីបអាស៊ី តាមរយៈការកំណត់ដោយ AFC មានលេខ១ចិន,លេខ២ កាតារ,លេខ៣ កូរ៉េខាងត្បូង,លេខ៤ អ៊ីរ៉ង់,លេខ៥ ជប៉ុន,លេខ៦អារ៉ាប់ប៊ីសាអូឌីត,លេខ៧មានអារ៉ាប់រួម,លេខ៨មានថៃ លេខ៩មានអ៊ីរ៉ាក់ និងលេខ១០ អ៊ូប៊ែគីស្ថាន។ ងាកមកមើលតំបន់អាស៊ានវិញលីគកំពូលប្រទេសថៃ លេខ៨ ហើយហ្វីលីពីន ឈរលេខ១២ សឹង្ហបុរី លេខ១៦ ម៉ាឡេស៊ី លេខ១៧ វៀតណាម លេខ២២ មីយ៉ាន់ម៉ា លេខ២៥ ឥណ្ឌូណេស៊ី លេខ២៦ កម្ពុជាលេខ២៧ ឡាវលេខ៣៤ ទីម័រខាងកើតលេខ៤០ និងប្រ៊ុយណេលេខ៤២។
រៀបចំឡើងដោយគណៈកម្មការប្រកួតបាល់ទាត់ជាតិកម្ពុជា (CNCC) សេនាធិការរបស់សហព័ន្ធកីឡាបាល់ទាត់កម្ពុជា (ស.ប.ក) ខណៈកម្មវិធីប្រកួតរដូវកាលថ្មីឆ្នាំ ២០១៩ នេះចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩ ដោយតម្រូវឲ្យក្រុមទាំង១៤ប្រកួតគ្នាវិលជុំ២លើកដើម្បីស្វែករកក្រុមមានពិន្ទុច្រើនជាងគេក្លាយជាម្ចាស់ជើងឯកប្រចាំរដូវកាល។ ក្រុមជើងឯកលីគកំពូលកម្ពុជា មានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត។
ចំណែកក្រុមជាសមាជិក ដែលចូលរួមទាំង១៤វិញនោះ មានណាហ្គាវើល,បឹងកេត,វិសាខា,ក្រសួងការពារជាតិ,ភ្នំពេញក្រោន,អាស៊ីអឺរ៉ុប,អគ្គស្នងការដ្ឋាននគរបាលជាតិ,អង្គរថាយហ្គឺរព្រះខ័នរាជស្វាយរៀង,សូលទីឡូអង្គរ,អគ្គីសនីកម្ពុជា។ ចំណែកក្រុមលេចមុខថ្មី៣ក្រុមគឺ គីរីវង់សុខសែនជ័យ,ខេត្តកំពង់ចាម និង U18 សាលាបាល់ទាត់ជាតិបាទី៕
Source: Kampuchea Thmey Daily
0 Comments