កណ្ដាល ៖ យ៉ាងហោចណាស់មានមនុស្សបីនាក់ ក្នុងនោះមានអធិការ និងអធិការរងនគរបាលស្រុកស្អាងពីរនាក់ រួមទាំងនាយប៉ុស្តិ៍នគរបាលព្រែកអំបិលម្នាក់ផងដែរ ត្រូវបានថ្នាក់លើហៅឲ្យមកកាន់ការិយាល័យបុគ្គលិក នៃស្នងការដ្ឋាននគរបាលខេត្តកណ្ដាល ដើម្បីដុសក្អែលចេញម្ដងព្រោះតែអសកម្មការងារ មិនបង្ក្រាបរាល់បទល្មើសល្បែងភ្នាល់ និងល្បែងស៊ីសងគ្រប់ប្រភេទនៅក្នុងអាណាចក្រទឹកដីរបស់ខ្លួនកាន់កាប់គ្រប់គ្រង។
ក្នុងឱកាសដែលថ្នាក់លើកោះហៅឲ្យមកកាន់ការិយាល័យបុគ្គលិកនេះ ថ្នាក់លើក៏បានចេញសេចក្ដីលិខិតបង្គាប់ការមួយ ដោយបានតែងតាំង លោក វ៉ាត សុផាត ដែលមានតួនាទីជាអធិការរង នៃអធិការដ្ឋាននគរបាលស្រុកស្អាងឲ្យទទួលភារកិច្ចជាអធិការ ស្ដីទីនគរបាលស្រុកស្អាង ជំនួសលោកសេង សុជាតិ ដែលត្រូវហៅទៅជួបថ្នាក់លើ។ ឯលោកព្រឹន្ទបាលឯក នាង ផានិត នាយរងប៉ុស្តិ៍នគរបាលរដ្ឋបាលព្រែកអំបិលឲ្យទៅជានាយប៉ុស្តិ៍ស្ដីទី ទទួលគ្រប់គ្រងបញ្ជាដឹកនាំកងកម្លាំងប៉ុស្តិ៍នគរបាលរដ្ឋបាលព្រែកអំបិល ជំនួសលោកអនុសេនីយ៍ទោ ជៃ សំអាត ដែលត្រូវមកបង្ហាញមុខនៅការិយាល័យបុគ្គលិក។ ជាមួយគ្នានេះ លោកវរសេនីយ៍ទោ ស៊ុប លាងសែ អធិការរងនគរបាលស្រុកស្អាង ក៏ត្រូវបានជាប់ឈ្មោះឡើងមកកាន់ការិយាល័យបុគ្គលិកជាមួយគ្នាផងដែរ។
នៅក្នុងលិខិតបង្គាប់ការបានបញ្ជាក់ថា អស់លោកដែលមានឈ្មោះខាងលើ ត្រូវបំពេញភារកិច្ចរបស់ខ្លួនឲ្យបានល្អនូវរាល់វិន័យការងារតាមតួនាទីភារកិច្ចដែលបានកំណត់ រហូតដល់មានការសម្រេចជាថ្មី។
គួរបញ្ជាក់ថា លោក សេង សុជាតិ អធិការនគរបាលស្រុកស្អាងកន្លងមកធ្លាប់ បានបើកដៃឲ្យមានល្បែងស៊ីសងខុសច្បាប់ជាច្រើនដូចជា ល្បែងភ្នាល់ ជល់មាន់ និងអាប៉ោង នៅក្នុងមូលដ្ឋានរបស់ខ្លួន ដែលផ្គើនទៅនឹងបទបញ្ជា និងអនុសាសន៍របស់នាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និង សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដែលលោកតែងតែដាស់តឿនក្រើនរំលឹកដល់មន្ត្រីមានសមត្ថកិច្ចក្រោមឱវាទ ឲ្យមានការយកចិត្តទុកដាក់បំពេញការងារជូនប្រជាពលរដ្ឋឲ្យបានល្អប្រសើរ និងឈរលើគោលការច្បាប់ជាធរមាន ចៀសវាងអនុវត្តន៍ការងារមានភាពលំអៀងមិនប្រក្រតី។ ប៉ុន្តែរាល់ការដាស់តឿនរបស់ថ្នាក់លើនោះ លោកហាក់មិនយកចិត្តទុកដាក់ស្ដាប់ និងយកទៅអនុវត្តន៍ឲ្យមានប្រសិទ្ធភាពទេ បែរជាជិះសេះលែងដៃយ៉ាងរំភើយ មិនតែប៉ុណ្ណោះថែមទាំងឃុបឃិតជួយបិទបាំងក្រុមជនខិលខូចទាំងនោះទៀតផង ហើយបើកដៃឲ្យមានការលេងល្បែស៊ីសងយ៉ាងពេញបន្ទុកនៅក្នុងអាណាចក្រដែនសមត្ថកិច្ចរបស់ខ្លួន។
ជាក់ស្ដែង ទីតាំងលេងល្បែងស៊ីសងខុសច្បាប់ មានដូចជា សង្វៀនជល់មាន់ និងវង់អាប៉ោង នៅចំណុចភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល លេងយ៉ាងគគ្រឹកគគ្រេង ដោយមានអ្នកលេងប្រមាណ៣០០នាក់ បែរជាមិនបង្ក្រាប រហូតកម្លាំងស្នងការខេត្តកណ្តាល បើកប្រតិបត្តិការចុះបង្ក្រាបកាលពីថ្ងៃទី១៤ ខែមេសា ឆ្នាំ២០១៩។ ក្រៅពីទីតាំងជល់មាន់ អាប៉ោង នៅចំណុចភូមិពាមប្រជុំ ឃុំព្រែកអំបិល ស្រុកស្អាង ក៏នៅមានទីតាំងល្បែងស៊ីសងខុសច្បាប់មួយចំនួនទៀតដូចជា នៅឃុំស្វាយប្រទាល ឈ្មោះហុង ជាមេសង្វៀន។ ជាមួយគ្នានេះ ក៏នៅមានទីតាំងមួយចំនួនទៀត នៅឃុំខ្ពប និងនៅឃុំទឹកវិល...។ល។
ប្រភពបន្ដថា ល្បែងទាំងនេះមានអ្នកលេងក្នុងមួយវង់ៗមនុស្សមិនក្រោម២០០នាក់នោះទេ។ ឯនៅស្វាយប្រទាល មានអ្នកបាញ់ មេអាប៉ោង ឈ្មោះ ស៊ ម៉ាន់ ភេទប្រុស អាយុ៥០ឆ្នាំ មានទីលំនៅភូមិពោធិប៉ាង ឃុំស្វាយប្រទាល ស្រុកស្អាងបុរសរូបនេះ បើកលេងនៅភូមិព្រែកតាតិន។ មេសង្វៀនមាន់ជល់ ឈ្មោះ ស្រាង ហុង ភេទប្រុស អាយុ៣៦ឆ្នាំ នៅភូមិព្រែករុនក្រោម ឃុំព្រែកគយ ស្រុកស្អាង បើក លេងជល់មាន់នៅពោធិ៍ប៉ាង។ ចំណែកអ្នកចាត់ចែងបើកលេងជល់មាន់ អាប៉ោង នៅចំណុចភូមិបឹងខ្ពប ឃុំខ្ពប ស្រុកស្អាង ចូលហ៊ុនជាមួយឈ្មោះ ថៃ ថី ភេទប្រុស អាយុ៤៧ឆ្នាំ នៅភូមិបឹងខ្ពប ឃុំខ្ពប ស្រុកស្អាង។
ប្រភពព័ត៌មានបានឲ្យដឹងថា កន្លងមក លោកអធិការនគរបាលស្រុកស្អាង ក៏ធ្លាប់បានមន្ត្រីក្រោមឱវាទ ប្ដឹងទៅអង្គភាពប្រឆាំងអំពើពុករលួយ នាពេលកន្លងមកដែរ ពាក់ព័ន្ធការយកលុយប្រចាំខែពីល្បែងស៊ីសងខុសច្បាប់ និងករណីមិនប្រក្រតីជាច្រើនទៀត។ មកដល់ពេលនេះ ក៏ត្រូវបានថ្នាក់លើនៃការិយាល័យបុគ្គលិកកោះហៅទៅដុសក្អែលចេញម្ដង មិនដឹងថាមានវាសនាអាចវិលមកកាន់តំណែងចាស់បានវិញ ឬយ៉ាងណានោះទេ៕
Source: Kampuchea Thmey Daily
0 Comments