បន្ទាប់ពីការពិចារណារាប់ខែ លោក Joe Biden បានចាប់ផ្ដើមការប្រកួតប្រជែងតំណែងប្រធានាធិបតីអាមេរិកនៅថ្ងៃព្រហស្បតិ៍ដែលជាហេតុធ្វើឲ្យអ្នកប្រជាធិបតេយ្យជើងចាស់រូបនេះក្លាយជាបេក្ខជននាំមុខក្នុងចំណោមបេក្ខជនជាច្រើនដែលកំពុងស្វែងរកការប្រកួតប្រជែងជាមួយលោក Donald Trump នៅក្នុងឆ្នាំ២០២០។
រដ្ឋបុរសជាន់ខ្ពស់វ័យ៧៦ឆ្នាំរបស់គណបក្សរូបនេះនឹងក្លាយជាអ្នកប្រជាធិបតេយ្យដែលមានបទពិសោធនិងមានការទទួលស្គាល់ខ្លាំងបំផុតនៅក្នុងការប្រកួតប្រជែង។លោក Bidenត្រូវបានគេមើលឃើញថាជាអ្នកដែលមានប្រជាប្រិយភាពសម្រាប់អ្នកបោះឆ្នោតអាមេរិកដែលនឹងត្រូវតទល់ជាមួយអ្នកប្រជាធិបតេយ្យប្រមាណ២០នាក់ដែលឥឡូវនេះត្រូវបានគេដាក់នៅក្នុងការប្រកួតប្រជែងសម្រាប់តំណែងប្រធានាធិបតីជាផ្លូវការរួចទៅហើយ។
ប៉ុន្តែភាពចម្រូងចម្រាសនាពេលថ្មីៗនេះលើរចនាប័ទ្មប៉ះពាល់របស់គាត់ជាពិសេសជាមួយស្ត្រីអាចកាត់បន្ថយលទ្ធភាពរបស់គាត់ដែលគាត់បានមើលឃើញថាជាធាតុសំខាន់ចុងក្រោយបំផុតទៅក្នុងសមរភូមិគណបក្សប្រជាធិបតេយ្យ។
មនុស្សដែលដឹងពីផែនការរបស់អ្នកប្រជាធិបតេយ្យរូបនេះបានប្រាប់ប្រព័ន្ធផ្សព្វផ្សាយអាមេរិកថា បន្ទាប់ពីការប្រកាសនៅថ្ងៃព្រហស្បតិ៍ លោកនឹងធ្វើដំណើរទៅកាន់ទីក្រុង Pittsburgh នៃរដ្ឋ Pennsylvania ដែលជាកន្លែងលោក Trump បានឈ្នះក្នុងឆ្នាំ២០១៦ដើម្បីថ្លែងទៅកាន់សហជីពការងារមួយដែលប្រមូលផ្ដុំគ្នានៅថ្ងៃច័ន្ទនៅក្នុងការបង្ហាញខ្លួនជាសាធារណៈលើកដំបូងរបស់គាត់បន្ទាប់ពីការប្រកាសជាសាធារណៈអំពីបេក្ខភាពរបស់គាត់។
ចំនួនបេក្ខជនក្នុងកម្រិតកំណត់ត្រានេះមានន័យថា លោក Biden ត្រូវប្រឈមមុខនឹងភាពសម្បូរបែបដែលមិនធ្លាប់មានពីមុនមកខណៈដែលលោកបានឈរឈ្មោះជាលើកទីបីសម្រាប់តំណែងប្រធានាធិបតីបន្ទាប់ពីការប៉ុនប៉ងបរាជ័យពីរលើកនៅក្នុងឆ្នាំ១៩៨៨និង២០០៨។
គាត់នៅតែនាំមុខក្នុងការស្ទង់មតិថ្មីៗបំផុត។ យោងតាមការស្ទង់មតិមួយដែលធ្វើឡើងដោយគេហទំព័រ RealClearPolitics បានបង្ហាញថា ជាមួយនឹងសំឡេងឆ្នោត២៩,៣ភាគរយ លោក Biden បាននាំមុខសមាជិកព្រឹទ្ធសភាឆ្វេងនិយមលោក Bernie Sanders ដែលមានសំឡេង២៣ភាគរយ៕ AFP
Source: Kampuchea Thmey Daily
0 Comments