មនុស្ស​ម្នាក់​ស្លាប់​ក្នុង​អគ្គិភ័យ​ឆេះ​ក្រុង​ព្រំដែន​កូរ៉េខាងត្បូង

ទីភ្នាក់ងារ​ព័ត៌មាន Yonhap បាន​រាយការណ៍​ថា អគ្គិភ័យ​ដ៏​ធំ​សម្បើម​មួយ​ បាន​ផ្ទុះឡើង​កាលពី​ថ្ងៃ​ព្រហស្បតិ៍​ក្នុង​ក្រុង Goseong នៅ​ព្រំដែន​កូរ៉េខាងត្បូង​ ដោយ​បណ្តាល​ឲ្យ​មនុស្ស​យ៉ាងតិច​ម្នាក់​ស្លាប់​និង​បំផ្លាញ​ផ្ទះ​រាប់សិប​ខ្នង​ហើយ​បង្ខំ​ឲ្យ​មនុស្ស​ជាង​៣,០០០​នាក់​ជម្លៀស​។​

សេចក្តីរាយការណ៍​នេះ​បាន​និយាយ​ដោយ​លើកឡើង​ប្រភពពី​ក្រុមមន្ត្រី​អគ្គិភ័យ​ថា ខ្យល់​បក់​ខ្លាំង​បានធ្វើ​ឲ្យ​អគ្គិភ័យ​នេះ​រាលដាល​យ៉ាង​ឆាប់រហ័ស​ក្នុង​ក្រុង​នេះ​ដែលមាន​ទីតាំងនៅ​តំបន់​ជួរ​ភ្នំ​នៃ​ខេត្ត Gangwon ភាគ​ឦសាន​ក្បែរ​ព្រំដែន​ជាប់​ប្រទេស​កូរ៉េខាងជើង​។​
Yonhap បាន​រាយការណ៍​ថា ទីភ្នាក់ងារ​អគ្គិភ័យ​ជាតិ​បានដាក់​ពង្រាយ​បុគ្គលិក​សង្គ្រោះបន្ទាន់​ប្រហែល​២,៧០០​នាក់​ខណៈ​អ្នក​ពន្លត់​អគ្គិភ័យ​បានមកពី​គ្រប់ទិសទី​នៅ​ទូទាំងប្រទេស​ប៉ុន្តែ​ខ្យល់​បក់​បាន​បង្ក​ភាពស្មុគស្មាញ​ដល់​ការគ្រប់គ្រង​អគ្គិភ័យ​។​

អាជ្ញាធរ​បានចេញ​ភាពអាសន្ន​កម្រិត​ខ្ពស់បំផុត (​លំដាប់​ទី​៣) ហើយ​លោក​ប្រធានាធិបតី Moon Jae-in បាន​ប្រាប់​ក្រុមមន្ត្រី​ឲ្យ​ចាត់វិធានការ​ចាំបាច់​ទាំងអស់​ដើម្បី​ប្រយុទ្ធ​នឹង​អគ្គិភ័យ​។​
Yonhap បាន​រាយការណ៍​ទៀតថា ប៉ូលិស​បាន​រកឃើញ​សាកសព​បុរស​ម្នាក់​នៅលើ​ផ្លូវ​ដែល​ទំនងជា​ស្លាប់​ដោយសារ​អគ្គិភ័យ​។ ក្រុមមន្ត្រី​បានកែតម្រូវ​របាយការណ៍​មួយ​ដែលថា​ស្ត្រី​វ័យ​ចំណាស់​ម្នាក់​បាន​ស្លាប់​នៅក្នុង​អគ្គិភ័យ​នេះ​។​

មនុស្ស​១១​នាក់​ផ្សេងទៀត​បានរ​ងរ​បួ​សប៉ុ​ន្តែ​ចំនួន​នេះ​ត្រូវបាន​គេ​រំពឹងថា​នឹង​កើនឡើង​នៅ​ថ្ងៃ​សុក្រ​។ របាយការណ៍​បាន​ឲ្យ​ដឹងថា ផ្ទះ​ប្រហែល​១២០​ខ្នង​ត្រូវបាន​បំផ្លាញ​។​

មន្ត្រី​ពន្លត់​អគ្គិភ័យ​ម្នាក់​បាន​ប្រាប់ Yonhap ថា រថយន្ត​ពន្លត់​អគ្គិភ័យ​ប្រហែល​១០០​គ្រឿង​បាន​ស្ថិតនៅ​កន្លែងកើតហេតុ​នៅពេល​មួយ​យប់​ហើយ​១០០​គ្រឿង​ទៀត​នឹង​មកដល់​។​
​ឧទ្ធម្ភាគចក្រ​ប្រហែល​៣០​គ្រឿង​ត្រូវបាន​បញ្ជូនទៅ​នៅពេល​ថ្ងៃ​សម្រាប់​បេសកកម្ម​ជួយសង្គ្រោះ​និង​ពន្លត់​អគ្គិភ័យ​៕ AFP

​

Source: Kampuchea Thmey Daily