ភ្នំពេញ ៖ បុរសម្នាក់សង្ស័យជាចោរលួចទ្រព្យសម្បត្តិគេត្រូវបានប្រជាជននាំគ្នាដេញចាប់ខ្លួនបានយកមកប្រគល់ឲ្យសមត្ថកិច្ចនគរបាលមូលដ្ឋានចាត់ការទៅតាមផ្លូវច្បាប់កាលពីម៉ោង១២ និង៣០នាទី យប់ឈានចូលថ្ងៃទី១១ ខែមេសា ឆ្នាំ២០១៩ នៅសង្កាត់ទឹកថ្លា ខណ្ឌសែនសុខ។
មន្ត្រីនគរបាលរដ្ឋបាលប៉ុស្តិ៍ទឹកថ្លា បានឲ្យដឹងថា ជនសង្ស័យជាចោរខាងលើឈ្មោះ ដា លីន អាយុ២៧ឆ្នាំ គ្មានមុខរបរពិតប្រាកដ ស្នាក់នៅផ្ទះជួលភូមិអន្លុងស្វាយ ឃុំបែកចាន ស្រុកអង្គស្នួល ខេត្តកណ្តាល។
ប៉ូលិសបានឃាត់ខ្លួនជនសង្ស័យខាងលើតាមបណ្តឹងចោទប្រកាន់ពីប្រជាជនរងគ្រោះម្នាក់ឈ្មោះ អ៊ីន សុខខឿន ភេទប្រុស អាយុ៣២ឆ្នាំ មុខរបរជាងម៉ាស៊ីនត្រជាក់ ស្នាក់នៅផ្ទះជួល ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ។
បើតាមបណ្តឹងរបស់ជនរងគ្រោះបាននិយាយថា នៅមុនពេលកើតហេតុគាត់បានអង្គុយនៅក្នុងផ្ទះជាមួយប្រពន្ធ ក្រោយមកប្រពន្ធគាត់បានស្រែកប្រាប់ឲ្យគាត់ទៅមើលក្នុងបន្ទប់ដាក់អីវ៉ាន់(សម្ភារៈទ្រព្យសម្បត្តិ)ផង ព្រោះមានឮសម្លេងធ្លាក់អីវ៉ាន់ ភ្លាមនោះគាត់ក៏បានស្ទុះមកមើលក៏បានប្រទះឃើញជនសង្ស័យខាងលើកំពុងដើរចេញពីបន្ទប់ ក៏ស្រែកចោរៗដើម្បីឲ្យគេជួយដេញចាប់។ នៅគ្រានោះប្រជាជនអ្នកជិតខាងក៏បាននាំគ្នាដេញចាប់បាននៅចំណុចក្នុងសួនលក់កូនឈើនិងផ្កានៅក្បែរវត្តទឹកថ្លា រួចក៏ហៅប៉ូលិសឲ្យមកទទួលយកទៅចាត់ការតាមច្បាប់តែម្តង។
ជនសង្ស័យបានសារភាពពីសកម្មភាពរបស់ខ្លួនលបចូលមកក្នុងផ្ទះគេដើម្បីប៉ុនប៉ងលួចយកទ្រព្យសម្បត្តិដោយខុសច្បាប់ ដោយសារតែភាពក្រីក្រ ប៉ុន្តែត្រូវម្ចាស់គេដឹងនាំគ្នាដេញចាប់ខ្លួនបានជាក់ស្តែងយកមកប្រគល់ឲ្យប៉ូលិស៕
Source: Kampuchea Thmey Daily
0 Comments