ភ្នំពេញ ៖ ស្ដ្រីជនជាតិចិនម្នាក់សង្ស័យភ័យផ្អែមមាត់ផ្អែម.ក បន្ទាប់ ពីដើរលេងតាមចិញ្ចើមផ្លូវ ហើយត្រូវយុវជនពីរនាក់ជិះម៉ូតូ១គ្រឿងធ្វើសកម្មភាពឆក់កាបូបលុយពីស្ដ្រីនោះបានសម្រេច ដែលនៅក្នុងកាបូបនោះមានលុយរហូតដល់ទៅ៣ម៉ឺនដុល្លារធ្វើឲ្យនាងភ័យស្លន់ស្លោស្រែកឲ្យគេជួយ នៅទីបំផុតសមត្ថកិច្ចខណ្ឌពោធិ៍សែនជ័យបានតាមចាប់ខ្លួនជនសង្ស័យបានភ្លាមៗផងដែរ និងយកលុយបានមកវិញទាំងអស់ វាពិតជាសំណាងណាស់ទ្រព្យរបស់គេ ពិតជាមិនអាចឃ្លាតទៅណាពីម្ចាស់គេបានទេ។
ហេតុការណ៍នេះ បានកើតឡើងកាលពីវេលាម៉ោង១០និង៥០នាទីយប់ ថ្ងៃទី១០ ខែមេសា ឆ្នាំ២០១៩ ត្រង់ចំណុចមុខអាកាសយានដ្ឋានអន្តរជាតិភ្នំពេញ តាមបណ្តោយផ្លូវហសព័ន្ធរុស្ស៊ី ស្ថិតក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ។
ជនសង្ស័យទី១ មានឈ្មោះលឹម លាងហេង ភេទប្រុសអាយុ១៧ឆ្នាំមុខរបរមិនពិតប្រាកដរស់នៅភូមិថ្មគោល សង្កាត់ចោមចៅទី២ ខណ្ឌពោធិសែនជ័យ ទី២ឈ្មោះ ជាង សី ភេទប្រុស អាយុ១៥ឆ្នាំ ស្នាក់នៅក្បែរសាលាគោកបញ្ជាន់ ភូមិចោមចៅទី២ សង្កាត់ចោមចៅទី២ ខណ្ឌពោធិ៍សែនជ័យ មានទីលំនៅកំណើតឃុំសំពៅពូន ស្រុកកោះធំ ខេត្តកណ្តាល ។ចំណែកជនរងគ្រោះឈ្មោះ ZENG CHUN ភេទស្រីអាយុ ៤២ឆ្នាំជាជនជាតិចិនដីគោក។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះបានចុះពីលើសណ្ឋាគារមកវិញបានដើរលេងតាមផ្លូវស្រាប់តែឃើញគេកំពុងធ្វើកម្មវិធីជប់លៀងក៏ទាញទូរស័ព្ទថតលេងភ្លាមនោះក៏លេចមុខជនសង្ស័យចំនួន២នាក់ជិះម៉ូតូម៉ាកឃ្លីកពណ៍ខ្មៅ គ្មានស្លាកលេខមកធ្វើសកម្មភាពឆក់កាបូបយួរពីដៃជនរងគ្រោះ បានសម្រេចហើយព្យាយាមជិះគេចខ្លួនតែត្រូវបានកម្លាំងអន្តរាគមន៍ល្បាតឃើញក៏ដេញចាប់បានភ្លាមៗតែម្តង។
អ្នកឃើញហេតុការណ៍នេះគេនិយាយថា ស្ដ្រីជនជាតិចិនម្នាក់នេះពិតជាសំណាងណាស់ដោយសារសមត្ថកិច្ចតាមចាប់យកបានមកវិញនូវទឹកលុយដ៏ច្រើនសន្ធឹកសន្ធាប់នេះ. កន្លងទៅមិនងាយតាមចាប់បានមកវិញដូច្នេះទេឲ្យតែឆក់បានគឺច្បាស់ជាមិនងាយតាមចាប់បានវិញអីចឹងឡើយ។
បច្ចុប្បន្នជនសង្ស័យត្រូវបានកម្លាំងអន្តរាគមន៍ពិសេសខណ្ឌពោធិ៍សែនជ័យប្រគល់ឲ្យប៉ុស្តិ៍នគរបាលរដ្ឋបាលចោមចៅទី២ធ្វើការសាកសួរបន្តនិងបញ្ជូនទៅអធិការនគរបាលខណ្ឌដើម្បីចាត់ការតាមច្បាប់ ចំណែកលុយនោះត្រូវបាន សមត្ថកិច្ចប្រគល់ជូនទៅជនរងគ្រោះវិញ គ្រប់ចំនួនដោយមិនបាត់១សេនឡើយ៕
Source: Kampuchea Thmey Daily
0 Comments